Markus 3 - Ɗû na sɗik na wiini Alaw

Ɗif na tini gaini mri

¹ A niya warni sinagogne pra, ɗif na tini gaini mri aŋ woni,

² E tiki hangalɗi sini Yesu aŋ tili wala n'aga a zaŋ ɗa, na ɓa a zuulaŋ li warni Sabbat ɗa, e siɗi e pi seŋ midini.

³ A miɗini wiini ɗif na tini gaini mri: Faka amai, ɗiyaɗi tuku na zaw wuzani arɗi ɗai paŋ.

⁴ Asakal par, a zilbiɗi a muɗa: Seŋ zi gadai a sa futi wiini ɗif aŋ za war Sabbat ɗa a ma ɗa? Aŋ za wala na pɗem, zaw na meefeŋ ɗi? Aŋ kurɗa ɗif, zaw aŋ fuɗa ɗif ɗi? E simni hiyak e diri e miɗi kai.

⁵ A tika pini aŋ gûliɗi gaini sûwi kaŋ buri e diri e ɵini kai, a miɗini wiini ɗif na tini gaini mri su ɗa: miɗitisi tuku edi. A miɗitisi edi, tini te bunda pɗemi.

⁶ Won hlai n'e niyi anene tar, Farisekai e kiti miɗi gaiɗi ɗai na wiini Herode aŋ piyi yel na kapai e fiɗiŋ edi gaini.

Firiɗi ɗai e hilisi siini Yesu ɵimaɗi yem-ra n'abai

⁷ Yesu a yima sini edi gaiɗi ɗaini zi hitri agoɗom wulani yem-ra n'abai, firi n'abai a tapa pini; ɗai na Galileya par, na Yudiya par,

⁸ na Yeruzalem par, na Idumeya par, na war gal n'anene duɓani Yurdan par, na gobi ɵimaɗi Tirus gaiɗi Sidon par lai, won hlai n'e ɵini sɗa n'a na zaŋ ɗa, e hilisi sini.

⁹ A miɗiɗi wiiɗi ɗaini zi hitri buri e piyitini hulumi ta kapai ɗai e pirɵiŋ kai.

¹⁰ Won hlai n'e tili ɓa a na zuula ɗai viya ɗa, ɗai na veglek siɗi paŋ e rimi aŋ tiki tiɗi sini.

¹¹ Ksalai lai, won hlai n'a tala li Yesu ɗa, a kɵa azumai wuzani, a ɗuula nɵa: tuku k'Ahini Alaw.

¹² Amma a ɓiriɗi gaini gadaŋ buri e miɗi edi wiini ɗif kai.

Yesu a viriɗi na doogo pi sulu

¹³ A niya amai midiɗi huwuŋ, a yikiɗi nagai n'a dara a yikiɗi ɗa, e hilisi sini.

¹⁴ A vara arbaɗi par ɗai doogo pi sulu, a siɗi yiki ɓa: Apostelai kapai e zi aŋ ɗai na wiini kapai a ɵiniɗi edi aŋ ɓiki seŋ,

¹⁵ gaini spak n'e birgi ksalai edi gaini lai.

¹⁶ A viriɗi na doogo pi sulu, yikiɗi a na maini nɵa: Simun na zinani ɓa: Peter.

¹⁷ Yakob n'ahini Sebedewus gaini Yohana na tawalni, a ɵiɗi zina ɓa: Bowanerges; a dara a muɗa ɓa pinzibani Alaw zi ɓarai gaini,

¹⁸ Andreya, Filip, Bartimewus, Matewus, Tomas, Yakob n'ahini Alfewus, Tadewus, Simun na Kanan,

¹⁹ gaini Yudas Iskariyot n'a saŋ edi mini mri lai.

Yesu a za sda aŋ bonu gaini ksalai ɗi?

²⁰ Asakal par e wiyisi aha, Firiɗi ɗai a tapasi pra, haa Yesu gaiɗi ɗaini e kiɗi aŋ simi ɓuk kai.

²¹ Zagalakaini e ɵini labar hanɗa e hili aŋ yimiŋsi, buri e hiini ɓa a na pɗem kai.

²² Ɗai zi ɗû wazagai e hilisi, amai a Yeruzalem par, e miɗi: Beelzebul aŋ miɗini, a birga ksalai na ɗa gaini paiɗi ksalai.

²³ Yesu a yikiɗisi sini a midiɗi war seŋ zi siŋka maini: Satan a sɗa a birga ksalai edi maɵa maɵa ɗa?

²⁴ Na ɓa pai te za gaw sini siɗi dama ɗa, pai na te siɗa aŋ ɗiya kai.

²⁵ Na ɓa dalam a za gaw sini dama, dalam hanɗa a sɗa aŋ ɗiya kaalai.

²⁶ Nɵa ɓa Satan a faka amai sin sini dama, aŋ za gaw sini dama lai ɗa, spakni a sɗa aŋ ɗiya kai, aga a vada edi kadai.

²⁷ Na ɓa ɗif a nagga ɗif na gdaŋ avut kai ɗa, a sɗa aŋ niya war dalamni aŋ vurma wazagaini kai, na ɓa a nagaŋ ɓak li ɗa, a sɗa aŋ vurma dalamni.

Tirki na sini Seze sɗik

²⁸ Jre jre, mu miɗiki ɗai aga e nivi ni burini tuwurɗi paŋ gaini tirkiɗi n'e tirki paŋ lai,

²⁹ amma ni n'a tirka Seze sɗik, aga a nava ni kai, tuwur aŋ miɗini haa hlai n'a vada kai n'a vada kai.

³⁰ Buri e miɗi gaini ɓa seze na meefeŋ aŋ miɗini.

Emini Yesu gaiɗi tawalakaini

³¹ Emini gaiɗi tawalakaini e cûsi, e simni anene par, e ɵini pini aŋ yikiŋsi.

³² Firiɗi ɗai e gûniŋ amlai gun, ɗai e hilisi e miɗini: Amuku gaiɗi tawalakaiku na maagai gaiɗi na falakai lai e ɗa anene, e ɗa piyuku.

³³ A waya seŋ a miɗiɗi: Ama te siya ɗa? Gaiɗi tawalakaya ɗa? E ɗi miɗi asiya ɗa?

³⁴ A ɵa arni, a tiliɗi nagai n'e simni, n'e gûniŋ azumai a muɗa: Ama gaiɗi tawalakaya e ɗi ɗai hanɗa.

³⁵ Buri asiya ɗi paŋ n'a za diri na wiini Alaw, ni a tawala na wus gaiɗi na muni, a ama lai.