Nahamiyas 9 - Ɗû na sɗik na wiini Alaw

Aliɗi Izrayel e siɗi tuwurɗi, e hiniŋ edi lai

¹ War mefeŋ n'ag'aŋ caaɓa pi puɗu na wiini tile hanɗa, aliɗi Izrayel paŋ e wi sapa zi tuwi siɗi, e bûbli siɗi arni alogodo, e diŋgi burini tikini sai.

² Izrayel zi wi paŋ e yimi siɗi edi siɗi morkokai par, e hi-miy miɗini tuwur na wiiɗi gaini meefeŋ na wiiɗi tamaiɗi paŋ lai.

³ E ɗiyi amai war balamɗi ca ca, e ŋiɗi maktuɓ na wiini ɗû na wiini EPIƊ-ƊAI, Alaw na wiiɗi haa ler hu; asakal par e himi tuwurɗi edi, e hûrgû azumai wuzani EPIƊ-ƊAI, Alaw na wiiɗi haa ler hu lai.

⁴ Yosva, Bani, Kadmiyel, Savaniya, Bunni, Serebiya, Bani gaini Kenani na Levitekai e ɗiyi amai midini hlai na wiiɗi, e ɗûûli gaini wulaɗi amai sini EPIƊ-ƊAI, Alaw na wiiɗi.

⁵ Asakal par, Yosva, Kadmiyel, Bani, Hasabniya, Serebiya, Hodiya, Sebaniya gaini Petahiya lai na Levitekai e miɗiɗi: Fiki amai! si kol sini EPIƊ-ƊAI, Alaw na wiiki haa hlai n'a vada kai, n'a vada kai. EPIƊ-ƊAI a juva ɓa ɗai e kûli yikuku n'abai n'a suwa ɓiki gaini kol paŋ lai.

Siiwa n'abai na wiini Nahamiyas

⁶ EPIƊ-ƊAI ku tuku, ku tuku ktai pal, ku za hlai n'amai ku tuku; hlai n'a na haa amai gaini wazagai na warni paŋ, yai gaini wazagai na warɗi paŋ; yem-ra n'abai gaini wazagai na warni paŋ tuku. Ku sini suŋfa warni ku tuku, wazagai zi spak n'arbani hlai n'amai a hurga azumai wuzaku.

⁷ Ku vara Abram ku tuku, ku yimaŋsi edi war Ur midini afti na Babilon par ku tuku; ku sini yiki ɓa Abraham, ku tuku.

⁸ Ku talaŋ a na arku ɗikat, ku za bonu gaini, ku zini ha ɓa aga ku sini afti na wiiɗi Kanaaniyakai, na wiiɗi Hititekai, na wiiɗi Amoritekai, na wiiɗi Perizitekai, na wiiɗi Yebuzitekai gaini na wiiɗi Girgazitekai aŋ siŋɗi wiiɗi pinzibani, ku va seŋku amai ta, buri tuku ku jre.

⁹ Tuku ku tala girɗi tamaiyi aha war Egipte, ku ɵina tuwiɗi agoɗom wulani yem-ra na mekele.

¹⁰ Tuku ku za wazagai zi siŋki, gaini zi hiila lai sini Farawon pai n'Egipte, siɗi ɗai zi sda n'ahani paŋ, siɗi ɗai na midini aftini paŋ lai, buri tuku ku sɗa ya ɓa war kûlûni-si na wiiɗi, e siɗiɗi gir wiiɗi tamaiyi, nɵa ku hina yikuku a wa maini na mi tiliŋ girna na nɵa.

¹¹ Ku ɓasa yem-ra n'abai wuzaɗi, e vigi midini hlai na huleŋ, nagai n'e tikisi futi piɗi, ku biɗi agoɗom war yem-ra n'abai maini ahi-fuŋ n'e biliŋ arni yem na hulum nɵa.

