Biblia Todo Logo
Bìoball air-loidhne

- Sanasan -

Nahamiyas 6 - Ɗû na sɗik na wiini Alaw


Gawni Nahamiyas e firiyi e zi seŋ pra

1 Won hlai n'e kiini labar wiini Sanbalat gaini Tobiya gaini Gesem n'Arap ɗa gaiɗi gawyi na zamai paŋ ɓa: Ɵagai te rga amai ya, baŋa a hina arɗi kir kai. War mefeŋ ni ɗa, mu pa tapra na mini hlai kai ba.

2 Sanbalat gaini Gesem e ɵinisi sa aŋ miɗiŋa: Halasi, mu zumu diŋgi zi kitini mi war Kefirim azumai war huduk na Ono. E rgi warɗi buri e ziŋa meefeŋ.

3 Mu ɵiniɗi ɗai siɗi aŋ miɗiɗi: Sda n'aŋ ta ɗa a sda n'abai; mu kiɗa mu halaɗi siki kai buri sda aga a ɗiya.”

4 E ɵinisi ɵeŋ ni dama azi puɗu; mu wiyiɗi kaa ɗa a seŋ ni ɵa.

5 Azi n'ag'aŋ ɵim pini seŋni pra, Sanbalat a ɵinasi ɗifni sa gaiɗi letre na papɗak tini ɗaw.

6 E ɗû warɗi maini nɵa: “ɗai e ɗa miɗiŋ, Gasmus a na muɗa lai ɓa: Tuku gaiɗi Yudiyakai hiini aŋ warki buri ki fiki amai siyi; nɵa ku rgiti ɵagai amai na ɓa kapai ku sumna aŋ pai na wiiɗi.

7 Maa ku miliɗi ɗai na mini Alaw aha war Yeruzalem ca ca aŋ miɗi edi muduku ɓa, tuku ku pai na war Yuda; aga mu kiini labar hanɗa wiini pai. Nɵa ku halasi tiyana, mu tulumu seŋ ni piɗi marmu.

8 Mu wiyini seŋ wiini Sanbalat ɓa: Seŋ na ku muɗaŋ hanɗa a na ɵa kai, ku ɵaŋ na ku tuku gaini muduku.

9 Nagai paŋ e firiyi tiɓ ɓa e miliyi hunai piyi; e hiini ɓa sda n'aŋ tiyi aga a kɵa a za kir kai. EPIƊ-ƊAI ku saŋa gdaŋ war sda hanɗa.

10 Mu hala ahani Semaya n'ahini Delaya n'ahini Mehetawel, buri a nava futi aŋ halasi sa kai. A muɗaŋa: Duŋgumusi amlai war dalam na wiini Alaw, amlai arba, dugumu mini hlai amai duk buri aga e hilisi aŋ fuɗuku, e fuɗuku na duvuk.

11 Mu wiyini seŋ: Ɗif na maya ta nɵa mu pra edi maɵa maɵa ɗa, ɗif na maya ta nɵa a niya li amlai warni tempel ɗa aga a mra kai ɗe, zaw kai mu niya niyi amlai kai.

12 Nɵa mu sɗa fakat ɓa a ɵinaŋsi ɗa a Alaw kai. Na ɓa a muɗa seŋ na wuze buriya a zaŋ na buri ɓa Sanbalat gaini Tobiya e sini farai.

13 E sini farai tiɓ buri maɗa? Kapai e miliŋa hunai pa, kapai mu za maini n'a muɗaŋa nɵa, kapai mu za tuwur, nɵa aga e nivi futi aŋ miɗi seŋ na meefeŋ paŋ mada, kapai siyer a yimaŋa.

14 Alaw wiya, ku hina muduku a kɵa buri sda na wiini Tobiya gaini Sanbalat, pra buriɗi Nowadiya muni na mini Alaw gaiɗi ɗai na mini Alaw zamai zamai n'e firiyi e miliŋa hunai pa lai.

15 Rgiɗi ɵagai a vada war mefeŋ caɓa na wiini tile na yikini ɓa Elul, sdaɗi a za paŋ mefeŋ doogo doogo ɵim pi sulu.

16 Won hlai na gawyi paŋ e ɵini hanɗa, afti na ɵimayi paŋ kafa a huna, e tiki siyer, e siɗi fakat lai ɓa sda hanɗa a za pini diri na wiini Alaw na wiyi.

17 War mefeŋ hanɗa n'abakai zi spak na Yuda e ɗûni wiini Tobiya viya, ni a wiyiɗi seŋ pini lai.

18 Buri ɗai viya na Yuda par miɗi a na fu gaini pini wala zi hi mi; buri ni a suwulni Sekaniya n'ahini Arah, pra ahini na Yehohan ɗa a tikiti ahini Mesulam n'ahini Berekiya aŋ munini.

19 Nagai e kûlûŋ maa wuzani ara, e kiini seŋ na ma par lai. Tobiya a ɗoŋasi viya aŋ mulaŋa hunai pa.

La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964

Bible Society of Cameroon
Lean sinn:



Sanasan