Lukas 9 - Ɗû na sɗik na wiini Alaw

Yesu a ɵiniɗi na doogo pi sulu edi

¹ A yikiɗi na doogo pi sulu, a siɗi spak miɗini ksalai paŋ, aŋ zûûli veglek lai.

² E ɵiniɗi edi buri e ɓikiti pai na wiini Alaw, aŋ zûûliɗi nagai zi veglek.

³ A miɗiɗi: ki tiki wala ktai tiki buriɗi morkoiki kaalai, amaraŋa kaalai, guɓo kaalai, wala zi simi kaalai, arzaŋ kaalai; ɗif a mula sapa sini sulu kaalai.

⁴ Dalam na ki niyi li aha warni paŋ ɗa, ki simni woni ɵa, na ɓa ki hili a hili ɗa, ki fiki ɗa woni par.

⁵ Woɗi paŋ na ɗai e diri e yimiki siɗi kai ɗa, won hlai na ki niyi edi warni fuŋ n'abai hanɗa par, ki ɵiɓi alogodo n'eziki ɗa edi aŋ zaida siɗi.

⁶ E hili, e tiki piɗi e vigi warni fuŋ n'agogoi agogoi paŋ, e ɓiki labar na pɗem, e zûûliɗi ɗai zi veglek war hlai paŋ lai.

Herod a huna buri Yesu

⁷ Herod a abai na midini galni afti na wiiɗi pai n'ag'aŋ puɗu, a ɵina labarni wazagai n'a na ɗa paŋ, a tika pini a huna buri zamai e miɗi: Yohana a ɵiyasi amai arbaɗi zi mri par ɵiya.

⁸ Zamai ɗa ɓa a siŋkasi sini na ɗa a Eliyas, na zamai pra ɓa, a ɵiyasi amai na ɗa, a ktai arbaɗi ɗai na mini Alaw na ɗipar.

⁹ Herod a zilba sini ba: Yohana ɗa, mu ɗukla midini edi mu ta, ni na mu ɵina labar miɗini maini hanɗa ɵa ɗa, ni asiya ɗa? A paya futi aŋ talaŋ.

Yesu a viɗi ɗai dubu ɵim

¹⁰ Apostelai, won hlai n'e wiyisi edi par ɗa, e miɗini wiini Yesu gaini wazagai n'e ziŋsi ɗa paŋ. A miliɗi pini, a yima sini edi war baŋa gaiɗi ɵimaɗi fuŋ n'abai ktai na yikini ɓa: Betsaida.

¹¹ Firiɗi ɗai e siɗi hanɗa, e hili pini, a yimiɗi gaini firiyi a miɗiɗi midiɗi pai n'Alaw, a zûûliɗi nagai n'e ɗa piyi zûûli lai.

¹² Won hlai n'e tiliti futi te hala li ɗa, na doogo pi sulu e hilisi sini Yesu e miɗini: Ku tikiɗi piɗi ɗai ta kapai e hili e piyi hlai zi feŋ, e piyi wala zi simi war fuŋ na agogoi n'aŋ ɵimaɗi hlai, buri mu ɗumu na ɗa edi warni basga.

¹³ Amma a miɗiɗi: Tiki dama siɗi simi. E miɗini: Peŋ n'aŋ tiyi ɗa a suwa ɵim kai, hilif ɗe a suwa sulu kaalai, sna na ɓa tiyi dama mi hili li aŋ wirisi wala zi simi buriɗi ɗai hanɗa paŋ.

¹⁴ Ɗai ɗa e zi dubu ɵim, a miɗiɗi wiiɗi ɗaini zi hitri buri e miliɗi azumai midiɗi marɗi doogo doogo ɵim-ɵim.

¹⁵ E ziŋ maini hanɗa nɵa, e miliɗi azumai paŋ.

¹⁶ A mula peŋ na ɵim gaini hilif na sulu lai, a bunda arni amai war hlai n'amai, a sa tese sini Alaw burini wazagai hanɗa. Asakal par a ɓurwaŋ, a tika pini a siŋɗi wiiɗi ɗaini zi hitri kapai e ɓûrwiŋ wiiɗi ɗai.

¹⁷ Ɗai paŋ e simi, e vi. Pini n'a hina, e tipiŋ amai ɗa a va dologo doogo pi sulu.

Peter a muɗa ɓa: Yesu a Kristu

¹⁸ Mefeŋ ktai, won hlai n'a na siiwa edi warni baŋa, ɗaini zi hitri e ɗa gaini lai, a zilbiɗi a muɗa: Ɗai e miɗi ɗa ɓa, Ta mu asiya ɗa?

¹⁹ E wiyi seŋ e miɗi: Na zamai ɗa ɓa ku Yohana zi baptisme, na zamai ɗa ɓa, ku Eliyas, na zamai pra ɓa, ku ktai arbaɗi ɗai na mini Alaw na ɗipar n'a ɵiyasi amai arbaɗi zi mri par.

