Matewus 4 - Ɗû na sɗik na wiini Alaw

Mat a tetema Yesu

¹ Nɵa Seze a ka Yesu edi war basga na kaɗataŋ, kapai Mat a tetemaŋ.

² Asakal na Yesu a tika sai mefeŋ doogo doogo puɗu girvudi gaini duvuk, wiyamai te zaŋ.

³ Zi tini ɗai a halasi a miɗini: na ɓa k'Ahini Alaw ɗa, muɗa sini ali-fuŋ hanɗa a bunda aŋ wala zi simi.

⁴ Yesu a waya seŋ: Aŋ gaini ɗû ɓa: ɗif a sumna karni gaini wala zi simi kiini kai, amma gaini seŋ paŋ n'a niyasi edi mini Alaw par.

⁵ Mat a kaŋ war fuŋ n'abai na sɗik, a tikaŋ amai merfeŋni tempel,

⁶ a miɗini: Na ɓa k'Ahini Alaw ɗa, bula suku azumai, buri aŋ gaini ɗû ɓa: aga a sa miɗi wiiɗi ɗaini zi ɵeŋ buriku, aga e lubuku amai war tiɗi ɗaw, kapai azuku a daba sini ahi-fuŋ kai.

⁷ Yesu a miɗini, aŋ gaini ɗû lai ɓa: aga ku tetema Epiɗ-ɗai Alaw na wiiku kai.

⁸ Mat a tikaŋ pra, a kaŋ katawai amai midiɗi huwuŋ na muguwi, a siŋkini aftiɗi paakai na midiɗi yai ɗa paŋ gaiɗi abai na widi paŋ.

⁹ A miɗini: hanɗa paŋ ɗa aga mu suŋku, na ɓa ku hurga li azumai wuza ɗa.

¹⁰ Yesu a miɗini: Faka edi ma par, Satan, buri aŋ gaini ɗû ɓa: Aga ku hurga ɗa azumai wuzani Epiɗ-ɗai Alaw na wiiku, ku siiwa ɗa a ni ktai lai.

¹¹ Nɵa Mat a hinaŋ, ɗai zi ɵeŋ na war fuŋ n'Alaw e hilisi e zini pini.

Yesu a hala war Galeliya

¹² Won hlai n'a ɵina ɓa, e ɵi Yohana warɗi daŋgai su ɗa, Yesu a yima sini edi war Galeliya par.

¹³ A hala a Nazaret par, a sumna a Kapernahum, midini afti na wiini Zabulon gaini na wiini Neftali.

¹⁴ Kapai wala n'a muɗa min ɗif na min Alaw Esaya aga a va, n'a muɗa,

¹⁵ Afti na Zabulon gaini na Neftali, ɵimani yem-ra-n'abai duɓani Yurdan, Galileya na wiiɗi ɗai na kadai.

¹⁶ Ɗai n'e simni war gegeŋ e tili gaglai n'abai, siɗi nagai n'e simni midini afti na gegeŋ na wiini mri, siɗi nagai gaglai a za.

¹⁷ Won hlai hanɗa par Yesu a tika pini aŋ ɓaka seŋ a muɗa, ki hi-miy, buri paini fuŋ-n'Alaw te ŋasi gobi.

Yesu a yikiɗi ɗaini zi hitri n'avut

¹⁸ Won hlai na ni a na paiya ɵimaɗi yem-ra-n'abai na Galileya, a tiliɗi tawalakai sulu, Simun, n'e yikiŋ Peter, gaini tawalni Andrea, n'e ɗa aŋ ɵi ava agoɗom, buri nagai e ɗi ɗai zi yimi hilif.

¹⁹ A miɗiɗi, tipisi pa, aga mu bindiki aŋ ɗai zi yimi ɗai.

²⁰ Tizaw tar, e hini avaɗi e tipi pini.

²¹ Won hlai n'a na hala wuzani, a tiliɗi tawalakai na zamai sulu, Yakob, ahini Sebedew, gaini tawalni Yohana, e simni warni hulum gaini epiɗi, Sebedeu, e ɗa aŋ sisini avaɗi, a yikiɗi.

²² Tizaw tar e hini hulum gaini epiɗi e tipi pini.

Yesu a ɓaka seŋ, a zûûliɗi ɗai

²³ Yesu a paya war Galileya paŋ a hitriɗi ɗai warni sinagogneɗi. A ɓaka labar zi firiyi midiɗi pai, a zuula veglek na zamai zamai paŋ gaini huruf n'arbaɗi ɗai paŋ.

²⁴ Labar burini a wa edi war Siriya paŋ, e kiɗinisi sini ɗai zi veglek paŋ na veglek zamai zamai paŋ gaini gir paŋ a yimiɗi, gaiɗi nagai na ksalai aŋ midiɗi, nagai na gaini dûûli n'a bunda pin tile, gaiɗi nagai na gaini gumriki a zûûliɗi paŋ.

²⁵ Firiɗi ɗai e tipi pini war Galileya gaiɗi Dekapolis gaiɗi Yeruzalem gaini Yudea par, gaini afti na duɓani Yurdan par lai.