Matewus 13 - Ɗû na sɗik na wiini Alaw

Seŋ zi siŋka maini midini ɗif zi sûûɗi seyem

¹ War mefeŋ ni dama Yesu a niya anene warni dalam par a sumna ɵimaɗi yem-ra-n'abai.

² Firiɗi ɗai viya a tapasi sini, haa a niya warni hulum n'abai a sumna warni. Firiɗi ɗai e simni amai wulani daŋ par.

³ A miɗiɗi wazagai viya war seŋ zi siŋka maini a muɗa: Tili ɗif zi sûûɗi seyem a hala edi aŋ suuɗaŋ azumai.

⁴ Won hlai n'a na suuɗaŋ seyem zamai a yaka ɵimaɗi futi, wala zi ɗufli a halasi a sumaŋ.

⁵ Zamai a yaka midini hlai zi kriyit, hlai n'a nava afti abai kai, a diya witaw, buri aftini a hulum kai.

⁶ Amma won hlai na futi te diyasi amai te yaŋ edi, buri sirdaini aŋ kai, a siita edi.

⁷ Zamai a yaka arbani hedek, hedek a wula amai a rozoŋ.

⁸ Zamai a yaka arni afti na pɗem, a wa ali, zamai a za miya, zamai a za doogo doogo ɵaara, zamai a za doogo doogo hu lai.

⁹ Ni na ɵimaɗi zi ɵini a na, aga a ɵina.

Yesu a muɗa war seŋ zi siŋka maini buri maɗa?

¹⁰ Ɗai zi hitri e hili sini e miɗini, ku muɗa siɗi war seŋ zi siŋka maini buri ma ɗa?

¹¹ A waya seŋ a miɗiɗi, buri a sa siki tiki aŋ siɗa wazagai zi ŋoiyai na wiiɗi paini fuŋ-n'Alaw, amma a sa siɗi nagai kai.

¹² Buri ni na wiini a na, aga a sa sini pra, aga a va abai gara lai, amma ni na wiini aŋ kai, walani n'a na, hanɗa aga a yima edi sini par lai.

¹³ Buri nɵa mu ɓaka seŋ siɗi war seŋ si siŋka maini, buri e tili paŋktai e tili kai, buri e ɵini paŋktai e ɵini kai, e ɵini ezini edi kai.

¹⁴ Buriɗi nagai, seŋ na wuze na wiini Esaya a va li, n'a muɗa: Aga ki ziɓiri, amma aga ki ɵini kai, aga ki tili, amma aga ki siɗi wala ktai kai.

¹⁵ Buri agulɗi ɗai hanɗa a diŋra diŋir, ɵimaɗi a bunda a ɵina yum yum, e dûgû arɗi duk, kapai e tili gaini arɗi kai, e ɵini gaini ɵimaɗi kai, e siɗi ezini seŋ gaini hiiniɗi kaalai, kapai e siɗi aŋ wiyisi hiiniɗi sini Alaw kai, kapai a zûûliɗi kai.

¹⁶ Amma ɵeɗ midini arki, buri arki a tala, buri ɵimaki lai, ɵimaki a ɵina.

¹⁷ Buri jre, mu miɗiki, ɗai na min Alaw gaiɗi na jre-ɗikat viya e piyi aŋ tili wazagai na ki tiliŋ, amma nagai e tiliŋ kai, aŋ ɵini wazagai na ki ɵiniŋ, amma e ɵiniŋ kai.

Yesu a muɗa edi ezini seŋ zi siŋka maini midini ɗif zi sûûɗi seyem

¹⁸ Seŋ zi siŋka maini burini ɗif zi sûûɗi seyem te siŋka edi maini nɵa.

¹⁹ Won hlai na ɗif a ɵina seŋ midiɗi pai, amma a ɵina ezini edi kai, na meefeŋ a halasi a mula wazagai n'a suuɗa warɗi agulni par, hanɗa a ni n'a nava sûûɗini seyem ɵimaɗi futi.

²⁰ Amma ni n'a nava sûûɗini seyem war hlai zi kriyit, a ni n'a ɵina seŋ, tizaw tar a yimaŋ gaini firiyi.

