Nahamiyas 3 - Ɗû na sɗik na wiini Alaw

Yudiyakai e ziziniti ɵagai na Yeruzalem amai pra

¹ Eliyasib, pai zi ɓaka n'abai, gaiɗi marni na paakai zi ɓaka lai e rgi mini magalani adumai; e siŋ wiini Alaw, e pi porte na mini lai. Asakal par, e rgiti ɵagai sini poriyo na Meya par haa sini poriyo na wiini Hananiyel ta.

² Ɗai na Yeriko gaini Zakkur n'ahini Imri e zi sda ɵimaɗi lai;

³ Ɗai na Senaa par e rgi mini Magalani Hilif, nagai e pi kadre, e pi porte mini gaini kawakai na gdaŋai gaini kawai zi ɵi mini lai.

⁴ Meremot n'ahini Uriya n'ahini Hakos a za sda ɵimaɗi par, gaini Mesullam n'ahini Berekiya, n'ahini Mekezabel, Sadok n'ahini Baana a za sda ɵimaɗi par lai.

⁵ Ɗai na Tekwa e zi sda ɵimaɗi par lai; amma n'abakai zi spak e diri e ɵini piɗi n'abakai zi sda kai.

⁶ Yoyada n'ahini Paseya gaini Mesullam n'ahini Besodiya e zi sda mini magala na wiini Yesana; e pi kadre, e pi porte na mini, gaini kawakai na gdaŋai; e zizini kawai n'e ɵi mini gaini lai e ɗi nagai.

⁷ Melatiya na Gabawon gaini Yadan na Meronot gaiɗi ɗai zamai na Gabawon, na Mispa lai e zi sda ɵimani hlai zi simni na wiini Lawaŋ war piɗi futi na koskoi par na wiini ra Öfrata.

⁸ Ɵimaɗi par Uzziyel n'ahini Harhaya, ɗif zi yûri or gaini Hananiya ɗif zi zi itir e zi sda ɵimaɗi haa sini ɵaga na bruk ɗa ta, e wiyi wiiɗi aha.

⁹ Refaya n'ahini Hur, abai na midini gal ktai na wiiɗi Yeruzalem a na za sda ɵimaɗi lai.

¹⁰ Ɵimaɗi par Yedaya n'ahini Harumaf a za sda wuzani dalamni tar; ɵimaɗi par ɗa a Hatus n'ahini Hasabniya a za sda lai.

¹¹ Malkiya n'ahini Harim gaini Hasub n'ahini Pahat-Mowab e zi sda war hlai zamai pra, na poriyo zi hiliyi kawakai t'aŋ woni, e ziziniti poriyo hanɗa lai.

¹² Ɵimaɗi par Sallum, n'ahini Halohes, abai midini galni afti ktai na Yeruzalem n'a hina gaiɗi alini na falakai e zi sda.

¹³ Hanun gaiɗi ɗai na Zanuwa e zi sda mini magala na wiini hlai na huduk. E rgiŋ amai, e pi tapra mini gaini kawakai na gdaŋai, e zizini kawakai n'e ɵi mini gaini lai e ɗi nagai, pra e rgiti ɵagai ɗa haa kil dubu ɗaw haa sini magala na wiini zilgit ta.

¹⁴ Malkiya n'ahini Rekab, abaini galni hlai na Bet-Kerem a rga mini magala na wiini Zilgit ɗa a ni, a pa porte na mini gaini kawai na gdaŋai, a zizina kawai n'e ɵi mini gaini lai.

¹⁵ Sallum n'ahini Kol-Hoze, abaini galni afti na Mispa a za sda mini magala na wiini yem zi liiwi. A rgaŋ amai, a pa balak miɗini, a pa tapra na mini gaini kawakai na gdaŋai, a zizina kawakai n'e ɵi mini gaini lai; pra a ziziniti ɵagai ɵimaɗi avai na Silowe na te na arbani zardeŋ na wiini pai gaini hlai n'e hi amai sini aŋ niya aha zar fuŋ n'abai na wiini David.

¹⁶ E di wuza sek agwi; Nahamiyas n'ahini Azbuk, abaini galni afti na Bet-sur a za sda haa sini hlai zi pi ɗai na wiini David, haa siɗi avai na ɗai e ɓilti gaini tiɗi, pra haa sini kaŋ na wiiɗi ɗai n'e giɗimi pai ta.

¹⁷ Ɵimaɗi par Levitekai e zi sda. Rehum n'ahini Bani, Hasabiya, n'abaini galni afti na Keila, amma Hasabiya a za war yiki na wiini aftini.

¹⁸ Marɗi zamai e zi sda asakalɗi par; Binnuwi n'ahini Duani par, tawalakaini e zi sda: Binnuwi ahini Henadad, n'abaini galni afti na Keila n'a hina.

¹⁹ Ɵimaɗi par Ezer n'ahini Yosva, abaini hlai na Mispa a za sda won hlai zamai pra wuzani hlai n'e hi amai won na miɗi dilimi zi giɗimi wazagai zi gaw par haa sini koŋni ɵaga ktai ta.

