Markus 8 - Ɗû na sɗik na wiini Alaw

Yesu a viɗi ɗai dubu puɗu midini aftiɗi ɗai zamai

¹ War mefeŋ ni ɗa, won hlai na firiɗi ɗai n'abai a tapa ɗa, wala n'e simiŋ aŋ kai, a yikiɗi ɗai zi hitri a miɗiɗi:

² Ɗai hanɗa e bindi ara haw, e zi gaya na ɗa mefeŋ hu e simi wala kai;

³ na ɓa mu tikiɗi piɗi li gaini wiyamai maini hanɗa ɵa ɗa, gdaŋɗi aga a vada warɗi futi, buri zamai arbaɗi e hilisi gaigai par.

⁴ Ɗaini zi hitri e wiyini seŋ: Hlai na mu ɗumu warni na ɗa, simi na mu nuvuŋmusi kapai ɗai e vi ɗa wata par ɗa?

⁵ A zilbiɗi: Peŋ aŋ tiki gama ɗa? E miɗini: Peŋ muguzak.

⁶ A miɗiɗi: miɗiɗi wiiɗi ɗai buri e simni azumai. Asakal par a mula peŋ na muguzak ɗa yaw, a sa tese, a ɗuklaŋ a siŋɗi wiiɗi ɗaini zi hitri buri e ɓûrwiŋɗi wiiɗi ɗai ɗa. Nagai e ɓûrwiŋɗi wiiɗi ɗai lai.

⁷ Hilif n'agogoi a na fu tiɗi agwi lai, a sa tese miɗini, a muɗa buri e ɓûrwiŋɗi lai.

⁸ E simi, e vi lai. E mili pini n'a hina amai, a va dologo muguzak.

⁹ Pɵaɗi a za gobi ɗai dubu puɗu, asakal par a tikiɗi piɗi e hili.

¹⁰ Asakal par a niya war hulum gaiɗi ɗaini zi hitri e hili midini afti na Dalmanuta.

Wala zi siŋki na warni hlai n'amai par aga a za kai

¹¹ Farisekai e hilisi sini, e tiki piɗi aŋ sispi gaini, aŋ titimiŋ lai, e zilbiŋ buri a ziɗi wala zi siŋki ktai na war hlai n'amai par.

¹² A suŋfa war sezeni a muɗa: Pinziba hanɗa e piyi wala zi siŋki buri ma ɗa? Jre mu miɗiki Wala zi siŋki aga a za siɗi kai zaŋ.

¹³ Asakal par a hiniɗi, a niya warni hulum, a bunda anene kata.

Is na wiiɗi Farisekai gaini na wiini Herod

¹⁴ Midiɗi a wula skeŋ, e mili peŋ tiɗi kai; peŋ a na fu tiɗi war hulum ktai pal.

¹⁵ A gidiɗi: Ki zi hangal, ki giɗimi siki gaini is na wiiɗi Farisekai gaini na wiini Herod.

¹⁶ Hanɗa, buri ɓa peŋ tumu kai ɗa.

¹⁷ Won hlai na Yesu a sɗa hanɗa, a miɗiɗi: Ki miɗi arbaɗi marki ɓa hanɗa buri peŋ tiki kai ɗa buri ma ɗa? A yima midiki kai hai ɗi? Midiki a mala kai ɵa ɗi?

¹⁸ Arki a na, amma ki tili kai, ɵimaki a na, amma ki ɵini kaalai ɗi? Midiki a kɵa kai zaŋ ɗi?

¹⁹ Won hlai na mu ɗukla peŋ na ɵim buriɗi ɗai na dubu ɵim ɗa, pini n'a hina ki miliŋ amai ɗa, a mula amai ɗa a va dologo gama ɗa? E miɗi: Dologo doogo pi sulu.

²⁰ Won hlai na mu ɗukla peŋ na muguzak buriɗi ɗai na dubu puɗu ɗa, pini n'a hina na ki miliŋ amai ɗa, a va dologo gama ɗa? E miɗi: A va dologo muguzak.

