Matewus 10 - Ɗû na sɗik na wiini Alaw

Yesu a viriɗi ɗai zi hitri na doogo pi sulu

¹ Asakal par a yikiɗi ɗaini zi hitri na doogo pi sulu sini, a siɗi spak aŋ birga ksalai na haharai edi, aŋ zuula pinzibani veglek paŋ gaini huruf paŋ lai.

² Yikiɗi apostelai na doogo pi sulu a na maini nɵa: n'avut ɗa a Simun na zinani ɓa: Peter, gaini Andreya na tawalni, Yakob n'ahini Sebedewus gaini Yohana na tawalni.

³ Filip gaini Bartelemawus, Tomas gaini Matewus ɗif zi tiri lambu, Yakob n'ahini Alfewus gaini Tadewus,

⁴ Simun na Kanane gaini Yudas Iskariyot, ni n'a saŋ edi.

Sda zi ɵeŋ na wiiɗi na doogo pi sulu

⁵ Hanɗa e ɗi na doogo pi sulu na Yesu a ɵiniɗi edi, a gidiɗi, maini nɵa: ki hili warɗi futi na wiiɗi ɗai n'e ɗi pinzibaɗi Yudiyakai kai ɗa kai, ki niyi aha warni fuŋ n'abai na wiiɗi Samariyakai kaalai.

⁶ A pɗem ɓa ki hili sini adumai na war pinzibaɗi Izrayel n'a ba edi.

⁷ Won hlai na ki ɗa hili ɗa, ki ɓiki labar hanɗa edi ki miɗi: paini fuŋ-n'Alaw te ŋasi gobi.

⁸ Ki zûûliɗi zi veglek, ki ɵiyiɗi ɗai zi mri amai, ki bindiɗi zi dugomai hilu, ki birgi ksalai edi lai. Tiki ki niviŋ kadai, aga ki siŋ kadai lai.

⁹ Ki mili or zaw arzaŋ, zaw sulai zi kiya warni guɓaki kai,

¹⁰ sak burini morkoiki kai, gumazi sulu kai, harabak kai, amaraŋa kai, buri ɗif zi sɗa a kiɗa aŋ nava simini.

¹¹ War fuŋ n'abai zaw n'agwi paŋ na ki niyi li warni ɗa ki yimi labar pɗem, na ɓa ɗif n'a kiɗa a yimiki sini a na ɗa, ki simni ahani haa sini hiliki na warni par ta.

¹² Ki niyifu aha war dalam paŋ ɗa ki ɵiɓi wuti.

¹³ Na ɓa dalam hanɗa a kiɗa aŋ nava ɵeɗ hanɗa, ɵeɗ na wiiki aga a halasi miɗini, amma na ɓa, a kiɗa aŋ nava kai ɗa, ɵeɗ na wiiki a wayasi siki lai.

¹⁴ Won hlai n'e yimiki siɗi kai, na e ɵini seŋki kaalai ɗa, ki hili edi warni dalam hanɗa par, zaw war fuŋ n'abai hanɗa par ɗa ki ɵiɓi alogodo n'eziki edi.

¹⁵ Jre, mu miɗiki war mefeŋ zi sariya, afti na Sodoma gaini na Gomora aga a siɗa gir maini fuŋ n'abai hanɗa nɵa kai.

Gir n'aga a halasi

¹⁶ Ta mu ɵiniki maini adumai n'arbani belemke nɵa, buri nɵa ki bindi yalakai maini wala meefeŋ nɵa, hilu maini dere nɵa lai.

¹⁷ Ki giɗimi siki pɗem buriɗi ɗai, buri aga e siki edi miɗi sariya, aga e ɵûɗi siki edi gaini daɓala warni sinagogne na wiiɗi.

¹⁸ Aga e kiki wuzaɗi Lawanai gaiɗi paakai buriya ta, aga a za aŋ zaida buriɗi gaiɗi pinziba na Yudiyakai kai ɗa lai.

¹⁹ Amma won hlai n'e siki li edi ɗa, aga ki giriŋi burini miɗi n'aga ki miɗiŋ ɗa kai, buri seŋ n'aga ki miɗiŋ ɗa kaalai. Seŋ n'aga ki miɗiŋ ɗa aga a sa siki war hlai ni tizaw,

²⁰ buri aga ki miɗi ki ɗi tiki kai, amma seze na wiini Epiki n'a na warki ɗa aga a muɗa ɗa a ni.

²¹ Tawal aga a sa tawalni edi mini mri, api aga a sa ahini edi lai, ali aga e fiki amai siɗi tamaiɗi, e siɗi mini mri,

²² ɗai paŋ aga e bili gaw siki burini yikiŋa, amma ni n'a siika pini yimi haa hlai zi dibi, ni aga a kora.

