Paakai zi sariya 1 - Ɗû na sɗik na wiini Alaw

Aliɗi Izrayel e simni war Kanaan

¹ Asakalni mrini Yosva, aliɗi Izrayel e zilbi dirini EPIƊ-ƊAI maini nɵa: arbayi ɗa, pinziba n'aga a hala aŋ hitima gaiɗi Kanaaniyakai avut ɗa a na wata ɗa?

² EPIƊ-ƊAI a wiyiɗi seŋ: a pinziba na wiini Yuda, buri mu sini afti hanɗa war tini.

³ Nɵa ɗai na war pinzibani Yuda e miɗiɗi wiiɗi nagai na war pinzibani Simeyon na tawalni maini nɵa: Hilisi gaiyi, hutumuɗumu Kanaaniyakai ɗa piɗi marmu, kapai asakal par tiyi lai mi hili gaiki midini afti n'a sa siki lai, nɵa pinzibani Simeyon e hili gaiɗi.

⁴ E hili e hitimi, EPIƊ-ƊAI a siɗi Kanaaniyakai gaiɗi Perizitekai war tiɗi, e fiɗi ɗai dubu doogo war Bezek

⁵ E nivi Adoni-Bezek, war fuŋ n'abai na Bezek e hitimiŋ, e fiɗiɗi Kanaaniyakai gaiɗi Perezitekai edi.

⁶ Adoni-Bezek a lawa wuzaɗi, nagai e birgiŋ haa e yimiŋ e ɗûkûli ali tini gaini alini ezini n'abakai edi daf daf.

⁷ Adoni-Bezek a muɗa: Paakai doogo doogo muguzak na ali tiɗi gaini alini eziɗi n'abakai gaini ɗûkûli edi daf daf, e ɗi ka e viri ɗa a kolkoɗaini simi n'a yaka azumai pini tabel na wiya wuza. Wala na mu zaŋ siɗi ɗa, Alaw a wayaŋsi li mada. E kiŋ war Yeruzalem, a mra woni.

⁸ Pinzibani Yuda e ciki fuŋ n'abai na Yeruzalem, e tikiŋ lai. E fiɗiɗi ɗai na woni edi gaini kaɵkar, e ɵi afu pini fuŋ n'abai ɗa lai.

⁹ Pinzibani Yuda e niyisi edi pra, e hitimiɗi aliɗi Kanaaniyakai n'e zi fuŋ midini hlai zi huwuŋ gaiɗi a war gal n'amai sek, gaiɗi na war Sefela.

¹⁰ Pinzibani Yuda a hala a hitima gaiɗi Kanaaniyakai na war Hebron. Yikiɗi Hebron na avut par ɓa: Kiryat-Arba, e rɗi amai midini pinziba na wiini Sesai gaini na wiini Ahiman gaini na wiini Talmai lai.

¹¹ Woni par pinzibani Yuda e hili e hitimi gaiɗi ɗai na Debir. Debir, yikiɗi n'avut ɗa ɓa: Kiryat-Sefer.

¹² Kaleb a muɗa: Ɗif n'a rɗa li amai midiɗi Kiryat-Sefer ɗa, aga mu sitini Aksa n'ahiya aŋ munini.

¹³ Otniyel n'ahini Kenaz na tawalni Kaleb n'agwi ɗa, a rɗa amai midiɗi Kiryat-Sefer, Kaleb a sitini Aksa na ahini aŋ munini.

¹⁴ Won hlai na te co ahani Otniyel tar ɗa, te zini pini buri a zilba vowai tini epiɗi, te niyasi azumai midini ablehöɗi par, Kaleb a zilbiti a muɗa: Ku firya ɗa a maɗa?

¹⁵ Te miɗini: Za yum sa ta, tuku ku saŋa hlai na war gal n'amai sek, na kooloŋ ɗa ta, saŋa hlai zi yem ta lai kai ɗi? Nɵa Kaleb a siɗi hlai zi yem n'amai par gaini n'azumai par ɗa lai.

¹⁶ Kenitekai, na pinzibani suwulni Musus ɗa, e hilisi war fuŋ n'abai zi huura par gaiɗi pinzibani Yuda lai, e hili e simni edi war basga na kaɗataŋ na Yuda, tiɗi Arad war gal n'amai sek. E hili e simni arbaɗi Amalekekai.

¹⁷ Pinzibani Yuda e hili gaiɗi pinzibani Simeyon na tawalni, e hitimi gaiɗi Kanaaniyakai na war Sefat, e rɗi amai midiɗi lai. E tûûri fuŋ n'abai hanɗa edi a bunda aŋ wala zi tusa, e siɗi yiki ɓa: Horma.