¹² Girvudi tuku ku ɵa wuzaɗi gaini ɗugul war duvuk ku ɵa wuzaɗi gaini afu lai war futi n'e hili warɗi.

¹³ Ku niyasi azumai midiɗi huwuŋ Sinaï, amai war hlai n'amai par, ku miɗiɗisi, ku ɗiyiɗi gadai na war futini, gadai zi ɗû na jre, gaini gadai zi ɗû na pɗamai lai.

¹⁴ Ku siŋkiɗi miɗini Sabbatku na sɗik, ku siɗi gadai zi ɗû zamai zamai na war ɗû na wiiku par gaini Musus ɵeŋ na wiiku.

¹⁵ War wiyamai, ku siɗi simi n'amai par, war saiɗi ku siɗi yem sini huwuŋ par, ku miɗiɗi buri e hilisi e tiki afti, na ku yima tuku amai ku ha wala muku buri ku siŋɗi ɗa.

¹⁶ Amma nagai gaiɗi tamaiyi e niyi war kûlûni-si, e zi hiriŋ, e ɵini pini gadai zi ɗû na ku siŋɗi kai.

¹⁷ E diri e ɵini kai, e hini midiɗi a kɵa gaini wazagai zi hiila na ku zaŋ buriɗi kai. E zi hiriŋ war fikiɗi n'amai, e rgi warɗi, buri e wiyi war begeɗi war Egipte. Amma tuku k'Alaw na ku haaza tuwurɗi nagai n'e tûwi suku edi, k'Alaw na pɗem, zi hiinini haw, na ku za hiy gop kai, pɗemku abai gara, ku hiniɗi edi kai.

¹⁸ Koo won hlai n'e yûri ahi ɵe zi kawai, n'e miɗi lai ɓa: Alaw na wiyi n'a kûrɗiyisi edi war Egipte par an na, Won hlai n'e zi maini nɵa ɗa, e zi meefeŋ suku abai gara.

¹⁹ Paŋktai pini yumku n'abai ku hiniɗi edi war basga kai, ɗugul a ɵa wuzaɗi war girvudi, afu war duvuk lai, kapai a za gaglai warɗi futi n'e ɗa hili warɗi.

²⁰ Tuku ku siɗi sezeku na pɗem, kapai e zi ɓraw arbani pɗem gaini meefeŋ, ku siɗi mana aŋ simi, ku siɗi yem aŋ ci lai.

²¹ Buza puɗu, ku tika hangalku siɗi, wala ktai maa a sûwiɗi kai, sapaɗi a ŋirwa kai, eziɗi a hitila kaalai.

²² Ku siɗi paakai zamai gaiɗi ɗai war tiɗi, ku siɗi afti na ɵimaɗi lai. E tiki afti na wiini Sihon pai na Hesbon gaini afti na wiini Og pai na Basan lai.

²³ Ku sisiɗiɗi aliɗi viya, maini meeɵek n'arbani hlai n'amai nɵa, ku kiɗisi midini afti na ku miɗiɗi wiiɗi tamaiɗi buri e hili e tikiŋ aŋ wiiɗi.

²⁴ Aliɗi e niyi a ha warni, e tiki afti ni lai. Ku hiniɗi aŋ rɗi amai midiɗi Kanaaniyakai war fuŋ hanɗa; ku siɗi paakaiɗi gaiɗi ɗai na midini afti ni lai war tiɗi, aŋ zi siɗi maini n'e diri nɵa.

²⁵ Nagai e mili fuŋ n'abakai na gaini ɵaga sini; gaini afti z'alam, e mili dalam na gaini vi gaini wazagai na pinzibani kiini kiini, kalaŋai zi yem; vowai na wiini luwuŋ zi vin, vowai na wiini luwuŋ Olive, gaini luwaŋai zamai zi wi ali zi simi viya lai. E simi e vi, e liki ca ca, e simni war muluk, pini pɗemku n'abai.

