Lukas 24 - Ɗû na sɗik na wiini Alaw

Ɵiyi n'amai na wiini Yesu

¹ War Dimas gorof par cup ɗa, e hili min waŋ ɗa gaini wazagai zi ɗûgûdi zi lûgûzi gaini emel n'e ziziniŋ ɗa lai tiɗi.

² E niviti funi ɗa gaini likiti edi mini waŋ ɗa par.

³ E niyi amlai warni, amma e nivi kopoŋni Epiɗ-ɗai Yesu kai.

⁴ Won hlai n'e ɗiyi ca e siɗi wala n'e ziŋ ɗa kai ɗa, e tiliɗi ɗai sulu e ɗiyisi wuzaɗi par gaini sapa n'a ŋala gara siɗi.

⁵ Hunai a yimiɗi gara e pi arɗi azumai midini afti, ɗai ɗa e miɗiɗi: Ki piyi na karni arbaɗi zi mri buri mada?

⁶ Ni aŋ won na kai, a ɵiya amai ya, ki hini midiki a kɵa burini seŋ n'a miɗiŋki won hlai na nasi ka war Galeliya, a miɗiki ɓa:

⁷ A dewele ɓa, Ahini ɗif a sa edi war tiɗi ɗai na tuwarai, a toko amai sini luwuŋ zi dagra, war mefeŋ n'ag'aŋ hu ɗa, a ɵiya amai.

⁸ Won hlai ni, midiɗi a kɵa gaini seŋni Yesu ɗa.

⁹ E wiyisi mini waŋ par, e hili e miɗiɗi wiiɗi na doogo pi ktai gaiɗi na zamai ɗa lai miɗini wala n'a za ɗa.

¹⁰ Hanɗa e ɗi miɗi: Mariya Magdalena gaiɗi Yowana, gaiɗi Mariya n'emini Yakob gaiɗi falakai zamai zamai n'e ɗa gaiɗi lai. E miɗi n'a za wiiɗi Apostelai.

¹¹ Amma seŋ hanɗa, a tala arɗi maini seŋ na nafani aŋ kai nɵa, e yimi seŋɗi kai.

¹² Gaini hanɗa paŋ Peter a faka a lawa edi mini waŋ. Won hlai n'a goɓa azumai ɗa, a tala sapa n'e fiɗiŋ gaini ɗa azumai ca. Asakal par a waya wiini aha, a bunda hiyak burini wala n'a za ɗa.

Morkoi na Emmawus sek

¹³ Mefeŋ ni dama, zamai sulu arbaɗi par e hili warni fuŋ ktai n'e yikini ɓa: Emmawus, arbani na gaiɗi Yeruzalem ɗa a za kilometir yaw.

¹⁴ E ɗi fu aŋ hiɗi kalaŋ midini wazagai n'a za ɗa arbaɗi marɗi.

¹⁵ Won hlai n'e ɗa e hiɗi kalaŋ, e sispi midini wazagai zamai zamai lai ɗa, Yesu gaini midini dama a torosi gobi gaiɗi, e kiti morkoiɗi piɗi marɗi.

¹⁶ Arɗi sini ca sme, amma e siɗiŋ ɓa A ni nɵa kai.

¹⁷ A miɗiɗi: Wala na ki sispi miɗini miɗini eziki yaw na ɗa a mada? Nagai e ɗiyi ca, siɗi a kwima gara.

¹⁸ Ktai arbaɗi na yikini ɓa: Kleyopas a waya seŋ a miɗini: Tuku ku morkoiɗi, na ku hina warɗi Yeruzalem blaŋ ku sɗa wala n'a za war mefeŋ hanɗa kai ɗa?

¹⁹ A miɗiɗi: A za ɗa a mada? E miɗini: Wala n'a za sini Yesu na Nazaret par, n'a na ka a ɗif na mini Alaw zi spak war sda, war seŋ zi miɗi lai, wuzani Alaw, wuzani arɗi ɗai lai.

²⁰ Paakai n'abakai zi ɓaka na wimu gaiɗi n'abakai e siŋ edi kapai sariya zi mri te ko miɗini, e tûkûŋ amai sini luwuŋ zi dagra lai.

²¹ Tiyi mi hiini ɓa a ni n'aga a sa pli n'edi wiiɗi Izrayel ɗa, gaini hanɗa paŋ ɗa girna ɗa a mefeŋ n'ag'aŋ hu asakal na wala hanɗa a za ɗa.

²² Falakai zamai arbayi par e bindi yi hiyak gara, e hili mini waŋ goprof n'abai hanɗa,

²³ won hlai na e nivisi kpoŋni kai, e hilisi e miɗiyi ɓa: Ɗai zi ɵeŋ na warni fuŋ-n'Alaw par e siŋki siɗi, e miɗiɗi ɓa ni aŋ karni.

²⁴ Zamai arbayi par e hili mini waŋ, e nivi wazagai ɗa maini na falakai e miɗiŋɗi nɵa, amma ni mal ɗa e tiliŋ kai.

