Matewus 6 - Ɗû na sɗik na wiini Alaw

Hitrini Yesu miɗini wala zi si aŋ like

¹ Ki giɗimi siki pɗem kapai ki zi jre ɗikat na wiiki pini arɗi ɗai kapai e tiliki ɗa kai, na ɓa ki ziŋ maini hanɗa nɵa ɗa, Epiki na warni fuŋ-n'Alaw aga a siki vrak kai.

² Nɵa won hlai na ku sa wala aŋ like ɗa wiini ɗif n'aŋ war gir ɗa, ku pɵa hum wuzaku kai, maini na ɗai zi rhai e ziŋ amlai warni Sinagogne, war futi lai kapai ɗai e kûlûɗi ɗa nɵa kai, jre mu miɗiki nagai e nivi vrakɗi ya.

³ Amma won hlai na ku sa walaku aŋ like wiini ɗif n'aŋ war gir ɗa, a juva tuku na muni ɗa, te siɗa wala na tuku na wus ɗa te zaŋ ɗa kai.

⁴ Kapai wala na ku saŋ aŋ like ɗa a za war kuɗuhai, Apuku n'a tala wala na war ŋoyai ɗa, aga a vurguŋku.

Hitrini na miɗini siiwa

⁵ Won hlai na ki siiwi ɗa, aga ki zi maiɗi ɗai zi rhai n'e firiyi e siiwi amai gaini eziɗi ca ca amlai warni Sinagogne, zaw mini dagrani futi, kapai ɗai paŋ e siɗiɗi ɗa nɵa kai, jre, mu miɗiki, e nivi vrakɗi ya.

⁶ Amma tuku ɗa, won hlai na ku dara ku siiwa ɗa, niya amlai warɗi dilimiku n'edi pini hlai ɗa, ku doogo porte amai duk, ku siiwa Apuku n'a na war ŋoyai ɗa, Apuku n'a tala wala na war ŋoyai ɗa aga a vurguŋku.

⁷ Won hlai na ki diri ki siiwi ɗa, ki miɗi seŋ viya viya maini na wiiɗi pinziba na zamai ɗa nɵa kai, n'e hiini ɓa siiwaɗi aga a ɵina burini seŋɗi na viya n'e miɗiŋ war siiwa ɗa,

⁸ Ki zi maiɗi nɵa kai, buri Epiki a siɗa wala na jaaki aŋ sini, won hlai na ki zilbiŋ kai hai ɗa.

Siiwa na wiini Epiɗ-ɗai

⁹ Nɵa, aga ki siiwi maini nɵa: Epiyi n'aŋ warni fuŋ-n'Alaw, a juva ɓa, ɗai e siɗi ɓa yikuku a na sɗik,

¹⁰ A juva ɓa paiku te halasi, a juva ɓa diriku a za midiɗi yai, maini n'amai warni fuŋ-n'Alaw nɵa.

¹¹ Girna ɗa, siyi walayi zi simi na war yuvai ɗa,

¹² Ku hina meefeŋ n'aŋ midiyi ɗa, maini na tiyi mi ɗa ziŋ siɗi nagai na tumuŋyi aŋ midiɗi nɵa.

¹³ Hiniyi aŋ niyi warni titimi kai, amma ku kûrɗiyi edi tini na meefeŋ par, buri pai gaini spak gaiɗi abai paŋ a wiiku haa hlai n'a vada kai. Amen.

¹⁴ Na ɓa tiki ki hini meefeŋ na wiiɗi ɗai li ɗa, Epiki war fuŋ-n'Alaw aga a hiniki meefeŋ na wiiki tiki lai.

¹⁵ amma na ɓa tiki ki hini meefeŋ na wiiɗi ɗai kai ɗa, Epiki aga a hiniki meefeŋ na wiiki kaalai.

Hitrini Yesu miɗini tikini sai

¹⁶ Won hlai na ki tiki sai li ɗa, ki zi siki maiɗi ɗai zi rhai ɗa ɵa kai, n'e ŋirɓi arɗi kapai ɗai e siɗi ɓa e ɗa tiki sai, jre mu miɗiki, e nivi vrakɗi ya.

