Matewus 17 - Ɗû na sɗik na wiini Alaw

Sini Yesu a bunda amai miɗiɗi huwuŋ

¹ Mefeŋ ɵaara asakal hanɗa Yesu a yima Peter gaini Yakob gaini Yohana na tawalni pini, a kiɗi gaini amai midiɗi huwuŋ na mugwi edi war baŋa.

² Sini a bunda wuzaɗi, arni a ŋala maiɗi futi nɵa, sapani a bunda muɗukwi tal maini gaglai nɵa.

³ Tili, Musus gaini Eliyas e siŋki siɗi arɗi e ɗa hiɗi kalaŋ gaini.

⁴ Peter a tika seŋ a muɗa sin Yesu, Epin-geza simni na won na a pɗem burimu, ɓa ku dara aga mu zizina dugo hu, na ktai buriku, ktai burini Musus, ktai burini Eliyas.

⁵ Won hlai n'a na muɗa hai, tili, ɗugul na gaglai a halasi a dûgûɗi, wule a halasi edi warni ɗugul par a muɗa: Hanɗa a Ahiya zi diri gara, ni a n'ara pɗem, ɵini pini.

⁶ Won hlai na ɗai zi hitri e ɵini hanɗa, e yiki azumai e pi midiɗi azumai e hûni gara.

⁷ Yesu a halasi a tetemiɗi a muɗa, fiki amai, ki hûni kai.

⁸ Won hlai n'e yimi arɗi amai e tili ɗif zamai kai, sai a Yesu kiini.

⁹ Won hlai n'e niyisi azumai midiɗi huwuŋ par, Yesu a gidiɗi a muɗa, ki miɗini wiini ɗif miɗini wala zi siŋki hanɗa kai, haa Ahini ɗif a ɵiyasi amai war mri par.

¹⁰ Ɗai zi hitri e zilbiŋ e miɗi, buri ma ɗa ɗai zi ɗû wazagai e miɗi ɓa Eliyas aga a halasi avut?

¹¹ A waya seŋ a muɗa, jre, Eliyas aga a zizina wazagai paŋ woɗi futini.

¹² Amma mu miɗiki buri a halasi ya, e siɗiŋ kai, amma e zi sini paŋ maini e diri nɵa. Ahini ɗif aga a siɗa gir tiɗi maini nɵa lai.

¹³ Won hlai ni, ɗai zi hitri e siɗi ya, buri a miɗiɗi miɗini Yohana zi Baptisme.

Yesu a zuula ahiyogwi na gaini ksalai na hihir

¹⁴ Won hlai n'e gizi sin firiɗi ɗai, ɗif ktai a halasi sini, a hurga azumai wuzani a muɗa,

¹⁵ Epiɗ-ɗai, hiina haw burini ahiya, na dûûli n'a bunda pin tile a zaŋ, a sɗa gir gara, buri azi viya, a kɵa arni afu, azi viya arni yem lai.

¹⁶ Mu kaŋsi siɗi ɗaiku zi hitri, amma e kiɗi aŋ bindiŋ pɗem kai.

¹⁷ Yesu a waya seŋ a muɗa, tiki pinziba na gaini yimi kai na hraŋai, aga mu sumna gaiki ɵa haa kaswata ɗa? Aga mu libiki ɵa haa kaswata ɗa? Kiŋsi sa na.

¹⁸ Yesu a ɓaraŋ, ksalai a niyasi edi sini par, ahiyogwi a bunda pɗem war ler ni dama.

¹⁹ Won hlai ni ɗai zi hitri e hilisi sin Yesu war ŋoyai e miɗi, tiyi mi kiɗi aŋ birgiŋ edi kai buri ma ɗa?

²⁰ Yesu a miɗiɗi, buri yimi kai na wiiki, buri jre mu miɗiki, ɓa yimiki a na fu maini alini seneve nɵa, aga ki miɗi siɗi huwuŋ hanɗa, buri te zogoɗi won na par edi na, aga te zogo lai. Wala n'aga ki kiɗi aŋ ziŋ kai aŋ kai.

²¹ Amma ksalai na maini hanɗa nɵa a niyasi edi ɗa, sai gaini siiwi, gaiɗi sai lai.

Yesu a muɗa edi pra miɗini mrini na wuzani

²² Won hlai n'e ɗa piyi war Galileya Yesu a miɗiɗi, Ahini ɗif aga a sa edi tiɗi ɗai,

²³ aga e fiɗiŋ edi, war mefeŋ n'ag'aŋ hu aga a ɵiya amai. Nagai e kwimi gara.

Virgini tarni tempel

²⁴ Won hlai n'e gisi a Kapernahum, nagai n'e yimi tar na wiini tempel e hilisi sin Peter e miɗi, Api-zi-hitri na wiiki a sa tar na wiini tempel kai ɗi?

²⁵ A muɗa, a sa. Won hlai n'a niya aha warni dalam, Yesu a rafaŋ a miɗini, ku hiina maɵa ɗa, Simun? Paakai na midiɗi yai e yimi tar tin asiya ɗa? Tiɗi aliɗi dama zaw tiɗi ɗai n'edi par ɗi?

²⁶ A muɗa, tiɗi n'edi par ɗa. Yesu a miɗini, nɵa aliɗi e si tar kai kai ɗi.

²⁷ Amma kapai mu bundumu arɗi aŋ wala zi dibi azi kai ɗa, hala war yem-ra-n'abai, ku ɵa zuwti agoɗom, ku yimasi hilif na ku yimaŋ avut ɗa amai. Ku mala mini amai, a aga ku nava stater ktai mini, ku tikaŋsi ku siŋɗi buriya ta, gaiku tuku lai.