²⁰ Ɵimaɗi par ɗa a Baruk n'ahini Zabbai a za sda gdaŋ war hlai zamai pra, sini koŋni ɵaga par haa war mini magala na wiini dalamni Eliyasib pai zi ɓaka ta.

²¹ Ɵimaɗi par, Meremot n'ahini Uriya, n'ahini Hakos a za sda war hlai zamai pra, sini magala par haa sini hlai na dalamni Eliyasib a ɗiya woni ta.

²² Ɵimaɗi par paakai zi ɓaka n'e ɗi war fuŋ na ɵimaɗi Yeruzalem par e hilisi e zi sda.

²³ Ɵimaɗi par Benyamin gaini Hasub e zi sda wuzani dalamɗi tartar; ɵimaɗi par Azariya n'ahini Maaseya, n'ahini Ananiyas a za sda ɵimani dalamni tar.

²⁴ Ɵimaɗi par Binnuwi n'ahini Henadad a za sda won hlai zamai pra; sini dalamni Azariya par haa sini koŋni hlai ktai ta, woni par haa sini koŋɗi ɵagai ɗa ta.

²⁵ Asakal par Palal n'ahini Uzai a za sda wuzani koŋni ɵagai gaiɗi poriyo n'amai na te suwasi dalamni pai edi haa gobi edi min pakatai na wasi tiɗi edi midini dalamni pai, n'a na ɵimaɗi pakatai na wiiɗi daŋgai; ɵimaɗi par Pedaya n'ahini Paros.

²⁶ Gaiɗi ɗai n'e zi sda n'agogoi agogoi war tempel n'e simni war gal hlai na Ofel e zi hanɗa wuzani magala zi yem n'a na piɗi futi na dawai par gaini poriyo na te suwasi ta.

²⁷ Ɵimaɗi par ɗai na Tekwa e zi sda won gal zamai, pra sini hlai n'a na wuzaɗi poriyo n'amai na te suwasi edi haa siɗi ɵagai na siɗi Ofel ta.

²⁸ Sini magala na wiini plasai par, paakai zi ɓaka e zi sda asiya ɗi paŋ wuzani dalamni tartar.

²⁹ Ɵimaɗi par Sadok n'ahini Imer a za sda wuzani dalamni tar, ɵimaɗi par Semaya n'ahini Sekaniya, ɗif zi giɗimi mini magala na piɗi futi na dawai par a za sda.

³⁰ Ɵimaɗi par Hananiya n'ahini Selemiya gaini Hanun n'ahini Salaf n'ag'aŋ ɵaara e zi sda war hlai zamai pra. Ɵimaɗi par Mesulam n'ahini Berekiya a za sda wuzani hlai n'a sumna woni.

³¹ Ɵimaɗi par, Malkiya ɗif zi hiliyi kawakai a za sda haa sini dalamɗi nagai n'e zi sda n'agogoi war tempel gaiɗi ɗai zi sakala n'e ɗa wuzani mini magala na Mifkad haa siɗi dilimi zi gɗam na war koŋɗi ɵagai ta.

³² Arbaɗi dilimi zi gɗam na war koŋɗi ɵagai gaini magala na wiini adumai, ɗai zi hiliyi kawakai gaiɗi ɗai zi sakala e zi sda woni.

Gawɗi Yudiyakai e piyi futi aŋ ɗili sda

³³ Won hlai na Sanbalat a ɵina ɓa mi ɗa rgiti ɵagai ɗa, a faka gaini hiy n'abai, agulni a lumaŋ a ziyi yewere;

³⁴ wuzaɗi tawalakaini gaiɗi askarai na Samariya a muɗa maini nɵa: Yudiyakai na nafaɗi kai hanɗa, e zi na ɗa a maɗa? Mu hunuɗumu ɵa mak aŋ hili wuzaɗi gaini sda ɵa! Kapai e wiyi pini ɓaka wai pra zaw? Kapai e vidi sda girna vat zaw? Kapai e zi sda na gaini ali-fuŋ na gaini yi gaini n'e vûrgûŋsi azumai par pini afti na zaw?

³⁵ Tobiya na war pinzibani Ammon a na fu ɵimaɗi zaw a muɗa lai ɓa: Hiniɗi e rgi wiiɗi le; na ɓa barka ceŋ-ceŋ a pra amai midiɗi li aga te ho azumai kai ɗe!

³⁶ Alaw na wiyi, tala yewere n'e ɗa zin siyi haw le; wiyiɗi yewereɗi midiɗi, ɵiriɗi edi aŋ bege midini afti zamai; hiniɗi ɗai e virmi wazagaiɗi lai.

³⁷ Ku hiniɗi meefeŋɗi kai, tuwurɗi lai a nava girdi n'edi wuzani arku par kai, buri e tirkiɗi nagai n'e ɗa rgiti ɵagai.

³⁸ Nɵa tiyi mi rgiti ɵagai, te rga haa amai arba ta, firyiɗi ɗai a va amai aŋ zi sda hanɗa.