¹⁷ Amma tuku, won hlai na ku tika sai ɗa, ku girda emel muduku, ku ma arku lai,

¹⁸ kapai ɗai e siɗi suku ɓa ku tika sai kai, sai a sɗaŋ ɗa a Apuku n'a na war ŋoyai, Apuku n'a na tala war ŋoyai aga a vurguŋku.

Godai na war fuŋ-n'Alaw

¹⁹ Ki tipi godai warɗi yai kai, won hlai na foto a sumaŋ, a coro, a tuura edi lai, na mahalakai e cû dalam buri e hiliŋ ɗa kai.

²⁰ A pɗem ɓa, ki tipi godaiki ɗa amai warni fuŋ-n'Alaw, woni ɗa foto a kiɗa a tuuraŋ kai, a coro aŋ tuura kai, mahalakai e kiɗi e cû dalam aŋ hiliŋ kaalai.

²¹ Buri ɓa, hlai na godaiku aŋ woni ɗa, agulku aga te za woni lai.

Arai te lampa na wiini si

²² Arai te lampa na wiini si, na ɓa arku te na pɗemi, si paŋ a gaglai.

²³ Amma na ɓa arai te na pɗemi kai ɗa, suku paŋ aŋ warni gegeŋ. Na ɓa gaglai na suku ɗa a gegeŋ ɗa, gegeŋ ɗa mal ɗa aga a suwa hanɗa azi gama ɗa?

Alaw, zaw farai

²⁴ Ɗif a kiɗa aŋ za aŋ bege na wiiɗi ɗai n'abakai sulu kai, aga a miisa na ktai, a dara na zamai, zaw a tapa seŋni gaini na ktai a miisa na zamai, tiki lai, ki kiɗi ki zi aŋ bagakai na wiini Alaw lai, na wiini Mamun lai kai.

Hiini zi giriŋi

²⁵ Buri nɵa mu na midiki, ki giriŋi burini wala kai zaŋ, burini suŋfaki kai, burini wala n'aga ki simiŋ ɗa kai, burini wala n'aga ki ciŋ ɗa kai, burini amur-siki kai, burini wala n'aga ki wiŋ siki kaalai. Suŋfa ɗa a suwa simi kai ɗi? Si ɗa a suwa sapa lai kai ɗi?

²⁶ Tili sini wala zi ɗufli n'arbani hlai n'amai, a bula kai, a haɗa kai, a tapasi seyem aha warni vre kaalai, amma Epiki na warni fuŋ-n'Alaw a sini simi, tiki, ki sûwi wala zi ɗufli ɗa kai ɗi?

²⁷ Arbaki ɗa, n'a kiɗa a dinɗa mefeŋ ni wuzani agwi gaini hinini zi giriŋi ɗa asiya ɗa?

²⁸ Ki giriŋi burini sapa ɗa buri ma ɗa? Ki tili sini miye n'a na diya edi warni basga, a za sda kai, a duɓura aduzi kai,

²⁹ paŋktai mu miɗiki koo Salmun warɗi abaini tekeɗeɗi a wa sapa sini maini ktai arbani nɵa kai.

³⁰ Na ɓa Alaw a wa sapa sini evek n'edi war basga n'a na girna, na dawai aga a poko arni afu maini hanɗa ɵa ɗa, aga a za hanɗa siki tiki a suwa pra kai ɗi? Tiki na gaini yimi n'agwi, aga a za siki a suwa hanɗa azi gama ɗa?

³¹ Nɵa ki hûwyi siki gaini hiini na ɓa aga mi simi ɗa a ma ɗa? Zaw aga mi ci ɗa a ma ɗa? Zaw n'aga mi wi siyi ɗa a ma ɗi ɗa kai,

³² hanɗa a wazagai na pinziba na zamai ɗa e piyiŋ mriɗi edi ta ɗa, buri Epiki na warni fuŋ-n'Alaw a sɗa ɓa jaaki aŋ sini.

³³ Ki piyiti avut ɗa te pai na wiini Alaw gaini jre ɗikat na wiini, na hanɗa paŋ aga a sa siki aŋ ɓeste.

³⁴ Nɵa ki huwyi siki buriɗi dawai kai, buri ɓa dawai aga te huwya siɗi burini siɗi dama “Yuvai paŋ t'aŋ gaini girɗi girɗi.”