²¹ Amma sirdai warni kai, a safa burini hlai n'agwi kadai, gir gaini ɓarai a fakasi li burini seŋ ɗa, a wa sini edi tar.

²² Ni n'a nava sûûɗini seyem arbani hedek, hanɗa a ni n'a ɵina seŋ, amma hiini na wiiɗi yai hanɗa gaini tanai na wiini farai a roso seŋ ɗa warni, a wa ali kai.

²³ Amma ni n'a nava sûûɗini seyem arni afti na pɗem ɗa, a ni n'a ɵina seŋ, a ɵina ezini edi lai, a wa ali, zamai a sa azi miya, zamai azi doogo doogo ɵaara, zamai doogo doogo hu lai.

Evek na meefeŋ n'arbani algama

²⁴ Seŋ zi siŋka maini na zamai a muɗaŋ edi siɗi a muɗa: paini fuŋ -n'Alaw te na maini ɗif n'a suuɗa seyem na pɗem war vowaini.

²⁵ Amma won hlai na ɗai e kili weseŋ, gawni halasi a suuɗa evek na meefeŋ arbani algama, a hala wiini

²⁶ Amma won hlai na seyem a diya amai, a wa ali, evek na meefeŋ a siŋka sini edi lai.

²⁷ Nɵa ɗai zi sida na wiini epin-dalam e hilisi e miɗini, api, ko suuɗa war vowaiku a seyem na pɗem kai ɗi? Evek na meefeŋ a halasi arbani wata par ɗa?

²⁸ A miɗiɗi, gaw ktai a za hanɗa. Ɗai si sida e miɗini, ku dara ɓa mi hili mi rɗiŋ edi ɗi?

²⁹ Amma a muɗa, zaw kai, kapai ki rɗi algama amai, won hlai na ki tipi evek amai ɗa kai.

³⁰ Hiniŋ sulu paŋ a wula ktai, haa hlai zi hiɗi, won hlai na hlai zi hiɗi a cosi li, aga mu miɗiɗi wiiɗi ɗai zi hiɗi, tipi evek na meefeŋ avut ki rgiŋ buri ki yiŋ edi, amma ki mili algama warni vreŋa.

Seyemni seneve

³¹ A muɗa seŋ zi siŋka maini na zamai siɗi pra, a muɗa: Paini fuŋ-n'Alaw te na maini seyemni Seneve na ɗif ktai a suuɗaŋ warni vowaini.

³² Ni, n'agwiyeŋe kadai arbani seyem paŋ, amma won hlai n'a wula amai li, ni a abai a suwa sugoi paŋ, a bunda aŋ luwuŋ haa wala zi ɗufli n'arbani hlai n'amai a halasi a yima gutni amai sin graŋni.

Is

³³ A miɗiɗi seŋ si siŋka maini na zamai a muɗa: Paini fuŋ-n'Alaw te maini is na muni te tikaŋ, te koŋ arni daramni avudi hu, haa is a niya arni paŋ.

Yesu a muɗa war seŋ zi siŋka maini

³⁴ Wazaagai hanɗa paŋ Yesu a muɗaŋ wiini firiɗi ɗai war seŋ zi siŋka maini, a miɗiɗi seŋ kai sai war seŋ zi siŋka maini.

³⁵ Kapai wala na ɗif na mini Alaw a muɗaŋ ɗa, a va amai n'a muɗa:

³⁶ Mu dara mu mala ma amai war seŋ zi siŋka maini, mu dara mu muɗa edi wazagai n'a na war ŋoyai war piɗi yai zi tiki par.

Yesu a muɗa edi ezini seŋ zi siŋka maini miɗini evek na meefeŋ n'arbani algama

³⁷ Asakal hanɗa a hiniɗi ɗai e hili, a niya warni dalam. Ɗaini zi hitri e hilisi sini e miɗi, siŋkiyi seŋ zi siŋka maini miɗini evek na war vowai ɗa. A waya seŋ a muɗa: Ni n'a suuɗa seyem na pɗem hanɗa a Ahini ɗif.

