Matewus 12 - Ɗû na sɗik na wiini Alaw

Ɗai zi hitri e hiɗi seyem war Sabbat

¹ War mefeŋ ni ɗa Yesu a vuga arbani vowai na wiini algama, war mefeŋ na wiini Sabbat. Wiyamai te yimiɗi ɗaini zi hitri, e tiki piɗi aŋ hiɗi miɗini seyem buri e limiŋ.

² Won hlai na Farisekai e tili hanɗa, e miɗini: tala, ɗaiku zi hitri e zi wala n'aŋ gaini ɗili buri a za war mefeŋ ni Sabbat kai.

³ Amma a miɗiɗi: ki tili wala na David a zaŋ won hlai na wiyamai te zaŋ gaiɗi nagai n'e ɗa gaini war ɗû kai ɗi?

⁴ Maɵa ɗa a niya amlai warni dalamni Alaw, maɵa ɗa e limi peŋ n'a sa sini Alaw, paŋktai pini seŋ zi gadai ɗa a wala zi ɗili burini ni gaiɗi nagai na pini lai, e limiŋ ɗa e ɗi paakai zi ɓaka kiɗi!

⁵ Zaw ki tili warni ɗû ɓa, paakai zi ɓaka war mefeŋ ni Sabbat ɗa e ɓilki Sabbat amlai warni tempel paŋktai seŋ midiɗi kai ɗa, ki tiliŋ ɵa kai ɗi?

⁶ Amma wala n'a suwa tempel aŋ won na.

⁷ Na ɓa ki siɗi fu ezini seŋ n'a muɗa ɓa mu dara yum, amma ɓaka kai, nɵa ki kûti sariya midiɗi nagai na seŋ na meefeŋ midiɗi kai.

⁸ Buri Ahi a Pai miɗini Sabbat lai.

Ɗif na tini gaini mri

⁹ A halaɗi edi woni par a niya warni sinagogneɗi.

¹⁰ Ɗif ktai a na won na tini gaini mri. E zilbi Yesu: Seŋ zi gadai a hina ɗif aŋ zuula ɗif zi veglek war Sabbat ɗi?: Hanɗa ɓa kapai e siɗi aŋ pi seŋ midini.

¹¹ Amma a wiyiɗi seŋ a muɗa: asiya n'arbaki n'adumini te na ktai, ɓa te kɵa warni waŋ war mefeŋ ni Sabbat, aga a yimiti buri a tikiti amai kai ɗi?

¹² Amma ɗif ɗa a sûwiti adumi kai ɗi? Buri nɵa seŋ zi gadai a hina ɗif aŋ za pɗem war Sabbat.

¹³ Won hlai ni a muɗa sin ɗif, maɗati tuku edi. A miɗiti edi, te bunda pɗemi, maiɗi na ktai nɵa.

¹⁴ Farisekai e niyi anene, e kiti seŋ midini maɵa ɗa aga e biŋ.

Yesu a ɵeŋ na wiini Alaw

¹⁵ Amma Yesu a ɵina seŋ hanɗa, a yima sini edi woni par, faraɗi ɗai viya a tapa pini, a zûûliɗi paŋ lai.

¹⁶ A gidiɗi gaini gdaŋ buri e miɗiɗi wiiɗi ɗai gaini kai.

¹⁷ Kapai wala na ɗif na mini Alaw Esaya a muɗaŋ ɗa aga a va amai, won hlai n'a muɗa:

¹⁸ Hanɗa a ɵeŋ na wiya na mu varaŋ edi, a ahi na mu daraŋ gara, n'a tala ara pɗem buri mu varaŋ, aga mu hinasi Sezeŋa midini, aga a muɗa edi wiiɗi ɗai midini jre-ɗikat

¹⁹ Aga a paya sispai kai, a ɗuula kaalai, ɗif aga a ɵina wulani warni futi kaalai.

²⁰ Vayai na gaini hûmki aga a haɗaŋ kai, mini afu n'a ya ɗus ɗus aga a fuɗaŋ kai, haa a ka jre ɗikat aŋ rɗa amai.

²¹ Pinziba na zamai aga e biyi pini ɵeɗ war yikini.

Tirki na sin Seze sɗik

²² Nɵa ɗai e kinisi ɗif na ksalai aŋ miɗini, na melveŋ na numul sini. A zuulaŋ haa ɗif na numul a muɗa a tala lai.

²³ Firiɗi ɗai paŋ e miliŋi pin ziɓiri e miɗi, ni hanɗa a Ahini David kai ɗi?

²⁴ Amma won hlai na Farisekai e ɵini hanɗa, e miɗi, ɗif hanɗa a birga ksalai edi gaini wala zamai kai, sai gaini Beelzebul, paiɗi ksalai.

²⁵ Amma won hlai na Yesu a sɗa hiiniɗi a miɗiɗi, pai paŋ na te za gaw sin siɗi dama, aga te ɓilka, fuŋ paŋ gaini dalam paŋ n'a za gaw sin sini dama a kiɗa aŋ ɗiya kai.

²⁶ “ba Satan a birga Satan edi, nɵa a za gaw sin sini dama, paini aga te ɗiya maɵa ɗa?

²⁷ ‘ba mu ta mu birga ksalai edi gaini Beelzebul, aliki e birgiɗi edi gaini a ma ɗa? Buri nɵa, aga e zi aŋ paakai n'e ɗûklûti sariya midiki.

