Matewus 9 - Ɗû na sɗik na wiini Alaw

Yesu a zuula ɗif na galni gaini mri su

¹ A niya warni hulum a halasi anene kata, a halasi warni fuŋ n'abai.

² Nɵa, e kinisi ɗif na galni gaini mri su, gaini fini miɗini walani zi feŋ waŋ. Won hlai na Yesu a tala yimiɗi a muɗa sini ni na gaini mri ɓa: pa arku ahiya, tuwurku mu hunuŋku li.

³ Zamai arbaɗi ɗaini zi ɗû wazagai e miɗi gaini warɗi ɓa: ɗif hanɗa a miisa na ɗa a Alaw.

⁴ Hlai na Yesu a siɗa hiiniɗi a muɗa: Ki hiini wala na meefeŋ nɵa warɗi agulki buri maɗa?

⁵ N'a na gop ɗa a na wata ɗa aŋ muɗa: Tuwurku a hunuku li ɗa, zaw aŋ muɗa faka amai hala ɗi?

⁶ Amma kapai ki siɗi ɓa ahini ɗif spakni a na midiɗi yai buri a hina tuwur. Nɵa a muɗa sini ɗif na galni gaini mri su: faka amai tika walaku zi feŋ, hala aha.

⁷ Ɗif a faka amai a hala aha.

⁸ Won hlai na firiɗi ɗai e tili hanɗa hunai n'abai te yimiɗi, e kûli Alaw n'a sa spak na maini hanɗa nɵa wiiɗi ɗai murɗakai.

Yesu a yika Matewus

⁹ Won hlai na Yesu a hala wuzani sek agwi, a tala ɗif ktai yikini Matewus azumai mini bro zi tar dam. A miɗini: tapasi pa, Matewus a faka amai, a tapa pini lai.

¹⁰ Nɵa, won hlai na Yesu a na suma aha warni dalamni Matewus ɗa, ɗai zi tiri kosko viya gaiɗi ɗai na tuwarai lai, e hilisi e simni azumai gaini Yesu gaiɗi ɗaini zi hitri.

¹¹ Won hlai n'e tili hanɗa, Farisekai e miɗiɗi wiiɗi ɗaini zi hitri: Api zi hitri na wiiki, a suma gaiɗi ɗai zi tiri kosko gaiɗi ɗai na tuwarai lai buri maɗa?

¹² Amma hlai na Yesu a ɵina hanɗa a muɗa: Ɗai n'e ɗa nga e piyi doktor kai, sai ɗai zi veglek.

¹³ Hili, ki hitri aŋ siɗi ezini seŋ n'a muɗa ɓa: mu dara ɗa a yum, mu dara ɓaka kai. Buri mu halasi aŋ yikiɗi na jre ɗikat kai, amma na tuwarai.

Zilbi na miɗini tikini sai

¹⁴ Won hlai ni ɗai zi hitri na wiini Yohana e hilisi sini e zilbiŋ e miɗi: tiyi gaiɗi Farisekai mi tiki sai kûreɗ-kûreɗ, amma ɗai zi hitri na wiiku e tiki sai kai ɗa buri maɗa?

¹⁵ Yesu a miɗiɗi: Marmakaini Epiɗi drai e kiɗi aŋ kwimi won hlai n'Epiɗi drai aŋ gaiɗi ɗi? Amma mefeŋ aga a gizi, won hlai n'Epiɗi drai aga a yima edi arbaɗi par, won hlai ni ɗa aga e tiki sai.

¹⁶ Ɗif n'a ziga sapa n'agwi na hehe arni sapa na wel aŋ kai, buri sapa n'agwi na hehe a yima sapa na wel ɗa edi pini, ɓisini a bunda a suwa.

¹⁷ E yûri vin na hehe warni kenekene na wel kaalai, ɵa kai ɗa, kenekene a naɓa, vin ɗa a ma edi, kenekene ɗa a ɓulka edi lai. Vin na hehe ɗa, e yûriŋ warni kenekene na hehe lai, nɵa gaini sulini paŋ a ɓulka kai.