³⁸ Vowai te yai, seyem na pɗem hanɗa e ɗi aliɗi pai, amma evek e ɗi alini na meefeŋ.

³⁹ Gaw n'a suuɗa hanɗa a Mat, hlai zi hiɗi a dibiɗi yai. Ɗai zi hiɗi e ɗi ɗai zi ɵeŋ na war fuŋ-n'Alaw.

⁴⁰ Maini evek a tapa a ya arni afu, nɵa lai aga a za war dibiɗi yai.

⁴¹ Ahini ɗif aga a ɵiniɗisi edi ɗaini zi ɵeŋ na war fuŋ-n'Alaw, nagai aga e tipi edi warɗi paini par wazagai zi tanai paŋ gaiɗi nagai n'e zi woɗi futini ɗikat kai.

⁴² Aga e ɵiŋkiɗi warni waŋ z'afu, woni a tuwi gaini hirɗini sisiyeŋ.

⁴³ Nagai na jre ɗa aga e ŋili maiɗi futi nɵa warɗi pai na wiini Epiɗi. Ni na ɵimaɗi a na aga a ɵina.

Godai na ni ŋûyi

⁴⁴ Paini fuŋ-n'Alaw te na maini godai na gai ŋûyi cok warni vowai na ɗif ktai a navaŋ a ŋoyaŋ. War firiyini a hala a wurasi wazaagaini paŋ edi a wura vowai ni ɗa.

Aiduwi na wûriɗi abai

⁴⁵ Paini fuŋ-n'Alaw te na pra maini ɗif zi cakala, n'a paya aidaw na pɗamai.

⁴⁶ Won hlai n'a niviti aiduwi na wûriɗi abai ɗa li, a hala edi a wura wazagaini paŋ edi, a wûriti.

Ava

⁴⁷ Paini fuŋ-n'Alaw pra te na maini ava n'a ɵiŋka agoɗom n'a diŋga pinzibani hilif paŋ.

⁴⁸ Won hlai n'a va li, e sipiŋ amai gadaŋ, e simni azumai e mili na pɗamai warni magaza, amma na maafanai e pûkûŋ edi.

⁴⁹ Maini nɵa aga a za war dibiɗi yai. Ɗai zi ɵeŋ na war fuŋ-n'Alaw aga e hili edi e ɓûrwiɗi na maafanai edi siɗi na jrekai par.

⁵⁰ E ɵiŋkiɗi warni waŋ z'afu, woni a tuwi gaini hirɗini sesiyeŋ.

Gadai na hahakai gaini na walakai

⁵¹ Ki ɵini ezini seŋ hanɗa edi paŋ ɗi? E miɗini, nkam.

⁵² A miɗiɗi, buri nɵa, ɗif zi ɗû wazagai na asiya asiya paŋ n'a bunda aŋ ɗif zi hitri na wiiɗi pai n'Alaw, a na maini epin-dalam n'a ka edi warni godaini par wazagai na hahakai gaini wazagai na walakai.

War Nasaret e bili Yesu arɗi kai

⁵³ Won hlai na Yesu a vada seŋ zi siŋka maini hanɗa, a hina hlai ni, a hala edi woni par.

⁵⁴ A halasi midini aftini, a hitriɗi warni sinagogneɗi, haa e bindi hiyak. E miɗi, ɗif hanɗa a nava yel nɵa gaini sda na zi spak na nɵa wata par ɗa?

⁵⁵ Hanɗa a ahini ɗif zi kilɗi luwuŋ kai ɗi? Emini yikiɗi Maria kai ɗi? Tawalakaini a Yakob gaini Yosef gaini Simun gaini Yudas kai ɗi.

⁵⁶ Tawalakaini na falakai, nagai paŋ e ɗa gaiyi won na paŋ kai ɗi? Ɗif hanɗa a nava wazagai nɵa paŋ wata par ɗa?

⁵⁷ A bunda aŋ wala zi dibi buriɗi. Amma Yesu a miɗiɗi: Ɗif na mini Alaw e miisiŋ war hlai zamai kai, sai midini aftini, warni dalamni lai.

⁵⁸ A za sda zi spak woni viya kai burini yimi kai na wiiɗi.