²⁰ A miɗiɗi: Tiki koo, ta mu siya lai ɗa? Peter a waya seŋ a muɗa: Ku Kristu na wiini Alaw.

²¹ A ɓiriɗi, a gidiɗi miɗi buri e miɗi hanɗa wiini ɗif kai.

²² A muɗa pra: Ahini ɗif ɗa aga a sɗa gir viya, n'abakai n'arbaɗi gaiɗi paakai na abakai zi ɓaka gaiɗi ɗai zi ɗû wazagai aga e biliŋ edi arbaɗi par, e fiɗiŋ edi lai, war mefeŋ n'ag'aŋ hu ɗa aga a ɵiya amai.

Hili na pini Yesu

²³ A miɗiɗi wiiɗi ɗai paŋ ɓa: Na ɓa ɗif a firiya a halasi pa ɗa, a bla gaw sini sini dama, a tika dagrani wulani mefeŋ paŋ kapai a hala pa.

²⁴ Buri asiya ɗi paŋ n'a dara a kurɗa suŋfani aga a baŋ, amma asiya ɗi paŋ n'aga a ba suŋfani aga a kurɗaŋ.

²⁵ Na ɓa ɗif a niviti yai gaini abaiɗi paŋ, amma a ba sini edi, zaw a tuura sini edi ɗa, pɗem na wiini aŋ waa ɗa?

²⁶ Buri nɵa asiya ɗi paŋ n'aga mu za siyer buriya, burini seŋŋa lai ɗa, Ta Ahini ɗif aga a za siyer burini lai won hlai n'aga mu wayasi warɗi abai ɗa, warɗi abai na wiini Apa, gaiɗi na wiiɗi ɗai zi ɵeŋ na war fuŋ-n'Alaw na sɗik lai.

²⁷ Mu na midiki a jre, zamai arbaɗi nagai n'e ɗiyi won na ɗa, aga e siɗi mri kai haa e tiliti pai n'Alaw.

Sini Yesu a bunda amai midiɗi huwuŋ

²⁸ Mefeŋ mitwis asakal n'a muɗa hanɗa ya, Yesu a yima Peter gaini Yohana gaini Yakob lai gaini, a niya amai midiɗi huwuŋ aŋ siiwa.

²⁹ Won hlai n'a na siiwa, wuzani arni a bunda, sapa na sini a bunda muɗukwi tal.

³⁰ Ɗai sulu e ɗi fu gaini ca aŋ hiɗi kalaŋ, hanɗa a Musus gaini Eliyas.

³¹ Nagai e siŋki siɗi edi warɗi abai na sini Alaw par, e miɗi miɗini yimini n'edi n'aga a va amai war Yeruzalem.

³² Peter gaiɗi marni weseŋ a suwa gdaŋɗi gara, won hlai n'e ɵiyi amai ɗa, e tiliti abai na wiini gaiɗi ɗai na sulu n'e ɗa gaini.

³³ Won hlai na ɗai e diri e yimi siɗi edi sini Yesu par ɗa, Peter a miɗiɗi: Api zi hitri, simnumu na won na ɗa pɗem, mu zuzunumu gumu hu, na ktai buriku, ktai burini Musus, na ktai burini Eliyas lai. Wala n'a niyasi mini par na ɗa a sɗaŋ kai.

³⁴ Won hlai n'a na muɗa hanɗa, ɗugul a halasi a dûgûɗi, hunai a yimiɗi gara, won hlai n'e niyi warni ɗugul.

³⁵ Arni ɗugul par, wule a wasi a muɗa: Hanɗa a ahiya na mu varaŋ edi ɗa, ki ɵini pini.

³⁶ Won hlai na wule a wa li ɗa, Yesu a hina kiini zaw, ɗai zi hitri e wi piɗi liyik; wala na e tiliŋ ɗa, e miɗi gaini wiini ɗif kai war mefeŋ ni ɗa.

Yesu a zuula ahiyagwi na gaini ksalai miɗini

³⁷ Dawaini, won hlai n'a niyasi azumai amai midiɗi huwuŋ par li, ɗai viya e hilisi sini.

³⁸ Arbani firi par ɗif ktai a ɗuula a muɗa: Api zi hitri, za barka, talaŋa ahiya haw, buri ahiya ɗa a ni ketekeɗik.

³⁹ Seze ktai a na sini, a yimaŋ li ɗa, tizaw a ɗuula, a gidiyaŋ gdaŋ, mini a ha meɵeɵepe, a hinaŋ gaini gir, gaini kayai gaini wuruk.

⁴⁰ Mu siiwiɗi ɗaiku zi hitri buri e birgiŋ edi, amma e kiɗi kai.

