Mika 4 - Ɗû na sɗik na wiini Alaw

Yeruzalem kapital na wiini ɵeɗ

¹ Wuzamu sek mefeŋ ktai ɗa, huwuŋ na tempel na wiini EPIƊ-ƊAI aŋ midiɗi ɗa, aga te za aŋ huwuŋ n'amai midini huwaŋai paŋ. Aga te suwa boŋorai amai paŋ lai. Pinzibaɗi ɗai paŋ aga e tipisi midiɗi sek.

² Pinzibaɗi ɗai viya aga e hili woni, aga e miɗi hilisi, niyumu amai midiɗi huwuŋ na wiini EPIƊ-ƊAI amai warni tempel na wiini Alaw na wiini Yakob, Ni aga a hitirumu futini, aga mu piyumu war futini n'agogoi. Buri hitrai aga a halasi a Siyon par, seŋ na wiini EPIƊ-ƊAI ɗa a Yeruzalem par lai.

³ Ni aga a ziti sariya arbaɗi ɗai viya, Aga a tika arbaɗi ɗai zi spak azumai, koo edi gaigai par tekeɗeɗi. Gaini kaɵkar na wiiɗi aga e giɵi hidik, gaini kawakai na wiiɗi, aga e zizini maharam. Pinziba n'aga a rɗa kaɵkar midini pinziba na zamai aŋ kir kai, ɗif aga a hitra sini mini hatam kir kaalai.

⁴ Aga e simni, ɗif paŋ azumai pin luwuŋ zi vin gaini luvuŋ olive na wiini, ktai n'aga a tûrliɗi aŋ kai. Buri EPIƊ-ƊAI zi spak paŋ a muɗa hanɗa ya.

⁵ Buri ɓa ɗai paŋ aga e hili war yikini Alaw na wiiɗi, amma tumu aga mu hulumu war yikini EPIƊ-ƊAI Alaw na wiimu haa hlai n'a vada kai.

EPIƊ-ƊAI a pai midiɗi Yeruzalem

⁶ War mefeŋ hanɗa, aga mu tipiɗi, nagai na dilakai, aga mi diŋgiɗisi amai, nagai n'e miliɗi edi midini afti zamai, nagai na mu ziɗi gir gara, a muɗaŋ a EPIƊ-ƊAI.

⁷ Piɗi ɗai na dilakai n'a hina, aga mu ziɗi aŋ ɗai n aga e hini, nagai n'e miliɗi edi aŋ bege, aga mu bindiɗi aŋ pinziba zi spak. EPIƊ-ƊAI aga a sumna midiɗi aŋ pai amai midiɗi huwuŋ Siyon par, tiyana par, haa hlai na vada kai.

⁸ Tuku ɵagai zi fara, na wiiɗi ahiɗi Siyon, paiku n'avut aga te waisi suku, pai aga te waisi tiɗi ahiɗi Yeruzalem pra.

Gir gaini pli n'edi na wiiɗi Yeruzalem

⁹ Tuku ku ɗuula tiyana buri maɗa? Pai a na ahaku kir kai ɗi? Ɗif na suku gadai a ba edi ta ɗi? Kapai ŋiba a yimuku, maiɗi muni na pûkû a ziti nɵa ɗa?

¹⁰ Ahiɗi Siyon nuuma, maiɗi muni na te poka nɵa, buri ɓa tiyana tuku aga ku yima edi warni fuŋ n'abai ɗa par, aga ku sumna edi war vowai, aga ku hala haa war Babilon. Woni, aga ku nava pli n'edi, woni, EPIƊ-ƊAI aga a bundukusi tiɗi gawku par.

¹¹ Tiyana ɗai viya e tipisi muduku, E miɗi: te bunda hihir wiiɗi, e miɗi: tulumu ɓilki-n'edi na wiiɗi Siyon.

¹² Amma nagai e siɗi hiini na wiini EPIƊ-ƊAI kai, e siɗi wala n'a hiinaŋ warni kaalai: a tipiɗi amai maini hahai na war vowai nɵa.

¹³ Ahiɗi Siyon, faka amai, giɵa wai ɗa azumai pini azuku, aga mu siki miyok zi kawai, Mu zuku tetrek n'azuku gaini kawai zi kiya. Aga ku siriɗi ɗai viya edi, aga ku sa wazagaiɗi na ku mulaŋsi tiɗi par wiini EPIƊ-ƊAI faraiɗi wiini ni na ŋiti duniya gaini hlaiɗi paŋ lai.

¹⁴ Tiyana ahi zi gaw ɓasa wala suku su su, ɗai e gunumu amlai gun. Gaini amaraŋa, e ɵiɓi pai zi sariya na wiiɗi Izrayel sin galaini.