Mika 7 - Ɗû na sɗik na wiini Alaw

Ɵini hama na wiini ɗif na min Alaw

¹ Haw gara buriya buri mu tala maini ɗif na rawa ali luwuŋ war hlaini zi hiɗi nɵa, a hala buri a rawa alini, amma a nava wala tini buri a sumaŋ kai. Ali luwuŋ Fige n'a naya avut ɗa mu nava ktai maa kai.

² Ɗif na jre-ɗikat a hina midini afti kai, ɗif na jre-ɗikat a hina arbaɗi ɗai kir kai. Paŋ e ɗa riɓti buri emi fel edi, ɗif paŋ a gaŋa azaw wuzani maini.

³ Tiɗi a hitra zini meefeŋ ta. Kapai e zi pɗem ɗa, Yerima gaini pai zi sariya e piyi vrak haw, Ɗif n'abai a siŋka meelewni edi, hiiniɗi paŋ a tapa ktai.

⁴ Ɗif na pɗem arbaɗi a tala maini sari nɵa, Ɗif na jre-ɗikat, marya ɗa a hedek. Mefeŋku zi gir a ŋasi gobi, aga ki tiki siyer tiyana par.

⁵ Ki yimi pin marmai kai, ki sitini agulku wiini marmaiku kai. Wuzaɗi na, na te fana amlai didikku, ku giɗima muku.

⁶ Buri ahi a tirka api ɓa tatala, Ahi na muni te faka amai siɗi emiɗi, Drai te faka amai siɗi suwulɗi. Ɗif paŋ, gawni e ɗi ɗai n'ahani dama.

⁷ Buriya ta, aga mu mula ara sin EPIƊ-ƊAI aga mu tika hiini na wiya miɗini Alaw zi kûri, Alawŋa aga a ɵina wula.

Biyi-na-pin-ɵeɗ gaini siiwa na wiiɗi ɗai

⁸ Tuku gawŋa, ku riya pa kai, na ɓa mu kɵa azumai tekeɗeɗi, aga mu faka amai, na ɓa mu sumna war gegeŋ, EPIƊ-ƊAI a gaglai na wiya.

⁹ Aga mu luba hiy na wiini EPIƊ-ƊAI buri mu za tuwur sini ta, haa ni dama a muɗa edi mada. Aga a kana war gaglai, aga mu tala sdani na jre-ɗikat.

¹⁰ Gawŋa arɗi aga tala, aga te tika siyer, na na te muɗaŋa ɓa: EPIƊ-ƊAI Alaw na wiiku aŋ wata ɗa? Aga mu firiya won hlai na mu talaŋ. Tiyana na aga te kirpa azumai pini eziɗi ɗai, maini dodoɓo na warɗi futi nɵa.

¹¹ Mefeŋ n'aga e rgi ɵagaku warni a cosi ya, war mefeŋ ni aga e jûgû hagaku edi gaigai.

¹² War mefeŋ ni aga e hilisi suku war Asiriya gaini fuŋ n'Egipte par, war Egipte par haa sin ra Öfrata, Sin yem-ra n'abai ktai par haa sin na zamai ta, Siɗi huwuŋ ktai par haa siɗi na zamai lai.

¹³ Afti aga a bunda edi aŋ basga buriɗi ɗai na woni, buri sdadi na meefeŋ.

¹⁴ Sa simi wiiɗi ɗaiku gaiɗi caaɓarku, Fara na war bulumku, n'a sumna edi kiini arbani huwaŋai, arbani vowai zi luwuŋ, hinan a suma war Basan gaiɗi Galaad, maini war mefeŋ n'avut par nɵa.

¹⁵ Aga mu siŋkuku wazagai zi siŋki, maini war mefeŋ na ku niyasi a ha midini afti n'Egipte par nɵa.

¹⁶ Pinziba na zamai paŋ aga e tiliŋ, aga e dûgû gaini siyer, gaini spakɗi paŋ tekeɗeɗi, miɗi aga a dugo, ɵimaɗi aga a kitiŋa.

¹⁷ Nagai aga e hiŋgi alogodo maini wala meefeŋ nɵa, maini wazagai zi hidili na midiɗi yai nɵa. Aga e niyisi edi won hlaiɗi zi ŋoyai par gaini hunai n'abai, aŋ hilisi sini EPIƊ-ƊAI Alaw na wiimu, hunai n'amai aga te yimiɗi, aga e hûni wuzaku.

¹⁸ Alaw, na maiku tuku nɵa asiya ɗa? N'a sa ni burini tuwur, na arni miɗini hi n'amai midini gadai, na wiiɗi nagai n'e hini arbaɗi ɗaiku? A za suwar haa kai, amma a firiya a za ɗa yum.

¹⁹ Ni aga a hiina haw burimu pra, aga a mula meefeŋmu azumai pin ezini. Aga ku poka tuwurɗi paŋ, war yem-ra n'abai na huduk.

²⁰ Tuku aga ku za pɗem sin Yakob, gaini pɗemku na sin Abraham. Hanɗa a wala na ku haŋ muku siɗi tamayi, war mefeŋ n'avut par.