²⁶ Amma paŋktai e ɵini muku kai, e fiki amai suku gaini fiki, e bili ɗû na wiiku edi duɓaɗi, e fiɗiɗi ɗai na mini Alaw n'e ɗa gidiɗi buri e wiyisi suku ɗa, e zi meefeŋ suku abai gara.

²⁷ Nɵa ku hiniɗi war tiɗi gawɗi, e ziɗi gir. War mefeŋɗi zi gir e tûwi suku, amai war hlai n'amai par tuku ku ɵina tuwiɗi, pini hiinini haw na warku ku siɗi gaŋgalaŋai n'e kûrɗisi edi war tiɗi gawɗi par.

²⁸ Amma won hlai n'e nivi ɵeɗ agwi li, e wiyi kaa aŋ zi meefeŋ suku ɗaai; tuku ku hiniɗi war tiɗi gawɗi e ziɗi gir viya, e wiyi e tûwi suku pra, tuku war hlai n'amai par ku ɵina tuwiɗi; pini hiinini haw n'aŋ warku ku piliɗi edi azi viya.

²⁹ Ku gidiɗi azi viya buri e wiyisi sini ɗû na wiiku, amma nagai e zi pini agulɗi na gdaŋ; e ɵini pini gadaiku zi ɗû kai, e zi tuwur sini gadaiku na ku siŋɗi na kadai tiɓ ɗif a vaŋ amai kapai a nava suŋfa gaini. E tiki ɵimaɗi tek tek; e hiriŋi hiriŋ e diri e ɵini kai sam.

³⁰ Ku libiɗi maini nɵa buza viya; ku gidiɗi gaini seze na wiiku, gaiɗi ɗaiku na mini Alaw, amma e diri e ɵini kai; nɵa ku siɗi tiɗi ɗai na midini afti zamai zamai;

³¹ Pini hiinini haw n'aŋ warku, ku hiniɗi aŋ vidi edi gamai kai, ku hiniɗi edi kaalai buri tuku k'Alaw na pɗem zi yum.

³² Tiyana Alaw na wiyi, Alaw n'abai zi spak na dawaŋ kai, na ku giɗima bonuku na ku zaŋ gaiyi war jre; ku tala gir n'a na siyi, siɗi paakaiyi, siɗi n'abakaiyi n'e ɵi wuze, siɗi paakaiyi zi ɓaka, siɗi ɗaiyi na mini Alaw, siɗi tamaiyi, siɗi ɗaiku paŋ lai, sini mefeŋ na wiiɗi paakai n'Asiriya par haa girna aŋ wala n'agwi kai

³³ Tuku war wazagai n'a ziyi paŋ ɗa, wiiku a jre, buri ku za siyi war jre, amma tiyi ɗa, mi zi ɗa a meefeŋ.

³⁴ Paakaiyi lai, ɗai n'abakai n'e ɵi wuze lai, paakaiyi zi ɓaka lai, gaiɗi tamaiyi lai, e zi pini ɗû na wiiku kai, e tiki hangalɗi sini gadai zi ɗû kai, sini zaida na ku ziŋɗi azi viya kaalai.

³⁵ Nagai war ŋiɗi zi pai, war der na viya na ku saŋ siɗi midini afti na bruk z’ alam lai na ku kiɗi warni e zi sdaku kai, e hini sdaɗi na maafanai edi kaalai.

³⁶ Tala haw le, girna mi ɗi bagakai midini afti na ku siŋɗi wiiɗi tamaiyi kapai e simi seyem na wiini afti gaini der na pɗamai paŋ lai, amma mi ɗi na mi ɗi bagakaiku koo.

³⁷ Der na viya hanɗa a bunda aŋ wiiɗi paakai na ku miliɗi midiyi burini tuwuryi; e ŋi midiyi, tiyi gaini faraiyi maini n'e diri nɵa; tiyana mi ɗi war gir n'abai.