Niyi n'edi 1 - Ɗû na sɗik na wiini Alaw

Simni na war bege na wiiɗi aliɗi Izrayel gaini pli n'edi na war Egipte par Aliɗi Izrayel e bindi aŋ bagakai aha war Egipte

¹ Hanɗa a yikiɗi aliɗi Izrayel n'e hilisi aha war Egipte gaini Yakob, asiya ɗi paŋ gaini pakataini pakataini.

² Ruben, Simeyon, Levi gaini Yuda,

³ Isakar, Zabulon gaini Benyamin,

⁴ Dan, Neftali, Gad gaini Aser lai.

⁵ Pinzibani Yakob e zi paŋ ɗai doogo doogo muguzak. Amma Yosef, ni a na fu aha war Egipte wuzaɗi par.

⁶ Asakal par Yosef a mra, tawalakaini e mri lai; vna ni ɗawwa a vada edi.

⁷ Aliɗi Izrayel e sisiɗi viya, e tûsi viya, e bindi viya midini afti, e bindi gdaŋai lai.

⁸ Asakal par pai ktai n'a sɗa Yosef kai a suma midiɗi Egipte.

⁹ A miɗiɗi wiiɗi ɗaini, tili vokɗi aliɗi Izrayel ɗa a za abai ta, spakɗi a suwumu lai.

¹⁰ Mi piyumu dabarai zamai siɗi kapai e sisiɗi wuzaɗi sek a suwa kai, ɵa kai na ɓa gaw a za li ɗa, aga e diŋgi gaiɗi gawmu, e hutumumu, e niyi edi miɗini aftimu par lai.

¹¹ Ɗai n'Egipte e miliɗi ɗai n'abakai miɗini sda zi gir midiɗi ca ca kapai e ziɗi gir gaini sda zi dewele. Nɵa e rgi fuŋ n'abakai: Pitom gaiɗi Ramses aŋ fuŋ na Faraw a giɗima wazagaini zi simi woni.

¹² Won hlai n'e ɗa riyi girɗi amai ɗa, e sisiɗi wuzaɗi sek, e tûsi a suwa pra, e tiki hlai wuzaɗi sek, ɗai e bindi e hûniɗi aliɗi Izrayel.

¹³ Nɵa ɗai n'Egipte e bindiɗi aliɗi Izrayel aŋ bagakaiɗi e tiki sda na guma midiɗi gaini hiinini haw kai,

¹⁴ e biziɗi hlai arɗi gaini sda zi gir hanɗa: E diiɓi afti, e wii brik, e zi sda zamai zamai n'edi war vowai lai, gaini sda zamai zamai viya lai, hanɗa paŋ a sda zi gir zi bege n'e tikiŋɗi midiɗi gaini hiinini haw kai ɗa.

Faraw a ziɗi gir wiiɗi aliɗi Izrayel

¹⁵ Arbaɗi Hebrekai ɗa, falakai zi pûkû falakai e ɗa sulu, na ktai yikiɗi ɓa: Sifra, na zamai Puwa lai. Faraw a miɗiɗi maini nɵa:

¹⁶ Won hlai n'aga ki pûkûɗi falakaiɗi Hebrekai, ki tili pini ahiyagwi pɗem, na ɓa a wus ɗa, ki fiɗiŋ edi, na ɓa te muni ki hiniti karɗi,

¹⁷ amma falakai zi pûkû falakai hanɗa, e ɗi ɗai n'e hûni Alaw gara, e zi maini na pai n'Egipte a miɗiŋɗi nɵa kai, e hiniɗi aliyagoi na maɵagai ɗa karɗi, e fiɗiɗi kai.

¹⁸ Nɵa pai n'Egipte a yikiɗi a miɗiɗi: Tiki ki zi nɵa buri maɗa, ki hiniɗi aliyagoi na maɵagai karɗi ɗa buri ma ɗa?

¹⁹ Falakai zi pûkû falakai e wiyini seŋ wiini Faraw: Falakaiɗi Hebrekai hanɗa e ɗa maiɗi falakai n'Egipte ɵa kai. Nagai gdaŋai, muni zi pûkû falakai te cosi ta ɗa, nagai e pûkû ya, e pûkû ya.

²⁰ Alaw a ziɗi pɗem wiiɗi falakai zi pûkû falakai, aliɗi Izrayel e bindi viya, e bindi gdaŋai lai.

²¹ Alaw a siɗi ali wiiɗi falakai zi pûkû falakai ɗa buri ɓa e hûniŋ.

²² Nɵa, asakal par Faraw a sa miɗi wiiɗi ɗaini paŋ maini nɵa: Ahi na wus paŋ n'a wa li ki biliŋ agoɗom war ra Nil, amma na muni ki hiniti karɗi.