Lukas 17 - Ɗû na sɗik na wiini Alaw

Wala n'a ka ɗif aŋ za tuwur

¹ Yesu a miɗiɗi wiiɗi ɗaini zi hitri: Gaini dewele wala n'a ka ɗai aŋ za tuwur ɗa aga a za, amma gir gara burini ni n'a za sini par ɗa.

² E rigiti wulani na ɗa te funi na guma aŋ wiŋ agoɗom warni yem-ra n'abai a suwa n'a ka ktai arbaɗi n'agogoi hanɗa war tanai ɗa.

³ Ki giɗimi siki pɗem. Na ɓa tawalku a za tuwur li ɗa ku gadaŋ, na ɓa a bunda payaini li gamai ɗa, hinini tuwurni ɗa.

Hinini tuwur

⁴ Na ɓa a za tuwur suku azi muguzak war yuvai, na ɓa a wayasi suku azi muguzak aŋ muɗa: Aga mu bunda hiiniɗa gamai ɗa, ku hinini meefeŋni ɗa.

Yimi

⁵ Apostelai e miɗini wiini Epiɗ-ɗai: Ku riya yimiyi amai a suwa.

⁶ Epiɗ-ɗai a wiyiɗi seŋ: Na ɓa yimiki aŋ maini Seneve ɵa ta ɗa, ki kiɗi ki miɗi sini luwuŋ Sikomor hanɗa ɓa: Hurɗa amai, hala ku pa warni yem n'abai; aga a gada piki lai.

Ɗif zi sɗa n'a za sda n'a sa tini ɗa

⁷ Arbaki ɗa, ɗif na ɗifni zi sɗa a na, aŋsi edi aŋ hirim, zaw aŋ giɗima farai ɗi, na ɓa, a wayasi li edi par, n'aga a miɗini ɓa: Halasi sumna azumai dam aŋ suma ɗa asiya ɗa?

⁸ Aga a miɗini ɓa: Daɗasi simi, wa sapaku zi sɗa suku, saɗasi simi ɗa, mu suma, mu ca lai. Aga a miɗini ɵa kai!

⁹ Aga a zini tese wiini ɗif zi sɗa hanɗa buri ɓa a zini wala n'a miɗini miɗini ɗi?

¹⁰ Nɵa, tiki lai, won hlai na ki zi li sɗa n'a sa tiki aŋ zi ɗa, ki miɗi ɓa: Tiyi mi ɗi ɗai zi sɗa kadai meere, mi zi ɗa a n'a sa tiyi aŋ zi ɗa.

Yesu a zûûliɗi ɗai na dugomai doogo

¹¹ War morkoini na Yeruzalem sek ɗa, a vuga arbaɗi Samariya gaiɗi Galeliya.

¹² Won hlai n'a na niya aha warni fuŋ sek ɗa, ɗai na dugomai doogo e hilisi mini, e ɗiyi edi gaigai par,

¹³ e ɗûûli gaini wulaɗi amai, e miɗi: Yesu, Epin-gezayi, hiina haw buriyi.

¹⁴ Won hlai n'a tiliɗi, a miɗiɗi: Ki hili, ki siŋki siki arɗi paakai zi ɓaka. Hlai n'e ɗa e hili, e bindi hilu.

¹⁵ Ktai arbaɗi, won hlai n'a tala ɓa a zuula ta ɗa, a wayasi miɗini ezini, a kola Alaw gaini gdaŋni,

¹⁶ a bla sini azumai ezini Yesu, a pa arni azumai, a zini tese lai. Ni ɗa a ɗif na Samariya par.

¹⁷ Yesu a zilba a muɗa: E bindi hilu gaini doogoɗi paŋ kai ɗi? Na ɵeeŋe ɗa e ɗa wata ɗa?

¹⁸ Na a wayasi aŋ sa kol sini Alaw ɗa a ɗif n'edi par hanɗa?

¹⁹ A miɗini: Faka amai, hala wiiku, yimiku a kuruku li.

Giziɗi pai n'Alaw

²⁰ Farisekai e zilbiŋ: Paini Alaw aga te halasi kaswata ɗa? A wiyiɗi seŋ: Paini Alaw te halasi ɗa maini wala n'arɗi ɗai sini ca nɵa kai.

²¹ Ɗai aga e miɗi kai ɓa: T'aŋ na, t'aŋsi na. Aga a za ɗa nɵa kai, buri ɓa pai n'Alaw te na arbaki ya.

Mefeŋ na wiini ahini ɗif

²² A miɗiɗi wiiɗi ɗaini zi hitri: Mefeŋ aga a gizi, war mefeŋ ni ɗa, aga ki piyi aŋ tili mefeŋ ktai na wiini gizini ahini ɗif, amma aga ki tiliŋ kai.

²³ Aga e miɗiki ɓa: Aŋsi na, zaw an na, ki hili woni kai, ki liwi woni kaalai,

²⁴ buri maini wilɗi n'a wulɗa war gal ktai par haa sini na zamai ɗa nɵa, gizini Ahini ɗif war mefeŋ n'a wayasi warni ɗa, aga a za nɵa lai.

²⁵ Amma aga a sɗa gir viya haw, pinziba n'a na tiyana hanɗa aga e biliŋ edi lai.

²⁶ Wala n'a za war mefeŋ ni Nowa ɗa, aga a aza war mefeŋ na wiini gizini Ahini ɗif nɵa lai.

²⁷ War mefeŋ ni ɗa, ɗai e ɗi ka e simi, e ci, e si aliɗi edi, e tiki lai haa sini mefeŋ na Nowa a niya warni hulum n'abai, yem n'abai a halasi a biɗi paŋ.

²⁸ Aga a za maini war mefeŋ na wiini Lot lai, ɗai e ɗi ka e simi, e ci, e wirisi wazagai e cikiliŋ edi, e pi luwaŋai, e rgi dalam lai.

²⁹ Amma mefeŋ na Lot a niyasi edi warɗi Sodoma par ɗa, faŋ z'afu gaini sufre a ɵasi amai par, a biɗi paŋ.

³⁰ Mefeŋ na Ahini ɗif aga a siŋkasi sini edi warni ɗa, aga a za ɗa nɵa lai.

³¹ War mefeŋ ni ɗa, ni n'a na amai midini daba zi mili, na ɓa wazagaini a na amlai ɗa, a niyasi azumai aŋ mulaŋ kai.

^32-33 Hini midiki a kɵa gaiɗi munini Lot, ni n'a paya aŋ kurɗa suŋfani ɗa aga a baŋ, amma ni n'aga a ba suŋfani aga a kurɗaŋ.

³⁴ Mu midiki, duvuk ni ɗa, ɗai sulu n'e fini warni li ktai, ktai aga a tika edi, na ktai aga a hina,

³⁵ falakai sulu n'e ɗa siri ktai, na ktai aga te tika edi, na ktai aga te hina,

³⁶ maɵagai sulu n'aga e hirmi edi war vowai, na ktai aga a tika edi, na ktai aga a hina lai.

³⁷ Ɗai zi hitri e zilbiŋ e miɗi: Aga a za nɵa wata ɗa? Yesu a waya seŋ a miɗiɗi: Hlai na kopoŋ aŋ woni ɗa, bagasakai aga a tapa woni kap.