Ahiyagwi na Yesu a ɵiyiti amai war mri par gaiɗi muni na te tetema sapani Yesu

¹⁸ Won hlai n'a na miɗiɗi seŋ hanɗa, paini sinagogne ktai a halasi a hurga azumai wuzani a muɗa: Ahiya te mrasi tiyana tiyana, amma ku tikiti tuku midiɗi kapai te sumna karɗi.

¹⁹ Yesu a faka amai a tapa pini gaiɗi ɗaini zi hitri.

²⁰ Muni ktai na fel a na ka gaiɗi a za buza doogo pi sulu, te halasi sini duɓani par te tetema mini sapani.

²¹ Buri te muɗa gaini warɗi ɓa: na ɓa mu tika na ta sini mini sapani ta ɗa, aga mu zuula.

²² Yesu a bunda arni duɓani, a tiliti a muɗa: Ahiyagwi yimiti agulku, yimiku a kuruku li. Muni te zuula war hlai ni tizaw tar.

²³ Won hlai na Yesu a cosi aha war dalamni paini sinagogne ɗa, won hlai n'a tiliɗi ɗai n'e yibi faana gaini firiɗi ɗai n'e ɗa sûûri ɗa lai;

²⁴ A miɗiɗi: Niyi anene, buri ahiyagwi te mra kai, te kala ɗa a weseŋ, nagai e riyi pini gara.

²⁵ Won hlai n'a birgiɗisi firiɗi ɗai edi li, a yimiti ahiyagwi tini, ahiyagwi te faka amai.

²⁶ Labar hanɗa a wa edi midini afti ni paŋ.

Arɗi ɗai na malvanai sulu a mala edi

²⁷ Won hlai na Yesu a na hala wuzani sek, ɗai na malvanai sulu e tiki futi pini, e ɗûûli e miɗi: hiina haw buriyi, tuku ahini David.

²⁸ Won hlai n'a niya aha warni dalam ya, na malvanai e hilisi sini. Yesu a miɗiɗi: ki yimi ɓa mu kiɗa mu za hanɗa ya ɗi? E wiyini seŋ e miɗi: Nkam, Epiɗ-ɗai.

²⁹ Nɵa a tetema arɗi a muɗa: A za siki pini yimi na wiiki.

³⁰ Arɗi a mala edi, Yesu a gidiɗi gdaŋ a muɗa: Ki zi hangal kapai ɗif a sɗa hanɗa kai.

³¹ Amma e niyi anene gaini niyi kai, e tiki piɗi aŋ miɗi labar edi miɗini, midini afti hanɗa paŋ.

Ɗif na numul na ksalai aŋ miɗini

³² Won hlai n'e niyisi anene aŋ hili, e kinisi ɗif na numul na ksalai aŋ miɗini.

³³ Hlai na ksalai a birgasi li edi, ɗif na numul a tika pini aŋ muɗa seŋ. Firiɗi ɗai e bindi hiyak e miɗi: ɗif a tala ka wala na maini hanɗa ɵa a za ka warɗi Izrayel duk kai.

³⁴ Amma Farisekai e miɗi: A birga ksalai edi na ɗa war spakni paiɗi ksalai.

Yesu a hiina haw midiɗi ɗai

³⁵ Yesu a paya arbani fuŋ n'abakai gaini fuŋ n'agogoi a hitriɗi ɗai warni sinagogneɗi, a ɓaka labar zi firiyi na midiɗi pai, a zuula pinzibani veglek paŋ, gaini huruf paŋ lai.

³⁶ Hlai n'a tala firiɗi ɗai, hiinini haw a yimaŋ buriɗi, buri e ɗi fu gaini kayai, gdaŋ warɗi kai maini adumai na ɗif zi giɗimi aŋ kai nɵa.

³⁷ A miɗiɗi wiiɗi ɗaini zi hitri: Hiɗi a na abai amma ɗai zi sɗa e ɗa agwi.

³⁸ Buri nɵa ki siiwi Epin gezani hiɗi buri a ɵinasi ɗai zi sɗa war hiɗini.