Paakai zi sariya 18 - Ɗû na sɗik na wiini Alaw

Pinzibani Dan ɗa e jûgû midini afti zamai

¹ War mefeŋ ni ɗa, pai a na fu aha warɗi Izrayel kai, war sarti ni lai pinzibani Dan ɗa e ɗi fu aŋ piyi afti zi bulum na kapai e simni woni ɗa, buri ɓa haa sini mefeŋ ni ta e nivi afti zi bulum arbaɗi pinzibaɗi Izrayel ɗa kai.

² Pinzibani Dan ɗa, e ɵini ɗai arbaɗi par ɵim, e ɗi ɗai zi hatam na agulɗi a huna kai ɗa. E ɵiniɗisi war Sora gaiɗi Estahol par buri e gûnisi midini afti, e tiliŋsi gaini futini lai. E miɗiɗi: Hili tilisi afti gaini futini. E cû midini hlai zi huwuŋ na wiini Efrayim ahani Mika, e fini woni lai.

³ Won hlai n'e cûsi gobi sini dalamni Mika ɗa, e ɵini wulani gawla na Levite n'a na muɗa seŋ ɗa, e hili sini e zilbiŋ, e miɗi: A kukusi won na ɗa a maɗa? Ku za won na ɗa a maɗa? Wala n'a na ɗuluku won na ɗa a maɗa?

⁴ A waya seŋ a miɗiɗi: Mika a za sa nɵa nɵa, a saŋa vrak ta lai kapai mu sumna ahani, tiyana mu na aŋ pai zi ɓaka na wiini.

⁵ Nɵa e miɗini: Za barka zilba dirini Alaw buriyi haw, kapai mi siɗi, na ɓa morkoi na t'aŋ wuzayi ɗa aga te ɵa edi pɗemi zaw pɗemi kai ɗi ɗa.

⁶ Pai zi ɓaka a wiyiɗi seŋ: Ki hili jam, morkoi na ki kiti na ɗa arni EPIƊ-ƊAI aŋ midiki.

⁷ Ɗai na ɵim ɗa e hili e cû a Lais, e niviɗi ɗai na woni ɗa, huwyi siɗi kai maiɗi ɗai na war Sidon ɗa nɵa, ɗif ktai na ɵimaɗi n'a huwyiɗi aŋ kai, ɗif n'a kirpiɗi aŋ kaalai, arbaɗi gaiɗi Sidon ɗa gaigai, wala ktai a tipiɗi gaiɗi kaalai.

⁸ E wiyisi siɗi tawalakai war Sora gaiɗi Estahol. Tawalakaiɗi ɗa e zilibiɗi, e miɗiɗi: Ki miɗi maɵa ɗa?

⁹ E wiyi seŋ e miɗiɗi: Hulumu cukuɗumu ɗai na Lais ɗa, mi tilisi aftiɗi ɗa a afti na pɗem gara. Warki a yimaŋ kai ɗi? Ki zi siki falakai kai, fiki amai hulumu aŋ tiki afti hanɗa!

¹⁰ Won hlai na ki cû li woni ɗa, aga ki niviɗi ɗai na huwyi ktai maa siɗi kai, aftiɗi ɗa a na abai, Alaw a siŋki war tiki ta. Hlai ni ɗa wala na miɗini yai ktai n'aŋ warni kai ɗa aŋ kai.

¹¹ Nɵa, ɗai miya ɵaara na war piɗi humuni na wiini Dan, e fiki war Sora gaiɗi Estahol par gaini wazagaiɗi zi hatam gaini niggi wuzaɗi.

¹² E hili e pi kaŋ na wiiɗi war Kiriyat-Yeyarim midini afti na Yuda, buri nɵa, haa girna e yiki hlai hanɗa ɓa: Mahane-Dan, aŋsi ka duɓaɗi Kiriyat-Yeyarim,

¹³ woni par e vigi hlai zi huwuŋ na wiini Efrayim ɗa vug, e cû ahani Mika.

¹⁴ Nɵa ɗai na ɵim n'e hili e gûnisi midini afti na Lais ɗa, e miɗiɗi wiiɗi tawalakaiɗi maini nɵa: Dalam n'aŋ tiki na ɗa, ki siɗi ɓa Alaw zi rgi gaini alawai n'agogoi n'e miliŋ amlai warni dalam, gaini Alaw zi rgi na gaini kawai zi hiliyi aŋ warni ɗi? Nɵa tiyana ɗa, zi na ki sɗiŋ ɗa.

¹⁵ Nɵa ɗai na ɵim, e hili ahani Mika, e niyi amlai sini gawla na Levite ɗa, e zilbi jam na sini.

¹⁶ Ɗai na miya ɵaara na war pinzibani Dan par, e ɗiyi anene mini hlai par gaini eziɗi ca ca, wazagaiɗi zi hatam wuzaɗi gaini rgi ɓak ɓak.

