Lukas 19 - Ɗû na sɗik na wiini Alaw

Yesu ahani Sakewus

¹ Yesu a niya war Yeriko, a vuga warni fuŋ n'abai ɗa ɗaw.

² Ɗif ktai, yikini Sakewus, a abaiɗi ɗai zi tar, faraini viya gara lai.

³ A paya aŋ tala Yesu, amma burini firiɗi ɗai, a kiɗa a talaŋ kai buri a wula gulai.

⁴ A lawa edi avut, a niya amai sini luwuŋ Sikomor buri a talaŋ, buri aga a vugasi woni ɗaw.

⁵ Won hlai na Yesu a co won hlai hanɗa, a tala arni amai a miɗini: Sakewus, niyasi azumai witaw, girna sai mu yiva ahaku.

⁶ Sakewus a niyasi azumai witaw aŋ yimaŋ sini gaini firiyi.

⁷ Won hlai n'e tili hanɗa, ɗai paŋ e ŋûriyi: A hala a sumna ahani ɗif na tuwur.

⁸ Amma Sakewus a fakasi amai a miɗini wiini Epiɗ-ɗai: Epiɗ-ɗai, galni faraiŋa ɗa, mu siŋɗi wiiɗi na murgakai, na ɓa mu tika walani ɗif li gaini gdaŋ ɗa, mu wiyiŋni ɵa ta ta azi puɗu.

⁹ Yesu a miɗini: Girna kûri a niyasi li warni dalam hanɗa, buri ni a na warni pinzibani Abraham lai.

¹⁰ Ahini ɗif a halasi aŋ paya, aŋ kurɗa wala n'a ba edi.

Seŋ zi siŋka maini miɗini sulai zi or

¹¹ Won hlai n'e ɗa ziɓiri seŋ hanɗa, a muɗa seŋ zi siŋka maini zamai ktai pra, buri ɓa a na fu gobi gaiɗi Yeruzalem, ɗai e hiini ɓa, Alaw aga a siŋkiɗi paini edi arbaɗi.

¹² Won hlai ni tizaw, a miɗiɗi maini nɵa: Ɗif ktai na war pinzibaɗi pai a hala midini afti na gaigai buri e tikiŋ aŋ pai midini aftini, kapai asakal par a wayasi lai.

¹³ A yika ɗaini zi sɗa doogo, a siɗi sulai zi or doogo lai a miɗiɗi: Ki cikili gaini haa sini mefeŋ na mu wayasi ɗa ta.

¹⁴ Amma ɗai na midini aftini ɗa e diri sini kai, e ɵini ɗai pini par aŋ miɗini wiini ni n'a tikaŋ aŋ pai ɗa ɓa: Tiyi mi firiyi ɓa ɗif hanɗa a suma pai midiyi kai.

¹⁵ Won hlai n'e tikiŋsi aŋ pai ta ɗa, a wayasi, a yikiɗi ɗaini zi sɗa n'a siɗi farai ɗa kapai e miɗini miɗini sdani n'e ziŋ ɗa.

¹⁶ N'avut a halasi wuzani a muɗa: Epin-geza, sulaiku zi or ɗa te wayasi piɗi doogo.

¹⁷ A miɗini, pɗem gara, tuku ku ɗif zi sɗa na pɗem, tuku ku kiɗa aŋ za sda gaini wala n'agwi, tiyana aga ku ŋa miɗini fuŋ n'abakai doogo.

¹⁸ N'ag'aŋ sulu a halasi a muɗa: Epin-geza, sulaiku te wa piɗi ɵim.

¹⁹ A miɗini: Tuku nɵa lai, aga ku ŋa miɗini fuŋ n'abakai ɵim.

²⁰ Zamai ktai a halasi a muɗa: Epin-geza, sulaiku zi or t'aŋ na, mu giɗimiti gaini fiɗi warni sapa tka.

²¹ Mu hunuku gara, buri ɓa tuku ku ɗif na maswar, hlai na ku tika wala warni kai ɗa maa, ku tikasi woni par, na ku suuɗaŋ kai ɗa, ku haɗaŋ lai.

²² A miɗini: Aga mu zutuku sariya ɗa pini miɗiku tuku dama, tuku ku ɗif zi sɗa na meefeŋ, ku sɗa ya ɓa, ta mu ɗif na maswar, ku sɗa ɓa hlai na mu tika wala woni kai maa mu tikasi woni par, na mu suuɗaŋ kai maa mu haɗaŋ lai,

²³ nɵa, ku sa faraiŋa edi tiɗi ɗai zi cakala kai ɗa buri mada? Mu wayasi an na ta ɗa, mu navaŋ fu na gaini riba pini.