⁴¹ Yesu a muɗa: Pinziba na gaini yimi kai, na maafanai, aga mu sumna gaiki ɵa haa kaswata ɗa ta? Aga mu libiki ɵa haa kaswata ɗa? Kasi ahiku won na.

⁴² Won hlai n'a na halasi sini sek ɗa, ksalai a blaŋ azumai, a gidiyaŋ gdaŋ. Amma Yesu a ɓara ksalai, a zuula arwagwi ɗa, a siŋni wiini epini ɗa lai.

⁴³ Nagai paŋ e bindi hiyak buriɗi abai na wiini Alaw. Won hlai na ɗai paŋ e bindi hiyak burini wazagai paŋ n'a na zaŋ ɗa, a muɗa siɗi ɗaini zi hitri:

Yesu a muɗa edi pra burini mrini na wuzani

⁴⁴ Tiki ɗa ki ɵini seŋ hanɗa pɗem, Ahini ɗif aga a sa edi tiɗi ɗai.

⁴⁵ Amma e ɵini ezini seŋ hanɗa edi kai, a na fu gaini ŋûyi cok wuzani arɗi, kapai e ɵini ezini kai; E hûni buri e zilbiŋ burini seŋ hanɗa.

Abai n'arbaɗi asiya ɗa?

⁴⁶ Ɗai zi hitri e tiki piɗi e zilbi arbaɗi marɗi: Aga a za aŋ abai arbamu ɗa asiya ɗa?

⁴⁷ Won hlai na Yesu a sɗa hiiniɗi, a yima arwagwi ktai a tikaŋ ɵimaɗi ta,

⁴⁸ a miɗiɗi: Asiya ɗi paŋ n'a yima arwagwi hanɗa sini war yikiŋa ɗa, a yimaŋa Mu ta. Asiya ɗi paŋ n'a yimaŋa Ta ɗa a yima ɗa A ni n'a ɵinaŋasi, buri ni n'a na agwi arbaki paŋ ɗa, a na abai n'arbaki.

Ni n'a na aŋ gawki kai ɗa, a na gaiki

⁴⁹ Yohana a waya seŋ a muɗa: Api zi hitri, mi nivisi ɗif ktai a na birga ksalai edi war yikuku, mi piyi futi aŋ ɗiliŋ buri ni aŋ puku gaiyi kai.

⁵⁰ Yesu a miɗini: Ki ɗiliŋ kai, ɗif n'a na aŋ gawki kai ɗa, a na gaiki.

Fuŋ ktai na wiiɗi ɗai na Samariya a dara a yima Yesu sini kai

⁵¹ Won hlai na mefeŋ ni n'aga a yima amai woni a ŋasi gobi ɗa, a rga warni buri a hala a Yeruzalem.

⁵² A ɵina ɗai wuzani, nagai e fiki e hili e niyi warni fuŋ ktai na wiiɗi ɗai na Samariya buri e zizini hlai woni.

⁵³ E yimiŋ siɗi kai, buri a hala na ɗa a Yeruzalem sek.

⁵⁴ Won hlai na ɗaini zi hitri: Yakob gaini Yohana e tili hanɗa, e miɗi: Epiɗ-ɗai, ku dara ɓa mi yikisi afu war hlai n'amai par a halasi a yiɗi edi ɗi?

⁵⁵ A bunda arni siɗi, a ɓiriɗi;

⁵⁶ E hili warni fuŋ zamai.

Ɗai n'e diri aŋ tipi pini Yesu

⁵⁷ Won hlai n'e ɗa warɗi futi yaw, ɗif ktai a miɗini: Mu dara mu tapa puku woɗi paŋ na ku dara ku hala.

⁵⁸ Yesu a miɗini: Huɗi ɗa, waŋni a na, wala zi ɗufli n'arbani hlai n'amai gutni a na lai. Amma Ahini ɗif ɗa, hlai n'a sumna woni buri sini amla maa aŋ kai.

⁵⁹ A miɗini wiini na zamai: Tapasi pa. Amma ɗif a miɗini: Epiɗ-ɗai, hinaŋa mu hala mu pasi apa tiɓ haw.

⁶⁰ Yesu a miɗini: Hiniɗi zi mri e pi ɗaiɗi zi mri, tuku ɗa, hala aŋ ɓikiti pai n'Alaw ɗa edi.

⁶¹ Ɗif zamai a miɗini: Epiɗ-ɗai, mu firiya mu tapa puku, amma ku hinaŋa mu miɗiɗisi wiiɗi ɗai n'ahaya ta haw.

⁶² Yesu a miɗini: Asiya ɗi paŋ n'a faka li aŋ hirma gaini saret, na ɓa a tala arni duɓani sek ɗa, a nafa warɗi pai na wiini Alaw kai.