¹⁷ Ɗai na ɵim n'e hili e gûnisi afti, e niyi amai war etas, e niyi amlai war dalam, e mili alawai zi rgi gaini alawai zi rgi n'agogoi n'e miliŋ amlai war dalam gaini Alaw n'e ziziniŋ gaini kawai zi hiliyi, won hlai na pai zi ɓaka ɗa, aŋsi anene mini hlai gaiɗi ɗai na miya ɵaara na gaini wazagaiɗi zi hatam gaini rgi wuzaɗi ɗa.

¹⁸ Won hlai n'a tiliɗi ɗai e niyi amlai warɗi dilimi na wiini Mika, e milisi alawai zi rgi gaini alawai n'agogoi n'e miliŋ amlai warni dalam, gaini Alaw zi rgi n'e ziziniŋ gaini kawai zi hiliyi ɗa, pai zi ɓaka a miɗiɗi: Ki zi ɵa ɗa a maɗa?

¹⁹ E wiyini seŋ: Ba muku, ku muɗa seŋ kir kai, ɵasi piyi, za aŋ apiyi, aŋ pai zi ɓaka na wiyi lai. Pɗem ɗa a na ku za aŋ pai zi ɓaka miɗiɗi pakatai na wiini ɗif ktai zaw, aŋ pai zi ɓaka na wiini pinziba ktai warɗi Izrayel ɗa ɗi?

²⁰ Firiyi a yima pai zi ɓaka ɗa, a taɓa piɗi askarai na e mili alawai zi rgi gaini alawai n'agogoi n'e miliŋ amlai war dalam gaini Alaw zi rgi n'e ziziniŋ ɗa, a taɓa piɗi a hala gaiɗi.

²¹ E wiyi sek ɗa, e miliɗi ɗai wuzaɗi gaini wazagai n'e zini puɗu puɗu, gaini der zamai zamai lai.

²² Won hlai n'e hili gaigai sini dalam na wiini Mika par agwi, ɗai n'e simni ɵimani dalamni Mika par gobi ɗa e yiki siɗi ka ka, e tiki futi pini pinzibani Dan ɗa.

²³ E ɗûûli pini pinzibani Dan ɗa, nagai e bindisi arɗi e miɗini wiini Mika: Ku ɗuula ɵa ɗa buri maɗa?

²⁴ A wiyiɗi seŋ a muɗa: Alawai na wiya na mu zizinaŋ ɗa, ki miliŋ yaw ki yimi pai zi ɓaka kaai ki hilisi gaini ɗaw lai, a hinasi ta katawai ɗa a maŋ Na kapai ki miɗiŋa ɓa: A za ɗa a ma ɗi ɗa?

²⁵ Pinzibani Dan e wiyini seŋ: Kitiŋiyi ɵimayi kai, ɵa kai ɗa, zamai n'arbaɗi par na midiɗi gaini siiwi ta ɗa aga e fikiɗi amai siki, aga ku ka suku aŋ fiɗi edi kadai gaiɗi ɗai n'ahaku lai.

²⁶ Pinzibani Dan ɗa, e hili wiiɗi wuzaɗi. Won hlai na Mika a tiliɗi haa gdaŋɗi a suwaŋ su ɗa, a wayasi wiini aha.

Fuŋ n'abai na wiini pinzibani Dan gaini tempel na wiini

²⁷ E mili wazagai na Mika a zaŋ ɗa, e hili gaini pai zi ɓaka na wiini lai. E hili e cikiti Lais, na ɗai na woni ɗa e ɗi fu huwyi siɗi kai ɗa, e fiɗiɗi edi gaini kaɵkar, e ɵi afu pini fuŋɗi n'abai ɗa lai.

²⁸ Ɗif ktai n'a zina piɗi aŋ piliɗi edi aŋ kai buri ɓa fuŋ n'abai na Lais ɗa a na fu gaigai siɗi Sidon par, bonuɗi gaini ɗif kai. Te na fu azumai warni huduk na Bet-Rehob. Asakal par e wiyi e rgi fuŋ n'abai ɗa amai, e simni woni lai.

²⁹ E bindi yikini fuŋ n'abai hanɗa pla, avut par e yikiŋ ɓa Lais, amma e bindiŋ miɗini yikini Dan na tiyiɗi n'ahini Yakob ɗa.

³⁰ E pi Alaw zi rgi na wiini Mika ɗa amai tiɓ kapai e hûrgû azumai wuzani. Yonatan n'ahini Gerson, n'ahini Manase ni gaiɗi alini e bindi aŋ paakai zi ɓaka na wiini pinzibani Dan haa sini mefeŋ n'e kiɗi edi aŋ bege midini afti na zamai.

³¹ E giɗimi Alaw zi rgi na Mika a zaŋ ɗa, - a hina tiɗi ɵa haa hlai na Dalam na wiini Alaw a zogo edi war Silo par.