²⁸ Amma na ɓa mu birga ksalai edi gaini Sezeni Alaw, nɵa pai n'Alaw te cosi siki.

²⁹ “Ba ɗif a nagga ɗif na gdaŋ avut kai, a sɗa aŋ niya warni dalamni ɗif na gdaŋ aŋ vurma wazagaini maɵa ɗa? A naggaŋ ɓak, a sɗa aŋ vurma dalamni.

³⁰ Ni na warni aŋ gaigai gaya, a za gaw sa, ɗif n'a tapa wazagai gaya kai, a ɵara edi.

³¹ Buri nɵa mu miɗiki, ɗai aga e nivi ni burini tuwur gaini tirki paŋ, amma burini tirki na sin Seze-sɗik, ɗif a nava ni kai zaŋ.

³² Na ɓa ɗif a muɗa seŋ na meefeŋ burini Ahini ɗif, hanɗa aga a hiniŋni, amma ɓa ɗif a muɗa seŋ na meefeŋ burini Seze-sɗik, hanɗa aga a hiniŋni warɗi yai hanɗa kai, warɗi n'aga te halasi ɗa kaalai.

³³ Na ɓa luwuŋ a pɗem, alini pɗamai lai; amma na ɓa luwuŋ a meefeŋ, alini maafanai lai. Buri ɗif a sɗa luwuŋ sin alini par.

³⁴ Pinzibani hibe, tiki na maafanai, ki siɗi aŋ miɗi wazagai na pɗamai maɵa ɗa? Buri wazagai n'a vasi warɗi agul pulmuɗuk, miy a muɗaŋ edi.

³⁵ Buri ɗif na pɗem a kasi wazagai na pɗamai edi warni godaini na pɗem par, ɗif na meefeŋ a kasi wazagai na maafanai warni godaini na meefeŋ par.

³⁶ Amma mu miɗiki, seŋ zi miɗina kadai paŋ na ɗai e miɗiŋ, hanɗa aga a zilba tiɗi war mefeŋ sariya.

³⁷ Buri pin seŋku aga ku sɗa edi aŋ jre-ɗikat, pin seŋku sariya aga te ko muduku lai.

Pinziba na meefeŋ a paiya wala zi siŋki

³⁸ Buri nɵa zamai n'arbaɗi ɗai zi ɗû wazagai gaiɗi Farisekai e wiyi seŋ e miɗini, Api-si-hitri mi diri mi tili wala zi siŋki tuku par.

³⁹ Amma a waya seŋ a miɗiɗi, pinziba na meefeŋ, zi rhai, a paiya wala zi siŋki. Wala zi siŋki aga a sa siɗi kai, sai siŋki na wiini ɗif na min Alaw Yonas.

⁴⁰ Buri maini Yonas a sumna mefeŋ hu, girvudi gaini duvuk, warni hilif n'abai, nɵa lai, Ahini ɗif aga a sumna mefeŋ hu, girvudi gaini duvuk, arni afti.

⁴¹ Maɵagai na Ninive aga e fiki amai war mefeŋ zi sariya gaini pinziba hanɗa, aŋ kûti sariya midiɗi, buri nagai e hi-miy pin ɓikini seŋ na wiini Yonas, tili, n'abai a suwa Yonas aŋ won na.

⁴² Muni zi pai na midini afti n'amai par, aga te faka amai war mefeŋ zi sariya gaini pinziba hanɗa, aŋ kûti sariya midiɗi, buri na te halasi war min afti zi dibi par aŋ ɵina yel na wiini Salmun, tili, n'abai a suwa Salmun a na won na.

Wiyini ksalai na hihir

⁴³ Won hlai na ksalai na hihir a niyasi edi warni ɗif par, a hala arbani hlai z'alak aŋ paiya si n'amla, amma a navaŋ kai.

⁴⁴ A muɗa: aga mu waya warɗi dilimiŋa na mu halasi warɗi par ɗa; a waya warɗi lai. A niviti warɗi kadai su, gai dûgû edi silak, gai zizini gai futini lai.

⁴⁵ A hala a payasi marni zamai muguzak, na meefeŋɗi a suwa na wiini, e niyi amlai, e zizini siɗi warni. Ɗif hanɗa a bunda meefeŋ a suwa n'avut ɗa. Pinziba na meefeŋ na tiyana, aga a za siki nɵa lai.

Tamaini Yesu na jre jre

⁴⁶ Yesu a na fu aŋ muɗa gaini firiɗi ɗai hai, hlai n'emini gaiɗi tawalakaini e cûsi. E ɗiyi anene par, e firiyi e hiɗi kalaŋ gaini.

⁴⁷ Ɗif ktai a halasi a miɗini wiini Yesu, Tala, amuku gaiɗi tawalakaiku e ɗa anene, e firiyi e nivi gaiku.

⁴⁸ Amma a wiyini seŋ wiini ɗif n'a na miɗini seŋ ɗa: Ama te siya ɗa? Tawalakaya e ɗi miɗi siya ɗa?

⁴⁹ Asakal par, a maɗa tini edi midiɗi ɗaini zi hitri a muɗa, ama gaiɗi tawalakaya e ɗi na.

⁵⁰ Buri ɓa asiya ɗi paŋ n'a za dirini Apa na war fuŋ-n'Alaw, ni a tawala na wus gaiɗi na muni gaiɗi ama lai.