Biblia Todo Logo
Bìoball air-loidhne

- Sanasan -

Nahamiyas 5 - Ɗû na sɗik na wiini Alaw


Nahamiyas a ɗiya sdakai na maafanai n'a na za arbaɗi ɗai

1 Mefeŋ ktai ɗai na maɵagai gaiɗi na falakai na Izrayel e tuwi buri sdakai na maafanai na tawalakaiɗi na Yudiyakai e ɗa ziŋ ɗa.

2 Zamai e miɗi: Aliyi na maɵagai gaiɗi na falakai gaiyi tiyi lai, mi zi viya ta. Mi diri algama aŋ simi kapai mi simni karyi.

3 Zamai e miɗi: Vowaiyi, zi luwuŋ zi vin, gaini dalamyi lai mi zigiŋ edi kapai mi nivi algama war mefeŋ zi wiyamai.

4 Zamai pra e miɗi: Tiyi mi tifisi farai gaini tifi miɗini vowaiyi, gaini vowaiyi zi luwuŋ zi vin kapai mi virgi tar na wiini pai gaini.

5 Paŋktai neŋ siyi maiɗi tawalakaiyi nɵa, aliyi e ɗa maiɗi aliɗi nagai nɵa lai; a dewele ɓa mi siɗi aliyi na maɵagai gaiɗi na falakai lai edi aŋ bege; aliyi na falakai zamai e ɗa war bege ya; mi tili gaini aryi, mi siɗi wala ktai na mi ziŋ ɗa kai. Vowaiyi gaini vowaiyi zi luwuŋ zi vin a bunda wiiɗi ɗai zamai.

6 Hlai na mu ɵina seŋ na maini hanɗa nɵa, gaini marava hanɗa lai, mu hiy abai gara.

7 Hiini ktai a cosi mada buri mu miɗiɗi wiiɗi ɗai n'abakai zi spak gaiɗi n'abakai n'e ɵi wuze; mu miɗiɗi maini nɵa: Ki tiki midiɗi marki n'a guma n'abai, asakal par mu yikiɗi war diŋgi n'abai.

8 Mu miɗiɗi: Tumu gaini mudumu dama mu wuruɗumusi tawalakaimu na Yudiyakai, n'e sikiliɗi edi aŋ bege tiɗi ɗai zamai zamai gaini gir na kaɓa, kaɓa; amma, tiki tiyana ki sikiliɗi tawalakaiki edi arbaki tiki dama koo. E bi miɗi hiyak e siɗi wala n'e miɗiŋ ɗa kai.

9 Mu miɗiɗi pra: wala na ki ziŋ hanɗa a futini kai, kadai tiɓ ki piyi war hunai na pini Alaw na wiimu kapai ki tiki siyer arbaɗi pinzibaɗi ɗai na gawmu kai nɵa kai ɗi?

10 Tiyana ɗa, ta lai, tiki tawalakaya lai, gaiki tiki ɗaiŋa zi sda lai; tumu mu tufuɗumu farai gaini algama ya, a pɗem ɓa mu hunuɗumu tumuŋ hanɗa mak.

11 Girna tar wiyiɗi vowaiɗi gaini vowaiɗi zi luwuŋ zi vin, zi luwuŋ Olive, gaini dalamɗi lai, gaini farai, algama, vin na hehe gaini emel na ki tifiŋɗi paŋ, ki zilbi yem pini kai.

12 E miɗi: tiyi aga mi hiniŋɗi, aga mi zilbi wala ktai tiki kir kai, aga mi zi maini na ku muɗaŋ ɗa nɵa. Mu yikiɗisi paakai zi ɓaka ɗai e hi wala miɗi wuzaɗi ɓa aga e zi maini na e miɗiŋ ɗa nɵa.

13 Asakal par mu gulda ɵubu na wiini sapaŋa edi, mu guvraŋ, mu muɗa: Alaw aga a guvra asiya asiya ɗi paŋ n'a ɗiya midini seŋni kai edi war dalamni par, sini wazagaini par lai maini nɵa, a hina blaŋ wala ktai tini kai. Ɗai paŋ e miɗi: Nkam a za maini nɵa, e si kol sini EPIƊ-ƊAI, e zi pini wala n'e miɗi miɗini lai.

14 Haa sin mefeŋ na pai a tikaŋa aŋ Lawaŋ midini afti na Yuda par, sini buza na caaɓa na Artaserkises aŋ warɗi pai, haa girna, buza doogo pi sulu, ta kaai; tawalakaya kaai mi simi wala zi Lawaŋ kai.

15 Wuza ta par, Lawaŋai e kirpiɗi ɗai, e mili wazagai zi simi gaini ci lai tiɗi par; pra e ziɗi dewele aŋ virgi arzaŋ sikel doogo-doogo puɗu; ɗai na wiiɗi Lawaŋai zi sda lai e ŋi midiɗi; amma ta ɗa mu za maini hanɗa ɵa kai buri mu huna Alaw.

16 Pra mu ca ca edi mini sdaɗi ɵagai hanɗa ta, mu wura vowai buutu kai, mara n'e ɗi gaya war sda won na e wûri hlai ɵa kaalai.

17 Paŋktai, Yudiyakai gaiɗi n'abakai n'e ɵi wuze n'e simi sa par e ɗa paŋ ɗai miya gaini doogo-doogo ɵim; nagai n'e hilisi edi par midini afti na ɵimayi gobi maa pɵaɗi arɗi kai.

18 Yuvai paŋ e fiɗi gari ktai, adumai na gaini futini ɵaara, gaini wazagai zi baada lai. Mefeŋ a za li paŋ e kiŋasi vin zi ci viya, gaini hanɗa paŋ ɗa mu zilba wala zi Lawaŋ kai, buri gumani sda paŋ ɗa a na fu midiɗi ɗai hanɗa.

19 Alaw, hina muduku a kɵa gaini na pɗamai na mu zaŋ buriɗi ɗai hanɗa, za yumku sa.

La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964

Bible Society of Cameroon
Lean sinn:



Sanasan