Matewus 16 - Ɗû na sɗik na wiini Alaw

Farisekai gaiɗi Sadusekai e piyi wala zi siŋki

¹ Farisekai gaiɗi Sadusekai e hilisi sini buri e tiniŋ e siiwiŋ buri a siŋkiɗi wala zi siŋki na war hlai n'amai par.

² A waya seŋ siɗi a miɗiɗi won hlai na futi-koskoi te za li ki miɗi, hlai aga a za pɗem buri ɗugul a na mekele.

³ Dawai par lai, girna hlai aga a za meefeŋ, buri ɗugul a na mekele, hlai guri lai. Tiki ki siɗi aŋ tili wala zi siŋki na wiini hlai n'amai amma wala zi siŋki na wiini hlai ki siɗi pini edi kai maɵa ɗa.

⁴ Pinziba na meefeŋ, na jre kai, a paiya wala zi siŋki. Wala zi siŋki aga a sa siɗi kai, sai wala zi siŋki na wiini Yonas. A hiniɗi a hala wiini.

Is na wiiɗi Farisekai gaiɗi Sadusekai

⁵ Won hlai na ɗaini zi hitri e hili anene kata, midiɗi a wula, e mili wala zi simi tiɗi.

⁶ Yesu a miɗiɗi, ki zi hangal, ki giɗimi siki burini is na wiiɗi Farisekai gaiɗi Sadusekai.

⁷ E hiini warɗi dama e miɗi: a muɗa na ɗa buri ɓa mu mulumusi peŋ tumu kai ɗa.

⁸ Won hlai na Yesu a sɗa hanɗa a miɗiɗi tiki gaini yimi n'agwi ki hiini warki dama ɓa mu muɗa na ɗa buri na ɓa ki milisi peŋ kai ɗa buri ma ɗa?

⁹ Ki siɗi kai hai ɗi, a kɵa midiki kai ɗi? Peŋ na ɵim n'a sa siɗi ɗai na dubu ɵim, dologo gama ɗa, na ki miliŋ amai ɗa?

¹⁰ Zaw peŋ na muguzak n'a sa siɗi ɗai na dubu puɗu, dologo gama ɗa, na ki miliŋ amai ɗa?

¹¹ Buri mu miɗiki burini peŋ kai, ki kiɗi aŋ ɵini hanɗa kai ɗi? Amma ki giɗimi siki pɗem burini is na wiiɗi Farisekai gaiɗi Sadusekai.

¹² Won hlai ni nagai e ɵiniŋ daaba ɓa, a miɗiɗi na ɗa ɓa aga e giɗimi siɗi burini is n'arni peŋ ɗa kai, amma burini hitri na wiiɗi Farisekai gaiɗi Sadusekai.

Peter a muɗa edi miɗini Yesu ɓa ni a Kristu

¹³ Won hlai na Yesu a halasi midini afti na ɵimaɗi Sezareya Filipi, a zilbiɗi ɗaini zi hitri a muɗa, ɗai e miɗi ɓa Ahini ɗif ni asiya ɗa?

¹⁴ E miɗini zamai e miɗi ɓa a Yohana zi Baptisme, zamai ɓa a Eliyas, zamai pra ɓa Yeremiyas a ktai arbaɗi ɗai na min Alaw.

¹⁵ A miɗiɗi, amma tiki ki miɗi ɓa ta mu siya ɗa?

¹⁶ Simun Peter a waya seŋ a muɗa, tuku ku Kristu, Ahini Alaw na karni.

¹⁷ Yesu a waya seŋ a miɗini, ɵeɗ muduku, Simun ahini Yonas, buri neŋ-si gaini fel a suŋkuku hanɗa kai, amma Apa na war fuŋ-n'Alaw.

¹⁸ Mu muɗuku tuku ku Peter, miɗini huwuŋ hanɗa aga mu rga tipi na wiya, min magalani hlai zi mri aga a nava spak miɗini kai.

¹⁹ Aga mu suku kle na wiiɗi paini fuŋ-n'Alaw, wala na ku naggaŋ midiɗi yai a nagga li war fuŋ-n'Alaw, wala na ku plaŋ edi midiɗi yai, a pela edi li war fuŋ-n'Alaw.

²⁰ Won hlai ni a gidiɗi ɗaini zi hitri buri e miɗini wiini ɗif ɓa ni a Kristu kai.

Yesu a muɗa edi miɗini mrini na wuzani

²¹ Won hlai ni par Yesu a tika pini aŋ muɗa edi siɗi ɗaini zi hitri buri ni aga a hala a Yeruzalem, n'abakai gaiɗi paakai n'abakai zi ɓaka gaiɗi ɗai zi ɗû wazagai aga e zini gir gara, aga e fiɗiŋ lai, amma war mefeŋ n'ag'aŋ hu aga a ɵiya amai.

²² Amma Peter a yimaŋ edi kiini a tika pini aŋ gadaŋ a muɗa, Alaw a kurɗuku edi Epiɗ-ɗai, hanɗa a za suku kai zaŋ.

²³ Amma a bunda arni a muɗa sin Peter, ku waya duɓa, Satan, buri tuku ku wala zi dibi buriya, buri tuku ku hiina maini Alaw ɵa kai, amma maiɗi ɗai nɵa.

²⁴ Yesu a miɗiɗi wiiɗi ɗaini zi hitri, na ɓa ɗif a dara a hala pa, sai a ɗala sini dama, a tika dagrani amai aŋ hala pa.

²⁵ Asiya ɗi paŋ n'a dara a kora suŋfani, aga a baŋ, amma asiya ɗi paŋ n'a ba suŋfani edi buriya, aga a navaŋ.

²⁶ Na ɓa ɗif a niviti yai ɗa paŋ, amma a ba suŋfani ɗa, pɗem na burini aŋ wata ɗa? Ɗif a sɗa aŋ bunda suŋfani gaini a ma ɗa?

²⁷ Buri Ahini ɗif aga a halasi warɗi abai na wiini Epini gaiɗi ɗaini zi ɵeŋ na war fuŋ-n'Alaw pini, won hlai ni aga a sa sini asiya, asiya paŋ pin sdani, pin sdani.

²⁸ Jre midiki, zamai n'arbaɗi n'e ɗi won na aga e titimi mri kai, haa e tili Ahini ɗif a halasi warɗi paini.