Paakai zi sariya 14 - Ɗû na sɗik na wiini Alaw

Tiki na wiini Samson

¹ Samson a hala Timna, woni a niviti ɓulmi ktai arbaɗi aliɗi Filistrekai.

² Won hlai n'a wayasi woni par, a miɗini wiini epini gaiɗi emini maini nɵa: Mu tilitisi ahiyagwi ktai arbaɗi ɓulamai na Filistrekai, mu firiya ɓa ki tikitiŋa aŋ muni.

³ Epini gaiɗi emini e miɗini: Arbaɗi aliɗi ɗaiku gaini pinzibaku ɗa, ɓulamai e ɗi kai ɗi? Na kapai ku hala haa ku tikasi muni arbaɗi Filistrekai na gazɗaŋai hanɗa par ɗa. Samson a wiyini seŋ wiini epini: Tikitiŋa wiiku, buri ɓa te na ara a yimiti ɗa.

⁴ Epini gaiɗi emini e siɗi ɓa wala hanɗa a na sini EPIƊ-ƊAI par kai, buri ɓa a paya na ɗa a futi buri seŋ a za arbani gaiɗi Filistrekai kapai e hitimi marɗi, buri war sarti ni ɗa, Filistrekai e ɗi fu aŋ ŋi midiɗi Izrayel.

⁵ Samson, gaini epini gaiɗi emini lai e hili war Timna, won hlai n'e cû gobi gaini luwuŋ zi vin n'aŋ war Timna ɗa, gurnai na gawla a niyasi edi mini, a nuuma, a praŋsi.

⁶ Seze na wiini EPIƊ-ƊAI a niya sini Samson, Samson ɗa wala ktai tini kai, amma a ɓasa gurnai ɗa edi arba ca maini n'e ɓisi ahini hek nɵa. Amma wala n'a zaŋsi a miɗini wiini epini gaiɗi emini gaini kai.

⁷ Asakal par a kiti morkoini a haɗa kalaŋ gaiɗi ahiyagwi ɗa, te juva arni gara.

⁸ Mefeŋ agwi asakal par, a waya war Timna aŋ tikitisi ahiyagwi ɗa aŋ munini, a vuga ɗawwa aŋ tala kopoŋni gurnai n'a fuɗaŋ ɗa, amlai warni kopoŋni gurnai ɗa, a niviti ami gaini tiki ta, te za emel ta lai.

⁹ A lika emelni ami tini agwi a suma pini won hlai n'a na hala ɗa. A cosi sini epini gaiɗi emini ɗa, a siɗi e simi lai. Amma a miɗiɗi ɓa a likasi emelni ami war kopoŋni gurnai par, a miɗiɗi nɵa kai.

Samson a miɗiɗi seŋ joro wiiɗi Filistrekai

¹⁰ Epini a hala siɗi ahiyagwi ɗa, won hlai ni ɗa, Samson a za fet n'abai burini tiki maini na gawlakai e ɗa ziŋ ɗa nɵa.

¹¹ Won hlai na Filistrekai e tiliŋ, e virisi gawlakai doogo doogo hu buri e hili gaini.

¹² Samson a miɗiɗi: Mu dara mu miɗiki seŋ joro ktai, na ɓa war mefeŋ na muguzak na wiini fet hanɗa, ki niviŋ li, ki siŋkiŋa ezini edi li lai ɗa, aga mu siki sapa zi fet doogo doogo hu, sapakai zamai doogo doogo hu lai.

¹³ Amma na ɓa ki kiɗi aŋ siŋkiŋa ezini edi kai ɗa, tiki aga ki siŋa sapa zi fet doogo doogo hu, sapakai na zamai doogo doogo hu lai. Nagai e miɗini: Muɗa seŋ joroku haw ka, mi ɗa biyiŋ

¹⁴ A miɗiɗi: Wala zi simi a niyasi edi war wala zi limi wazagai ɗa par, wala na nem a niyasi edi warni wala na gdaŋ par, a dara a muɗa maɵa ɗa? E zi haa mefeŋ hu, e kiɗi e siŋki ezini seŋ joro hanɗa edi kai.

¹⁵ War mefeŋ n'ag'aŋ muguzak ɗa, gawlakai e miɗiɗi wiiɗi marmani samson ɗa: Hala duula mofaku ɗa, kapai a siŋkiyi ezini seŋ joro na wiini ɗa edi, ɵa kai ɗa, aga mu buluku arni afu, tuku gaiɗi ɗai n'ahaku paŋ. Ku yikiyisi miɗi fet ɗa ɓa kapai ku mula wazagaiyi ɗi?

¹⁶ Marmaini Samson te tika piɗi te tuwa pini, te hinaŋ a suŋfa kai, te miɗini maini nɵa: Kapai tuku ku firiyaŋa kai, ku miɗiɗi seŋ joro wiiɗi ɗai haya ta, amma ku siŋkaŋa ezini edi kai. Amma a waya seŋ a miɗiɗi: Mu siŋka ezini seŋ hanɗa edi wiini apa kaalai, wiiɗi ama kaalai, kapai mu suŋkuŋku wiiku tuku kiɗi

¹⁷ Te tuwa pini ɵa haa mefeŋ muguzak na wiini fet ɗa a vada. Amma war mefeŋ n'ag'aŋ muguzak ɗa, a siŋkiɗi ezini seŋ hanɗa edi, buri ɓa te na kayaŋ gara. Nɵa asakal par te siŋkiɗi ezini seŋ joro hanɗa wiiɗi ɗai haɗi ta.

¹⁸ War mefeŋ n'ag'aŋ muguzak, won hlai na futi te ŋa ta aŋ nawa ɗa, ɗai na war fuŋ n'abai ɗa par e hilisi e miɗini wiini Samson: Wala na nem n'a suwa emelni ami a na ɗi? Wala na gdaŋ n'a suwa gurnai a na ɗi? A miɗiɗi: Na ɓa ki hirmi fu gaiɗi ɵaiŋa kai ɗa, ki kiɗi ki nivi seŋ joro na mu miɗiŋki kai.

¹⁹ Nɵa Seze a wiini EPIƊ-ƊAI a niya sini Samson, a hala war Askelon a fuɗa ɗai doogo doogo hu, a mula sapa zi fet na siɗi edi, a hinasi kopoŋɗi gaɓala, a sa sapa hanɗa wiiɗi nagai na e siŋkini ezini seŋ joro ɗa edi ɗa. A wayasi ahani epini war hiy n'abai.

²⁰ Marmaini ɗa, a sitini wiini marmaini na gaini ɗa ta.