²⁴ Asakal par a miɗiɗi wiiɗi nagai n'e ɗa ɵimaɗi ɗa: Tikiti sulai zi or ɗa edi tini par, sitini wiini ni na wiini doogo ɗa.

²⁵ E miɗini: Wiini a na doogo ɗa koo.

²⁶ Mu midiki: Ni na wiini a na ɗa, aga a sa sini pra. Na wiini aŋ kai ɗa, na tini par maa aga a yima edi.

²⁷ Gawŋa n'e firiyi ɓa, mu suma pai midiɗi kai ɗa, kiɗisi, ɵi wulaɗi azumai wuzani ara na.

Niyini Yesu aha warɗi Yeruzalem

²⁸ Asakal n'a muɗa maini hanɗa ɵa ya, a hala wuzani amai a Yeruzalem sek.

²⁹ Won hlai n'a ŋasi gobi gaiɗi Betfage, gaiɗi Betaniya lai siɗi huwuŋ na yikiɗi ɓa: Huwuŋ zi luwuŋ olive ɗa, Yesu a ɵiniɗi ɗaini zi hitri sulu wuzani,

³⁰ A muɗa: Ki hili warni fuŋ n'aŋ wuzaki na ɗa, ki cû li woni ɗa, aga ki nivi ahini ablehö gaini niggi ɓak, na ɗif a sumna ka miɗini duk kai, piliŋsi, kiŋsi.

³¹ Na ɓa, ɗif a zilbiki li ɓa, ki piliŋ amai buri maɗi ɗa? Ki miɗini ɓa: Epiɗ-ɗai hajani aŋ gaini.

³² Nagai n'a ɵiniɗi e hili, e nivi wazagai maini na Ni a miɗiŋɗi nɵa.

³³ Won hlai n'e ɗa pli ahini ablehö amai ɗa, tamaini e miɗiɗi: Ki pli ahini ablehö ɗa amai buri mada?

³⁴ Nagai e wiyi seŋ e miɗi: Epiɗ-ɗai, hajani aŋ gaini.

³⁵ E kiŋnisi wiini Yesu, e biri sapaɗi duɓani, e tiki Yesu amai midini.

³⁶ Won hlai n'a na hala wuzani sek, ɗai e biri sapaɗi azumai midini afti.

³⁷ Won hlai n'a torosi gobi gaini hlai n'e niyisi azumai midiɗi huwuŋ zi luwuŋ olive par warni ɗa, firiɗi ɗai zi hitri paŋ e tiki piɗi e kûli Alaw burini hiila n'abakai paŋ na e tiliŋ.

³⁸ E miɗi: Kol sini Ni n'a na halasi, na a pai war yikini Epiɗ-ɗai, ɵeɗ war hlai n'amai, abai war hlai na haa amai lai.

³⁹ Farisekai zamai arbaɗi firiɗi ɗai par e miɗini: Api zi hitri, ɓiriɗi ɗaiku zi hitri ɗa.

⁴⁰ Yesu a waya seŋ a muɗa: Koo ɓa nagai e bi ba ɗi, ali-fuŋ ɗa aga a ɗuula.

Yesu a tuwa midiɗi Yeruzalem

⁴¹ Won hlai n'a ŋasi gobi, a tala fuŋ n'abai ɗa a tuwa miɗini, a muɗa:

⁴² Na ɓa, tuku, war mefeŋ ni ku sɗa piyini ɵeɗ ya ɗa! Amma tiyana ɗa aŋ gaini ŋûyi arku cok.

⁴³ Buri mefeŋ aga a gizi muduku, na gawku aga e gunuku azumai gaini ɵaɓ, aga e pirɵuku war gal paŋ par,

⁴⁴ aga e siriku edi, tuku gaiɗi ɗai na warku paŋ, aga e hini ahi-fuŋ ktai amai midini maini kai, buri ku sɗa mefeŋ n'Alaw a luwuku ɗuwal warni ɗa kai.

Yesu a birgiɗi ɗai zi cakala edi warni tempel par

⁴⁵ Won hlai n'a niya amlai warni tempel ɗa, a tika pini aŋ birgiɗi ɗai zi cakala.

⁴⁶ A miɗiɗi: Aŋ gaini ɗû maini nɵa: Dalamŋa aga a za aŋ dalam n'e siiwi warni, amma tiki ki bindiŋ aŋ hlai zi simni na wiiɗi gorɓolokai.

⁴⁷ A hitra mefeŋ paŋ amlai warni tempel, paakai n'abakai zi ɓaka gaiɗi ɗai zi ɗû wazagai, gaiɗi n'abakai n'arbaɗi ɗai lai, e piyi aŋ fiɗiŋ edi.

⁴⁸ Amma e siɗi wala n'e ziŋ ɗa kai, buri ɗai paŋ e firiyi e ɵini seŋ na mini par.