Matewus 7 - Ɗû na sɗik na wiini Alaw

Evek gaini voɗok

¹ Ku ɗûklûti sariya kai, kapai sariya te ɗukla midiki kai.

² Buri ɓa sariya na ki ɗa ziŋɗi wiiɗi ɗai na ɗa, aga e ziki sariya wiiki tiki nɵa lai, daram na ki ɗa ŋi gaiɗi ɗa, aga a ŋa siki tiki gaiɗi na lai.

³ Tuku ku tala evek n'a na arni tawalku ɗa, amma voɗok na arku tuku ɗa, ku sɗaŋ kai ɗa maɵa maɵa ɗa?

⁴ Ku sɗa aŋ muɗa sini tawalku ɓa: hinaŋa mu tikasi evek na arku ɗa edi, paŋ kai voɗok n'a na arku tuku ɗa a tika edi gaiku kai ɗa maɵa maɵa ɗa?

⁵ Tuku zi rhai, tika voɗok na arku edi avut ɗaw haw, nɵa aga ku sɗa futini tikini evek na arni tawalku ɗa edi.

Aidaw gaini Hoho

⁶ Ki si wala na sɗik wiini hirgakai kai, ki pûkû aidawki azumai wuzani hoho kai, ɵa kai ɗa aga a kirpaŋ azumai, aga a bundasi siki a ɓisiki edi lai.

Siiwi, piyi, ɵiɓi

⁷ Siiwi aga a siki, piyi aga ki nivi, ɵiɓi mini dalam aga e miliŋki edi lai;

⁸ Buri asiya ɗi paŋ, n'a siiwa a nava, n'a paya a nava, n'a ɵiɓa mini dalam aga e miliŋni edi lai.

⁹ Ktai arbaki na ahini a siiwaŋ burini ɓuk, a tika ahi-fuŋ a siŋni ɗa, a na ɗi?

¹⁰ Zaw n'a siiwaŋ burini hilif, a sini wala meefeŋ a na ɗi?

¹¹ Na ɓa tiki na ki ɗa maafanai, ki siɗi aŋ si wazagai na pɗamai wiiɗi aliki, azi gama Epiki na war fuŋ-n'Alaw aga a siɗi wazagai na pɗamai wiiɗi nagai n'e siiwiŋ ɗa.

Sda na ki ziŋ siɗi na zamai

¹² Wala paŋ na ki diri ɓa ɗai e ziŋ siki ɗa, tiki lai zi hanɗa siɗi, hanɗa a gadai na wiini Musus gaiɗi ɗai na mini Alaw.

Futi na sulu

¹³ Ki niyi ɗa warni mini hlai na gaini hiɵi, buri ɓa futi na te ka sini bi n'edi ɗa te na buruki, mini hlai bruk lai, n'e niyi warni ɗaw ɗa e ɗa viya lai.

¹⁴ Amma mini hlai n'a ka sini suŋfa ɗa a na agwi, futi te na gaini hiɵi lai, nagai n'e niviŋ ɗa e ɗa agwi lai.

Ɗif a sɗa luwuŋ paŋ pini alini

¹⁵ Ki giɗimi siki wuzaɗi ɗai na mini Alaw z'alasakai, n'e hilisi siki ɗa maini adumai ɵa, amma warɗi n'amlai ɗa e ɗi belemke si virmi.

¹⁶ Aga ki siɗiɗi sini aliɗi. Ɗif a rawasi alini luwuŋ zi vin sini luwuŋ zi hedek par ɗi? Zaw alini luwuŋ Fige sini duvuɗvuɗ par ɗi?

¹⁷ Luwuŋ na pɗem paŋ a wa ali na pɗamai, luwuŋ na meefeŋ ɗe a wa ali na maafanai lai.

¹⁸ Luwuŋ na pɗem a kiɗa a wa ali na maafanai kai, luwuŋ na meefeŋ a kiɗa a wa ali na pɗamai kaalai.

¹⁹ Luwuŋ paŋ n'a wa ali na pɗamai kai, aga a ɗukla azumai, a ɵiŋka arni afu,

²⁰ nɵa aga ki siɗiɗi ɗa sini aliɗi.

Seŋ zi miɗi gaini zi na pini

²¹ Aga e niyi warɗi paini fuŋ-n'Alaw ɗa e ɗi nagai n'e miɗiŋa ɓa: Epiɗ-ɗai, Epiɗ-ɗai ɗa paŋ kai, sai a ni n'a za dirini Apa na war fuŋ-n'Alaw.

²² Viya aga e miɗiŋa warni mefeŋ ni ɓa: Epiɗ-ɗai, Epiɗ-ɗai, tiyi mi miɗi seŋ na wuze ɗa war yikuku kai ɗi? Mi birgi ksalai edi war yikuku kai ɗi? Mi zi wazagai zi hiila viya war yikuku lai kai ɗi?

²³ Nɵa aga mu wiyiɗi seŋ ɓa: mu siɗiki ka duk kai, yimi siki edi sa par, tiki na ki zi sɗa na meefeŋ.

Seŋ zi siŋka maini miɗini dalam na sulu

²⁴ Buri nɵa, asiya ɗi paŋ n'a ɵina seŋ hanɗa war ma par, n'a za pini lai ɗa, ni aga a za aŋ ɗif zi yel, n'a rga dalamni amai midini huwuŋ.

²⁵ Faŋ a ɵa abai, yem zi ki a cosi, smer a vuvuwa a ɵiɓa sini dalam hanɗa, amma dalam ɗa a kɵa kai, buri ezini a tora miɗini huwuŋ.

²⁶ Amma asiya ɗi paŋ n'a ɵina seŋ hanɗa ma par, amma a za pini kai ɗa, aga a za aŋ ɗif zi dûûli n'a rga dalamni miɗini kaikai.

²⁷ Faŋ a ɵa abai, yem zi ki a cosi, smer a vuvuwa, a ɵiɓa sini dalam hanɗa, dalam ɗa a kɵa, kɵini a za abai lai.

Spakni Yesu

²⁸ Won hlai na Yesu a vada gaini seŋ zi miɗi hanɗa ya, firiɗi ɗai a bunda hiyak burini hitirini.

²⁹ Buri a hitriɗi ɗa maini ɗif n'aŋ gaini spak pini nɵa, maiɗi ɗaiɗi n'e ɗû wazagai ɗa nɵa kai.