²³ Na ɓa e ɗa ziki gir war fuŋ n'abai ktai ɗa, ki liwi warni na zamai, jre mu miɗiki aga ki gûni fuŋ n'abakai na Izrayel ɗa wuzani gizini ahini ɗif paŋ kai.

Nagai n'e yiki siɗi ɓa e ɗi na wiini Yesu

²⁴ Ɗif zi hitri a suwa api n'a hitraŋ ɗa kai, bege a suwa Epin-gezani kaalai.

²⁵ Ɗif zi hitri ɗa, a bunda maini api n'a hitraŋ ɗa ɵa, bege maini Epin-gezani ɵa lai. Na ɓa e yiki Epini dalam ɗa ɓa: Beelzebul, aga e yikiɗi nagai n'aha war dalamni ɵa azi gama ɗa?

Ni n'aga e hûniŋ

²⁶ Buri nɵa ki hûniɗi kai, buri wala na gaini ŋûyi cok n'aga a siŋka edi kai aŋ kai, wala n'a za war kuɗuhai n'aga a sɗa edi kai aŋ kaalai.

²⁷ Buri wala na mu miɗiŋki war gegeŋ ɗa, ki miɗiŋ edi war gaglai, wala n'a muɗa ɵimaki war helek ɗa, ki miɗiŋ edi amai midini daba zi mili.

²⁸ Ki hûniɗi nagai n'e fiɗi si, amma e kiɗi aŋ fiɗi suŋfaɗi agul ɗa kai ɗa kai, amma ki hûni n'a siɗa aŋ ba suŋfaɗi agul gaini si paŋ arni afu n'a vada kai.

²⁹ Zezek sulu a suma karanga ktai kai ɗi? Paŋktai, ktai n'arbani n'a kɵa azumai midini afti aŋ kai, sai pini dirini Epiki.

³⁰ Amma tiki ɗa, koo ayir na midiki kaw aŋ gaini pɵi ta.

³¹ Buri nɵa ki hûni kai, tiki ki sûwi zezek viya.

³² Buri nɵa, asiya ɗi paŋ n'a muɗa edi wuzani arɗi ɗai ɓa: ni a wiya, Ta lai, aga mu muɗa edi miɗini wuzani Apa na war fuŋ-n'Alaw lai.

³³ Amma na ɓa ɗif a ɓuɓura mini buriya wuzani arɗi ɗai, Ta aga mu ɓuɓura ma burini wuzani Apa na war fuŋ-n'Alaw.

Ɵeɗ kai, amma kaɵkar

³⁴ Ki hiini kai ɓa mu halasi aŋ kasi ɵeɗ midiɗi yai ɗi ɗa, a na ɵa kai, mu kasi ɗa a ɵeɗ kai, amma kaɵkar.

³⁵ Buri mu kasi ɗa a ɓraw arbani ɗif gaini epini, arbaɗi ahiyagwi gaiɗi emiɗi, arbaɗi munini ahi gaiɗi suwulɗi.

³⁶ Gawni ɗif paŋ e ɗi ɗai n'ahani dama.

³⁷ Ɗif n'a dara epini zaw emini a suwaŋa ta ɗa a kiɗa buriya kai, ni n'a dara ahini na wus zaw na muni a suwaŋa ta ɗa a kiɗa buriya kaalai.

³⁸ Ni n'a tika dagrani amai aŋ tapa pa kai, a kiɗa buriya kai.

³⁹ Ni n'a godo suŋfani li ɗa aga a baŋ, ni n'a ba suŋfani li buriya ɗa aga a navaŋ.

Na a yimiki li sini ɗa, a yimaŋa mu ta

⁴⁰ Ni n'a yimiki li sini ɗa a yimaŋa mu ta, ni n'a yimaŋa ta li sini ɗa a yima na ɗa a ni n'a ɵinaŋasi ɗa.

⁴¹ Ni n'a yima ɗif na mini Alaw sini, buri ɓa a ɗif na mini Alaw, aga a nava vrak na wiini ɗif na mini Alaw. Ni n'a yima ɗif na jre ɗikat sini buri ɓa a ɗif na jre ɗikat ɗa, aga a nava vrak na wiini ɗif na jre ɗikat.

⁴² Asiya ɗi paŋ n'a sa yem zi ci na ɗarak wiini ktai n'arbaɗi n'agogoi hanɗa buri ɓa a ɗif zi hitri ɗa, jre mu miɗiki vrakni aga a ba edi kai zaŋ.