²⁵ Yesu a miɗiɗi: Tiki, midiki gdaŋ, ki yimi seŋ na ɗai na mini Alaw e miɗiŋ ɗa kai.

²⁶ A na ɗa ɓa, Kristu ɗa a sɗa gir maini hanɗa ɵa, kapai asakal par a niya warɗi abai na wiini kai ɗi?

²⁷ A tikasi pini sini maktuɓ na wiini Musus par, war lokwita na wiiɗi ɗai na mini Alaw paŋ lai. A siŋkiɗi edi war ɗû par wazagai n'a muɗa miɗini ni ɗa paŋ.

²⁸ Won hlai n'e ŋi gobi gaini fuŋ n'e diri e hili woni ɗa, a za sini maini ɗif n'a dara a vuga wuzani sek ɵa,

²⁹ e siiyi mini e miɗi: Sumna gaiyi won hlai n'aga mi fini woni ɗa buri futi te za koskoi ta, yuvai te vada vat ya. A niya amlai aŋ sumna gaiɗi.

³⁰ Won hlai n'a sumna azumai aŋ suma gaiɗi, a tika peŋ a sa tese sini Alaw, asakal par a ɓurwaŋ a siŋɗi.

³¹ Nɵa arɗi a mala edi e siɗiŋ, amma e tiliŋ a na arɗi kir kai.

³² E miɗi arbaɗi marɗi: Won hlai n'a nasi ka aŋ haɗa kalaŋ gaimu warɗi futi ɗa, n'a na ka a suŋkumu ezini ɗû edi lai ɗa, agulmu a firiya.

³³ War hlai ni dama, e fiki amai, e wiyisi a Yeruzalem, e niviɗisi na doogo pi ktai gaiɗi nagai n'e ɗi ka gaiɗi lai.

³⁴ Nagai e miɗiɗi: A jre Epiɗ-ɗai a ɵiya amai ya, a siŋka sini arni Simun lai.

³⁵ Nagai na sulu e miɗi miɗini n'a za siɗi warɗi futi ɗa, gaini siŋki na siŋka sini arɗi won hlai n'a ɓurwa peŋ ɗa.

Yesu a siŋka sini arɗi ɗaini zi hitri

³⁶ Won hlai n'e ɗa aŋ miɗi seŋ hanɗa, ni gaini midini dama a ɗiya arbaɗi zaw, a miɗiɗi: Ɵeɗ a sumna midiki.

³⁷ Amma e miliŋi gaini hunai n'abai, e hiini ɓa e tili na ɗa a sezeni ɗif zi mri ɗi.

³⁸ A miɗiɗi: Ki hûni buri mada? Ki giriŋi buri mada?

³⁹ Tili ta gaini aza ɗa, mu ta dama, titimiŋa. Tiliŋa pɗem buri seze ɗa, neŋ sini, keɵke sini lai maini na ki tiliŋ aŋ sa na ɗa ɵa kai.

⁴⁰ Won hlai n'a na muɗa hanɗa, a siŋkiɗi tini gaini ezini.

⁴¹ Ɗai zi hitri ɗa, firiyi a yimiɗi gara, e bindi hiyak gara lai, e diri e yimi ɓa A ni kai. Nɵa Yesu a miɗiɗi: Wala zi simi tiki kai ɗi?

⁴² E kinisi hilif zi viŋgi agwi.

⁴³ A tikaŋ, a sumaŋ wuzani arɗi.

⁴⁴ A miɗiɗi: Hanɗa a seŋ na mu na ka mu miɗiŋki, won hlai na mu na ka gaiki ɗa. A dewele ɓa, wazagai paŋ n'a ɗosi mada war ɗû na wiini Musus, war maktuɓ na wiiɗi ɗai na mini Alaw, war yama lai a va amai.

⁴⁵ Nɵa a mala hiiniɗi edi kapai e ɵini ezini ɗû ɗa.

⁴⁶ A miɗiɗi maini nɵa: Aŋ gaini ɗû ɓa: Kristu aga a sɗa gir, aga a ɵiya amai arbaɗi zi mri par war mefeŋ n'ag'aŋ hu lai.

⁴⁷ Bindi na gamai n'Alaw a haza tuwur edi burini ɗa, aga a muɗa edi sini pinzibaɗi ɗai paŋ, a tikaɗi pini aha warɗi Yeruzalem par.

⁴⁸ Tiki, ki ɗi zaidakaini seŋ hanɗa.

⁴⁹ Ta, aga mu ɵinasi wala na Apa a muɗa gaini ɗa midiki. Amma, tiki ki simnika aha warni fuŋ n'abai ɗa ca haa spak n'amai par a wa siki haw.

Yimi n'amai na wiini Yesu

⁵⁰ A kiɗi haa gobi gaiɗi Betaniya, A yima tini amai a ɓikiɗi.

⁵¹ Hlai n'a na ɓikiɗi ɗa, a ɓurwa gaiɗi a yima amai.

⁵² Nagai e hûrgû azumai wuzani, asakal par e wiyisi a Yeruzalem sek gaini firiyi n'abai.

⁵³ E simni kureɗ war tempel, e si tese sini Alaw lai.