¹⁸ Pinzibani Yuda e tikiti Gaza gaini afti na ɵimaɗi paŋ, Askalon gaini afti na ɵimaɗi paŋ, Ekron gaini afti na ɵimaɗi paŋ lai.

¹⁹ EPIƊ-ƊAI a zina piɗi pinzibani Yuda gara, haa e tiki hlai zi huwuŋ, e bindiŋ aŋ wiiɗi. Amma ɗai n'e simni azumai war hlai na plas ɗa, gdaŋɗi a kiɗa a birgiɗi kai, buri e ɗa gaini saret zi gaw zi kawai lai.

²⁰ Pini miɗi na wiini Musus ɗa, Hebron te sa sini Kaleb, a birgiɗi pinzibani Anak na hu edi ca.

²¹ Pinzibani Benyamin e kiɗi e birgiɗi Yebuzitekai na war Yeruzalem ɗa edi kai. Haa girna e ɗa war fuŋ n'abai hanɗa gaiɗi ɵa.

²² Pinzibani Yosef a faka amai a hitimiti Betel lai, war hatamɗi, EPIƊ-ƊAI a zina piɗi.

²³ Pinzibani Yosef e hili, e tilitisi Betel na yikiɗi n'avut par ɓa Luz.

²⁴ Ɗai n'e ɵiniɗi ɗa, e nivi ɗif ktai n'a niyasi edi warni fuŋ n'abai ɗa par, e miɗini: Za barka, siŋkiyi mini magala n'e niyi aha sek warni ɗa. Tiyi aga mi zi pɗem suku lai.

²⁵ A siŋkiɗi mini magala n'e niyi aha sek warni ɗa, e niyi aha, e fiɗiɗi ɗai na war fuŋ n'abai ɗa edi gaini kaɵkar, amma ɗif n'a siŋkiɗi mini hlai ɗa, e hiniŋ karni, ni gaini pinzibani paŋ.

²⁶ Ɗif a hala midini afti na wiiɗi Hititekai, woni ɗa a tika fuŋ n'abai ktai azumai woni, a sini yiki ɓa: Luz. Yiki hanɗa a hina sini fuŋ hanɗa ɵa haa girna.

²⁷ Ɗai na war pinzibani Manase e kiɗi aŋ tiki fuŋ n'abai na Bet-Seyan, gaini fuŋ na ɵimaɗi kai, na Taanak gaini fuŋ na ɵimaɗi kai, na Dor gaini fuŋ na ɵimaɗi kai, na Ibleyam gaini fuŋ na ɵimaɗi kai, na Megido gaini fuŋ na ɵimaɗi kai. Kanaaniyakai haa girna e ɗa midini afti hanɗa.

²⁸ Koo hlai na aliɗi Izrayel e bindi gdaŋai tekeɗeɗi, e kiɗi e birgiɗi edi kai, amma e tikiɗi sda zi bege midiɗi.

²⁹ Pinzibani Efrayim e kiɗi aŋ birgiɗi Kanaaniyakai n'e simni war Gezer ɗa edi kai, nɵa e hini arbaɗi pinzibani Efrayim war Gezer.

³⁰ Pinzibani Zabulon e kiɗi aŋ birgiɗi Kanaaniyakai na war Kitron gaiɗi na warɗi Nahalal edi kai. Kanaaniyakai e hini arbaɗi pinzibani Zabulon, amma e tiki sda zi bege midiɗi.

³¹ Pinzibani Aser e kiɗi aŋ birgiɗi ɗai na war Ako gaiɗi na war Sidon, gaiɗi na war Ahlab, gaiɗi na war Akzib, gaiɗi na war Helba, gaiɗi na war Afik gaiɗi na war Rehob ɗa lai edi kaalai.

³² Pinzibani Aser, e zi fuŋ arbaɗi aliɗi Kanaan n'e ɗa midini afti hanɗa. E kiɗi aŋ birgiɗi edi kai.

³³ Pinzibani Neftali e kiɗi aŋ birgiɗi ɗai na warɗi Bet-Semes gaiɗi na war Bet-Anat ɗa edi kai. Amma e tiki sɗa zi bege midiɗi ɗai na Bet-Semes gaiɗi na Bet-Anat. E simni arbaɗi ɵa.

³⁴ Amoritekai e cikiɗi pinzibani Dan ɗa amai sini huwuŋ, e hiniɗi aŋ niyisi azumai midini hlai na plas ɗa kai.

³⁵ Amoritekai e hini war Har-Heres, war Ayalon, war Salbim lai ɵa ca. Amma, won hlai na pinzibani Yosef e nivi spak li ɗa, e tikiɗi sda zi bege midiɗi.

³⁶ Haga na wiiɗi Amoritekai a tikasi pini sini boŋor na Akrabim piɗi futi na dawai par par, a Sela ɗaw, haa edi duɓaɗi par.