²¹ A miɗiɗi: Haa tiyana, ki ɵini kai hai?

Yesu a zuula ɗif na melveŋ a Betsaida

²² E cû a Betsaida, e kinisi ɗif ktai na melveŋ sini, e siiwiŋ buri a tikiti tini sini.

²³ A yima ɗif na melveŋ tini, a kaŋ edi war baŋa sini fuŋ par, a purfa teenek arni, a tikiti tini sini a zilbaŋ a muɗa: Ku na tala wala ktai ɗi?

²⁴ A mula arni, a muɗa: Mu na tala ɗai, e tili ara na ɗa maini luwuŋ nɵa, amma e ɗa e hili.

²⁵ A waya a tikiti tini miɗini arni pra, won hlai n'a mala arni edi azi n'ag'aŋ sulu ɗa, a tala pɗem, a bunda a tala wazagai paŋ ɗa edi gaglai maini n'a na ɗa ɵa.

²⁶ A tikini pini aha, a muɗa: Ku niya aha warni fuŋ kai.

Peter a muɗa ɓa, Yesu ɗa a Kristu

²⁷ Yesu gaiɗi ɗaini zi hitri e hili midini afti na Sezareya na wiini Filip, a tika pini aŋ zilbiɗi ɗaini zi hitri, a miɗiɗi: Ɗai e miɗi maɗa ɓa, mu siya ɗa?

²⁸ E wiyini seŋ e miɗi: Na zamai e miɗi ɓa: Ku Yohana zi Baptisme, na zamai ɓa, ku Eliyas, za zamai pra ɓa, ku ktai arbaɗi ɗai na mini Alaw.

²⁹ A zilbiɗi pra: Tiki, ki miɗi ɓa, Ta, mu siya lai ɗa? Peter a waya seŋ a miɗini: Tuku, ku Kristu.

³⁰ A gidiɗi buri e miɗi hanɗa edi sini ɗif kai.

Yesu a muɗa edi miɗini mrini gaini ɵiyini n'amai

³¹ A tika pini aŋ hitriɗi ɓa, Ahini ɗif aga a sɗa gir viya, n'abakai n'arbaɗi ɗai gaiɗi paakai zi ɓaka n'abakai gaiɗi ɗai zi ɗû wazagai lai, aga e hiniŋ edi, aga e fiɗiŋ edi lai, mefeŋ hu asakal par aga a ɵiya amai.

³² A muɗa seŋ hanɗa arɗi ɗai doogo. Nɵa Peter a yimaŋ edi kiini a tika pini aŋ gadaŋ.

³³ Amma Ni a bundasi arni, a tiliɗi ɗaini zi hitri, a ɓara Peter a miɗini: waya duɓa sek Satan, hiini na wiiku a na maini na wiini Alaw ɵa kai, amma a na maini na wiiɗi ɗai nɵa.

Futi zi tiki na pini Yesu

³⁴ A yikiɗi ɗai sini gaiɗi ɗai zi hitri lai a miɗiɗi: Na ɓa ɗif a dara a hala pa ɗa, sai a hiina sini kir kai, a tika dagrani wulani, a tapasi pa.

³⁵ Buri asiya ɗi paŋ n'a dara a kora suŋfani ɗa, aga a baŋ, amma asiya ɗi paŋ n'aga a ba suŋfani buriya, burini labar na pɗem lai ɗa aga a kurɗaŋ.

³⁶ Na ɓa ɗif a niviti yai gaini abaiɗi paŋ, amma na ɓa a ba suŋfaɗi agulni ta ɗa, pɗemni aŋ wata ɗa?

³⁷ Ɗif a sɗa aŋ bunda suŋfaɗi agulni gaini a ma ɗa?

³⁸ Buri ɓa asiya ɗi paŋ n'a za siyer buriya, burini seŋŋa lai, arbaɗi pinziba na maafanai, na tuwarai hanɗa, Ahini ɗif lai aga a za siyer burini, war hlai n'aga a halasi warɗi abai na wiini Epini gaiɗi ɗai zi ɵeŋ na war fuŋ-n'Alaw par na sɗik pini.