Lukas 14 - Ɗû na sɗik na wiini Alaw

Yesu a zuula ɗif zamai na veglek war mefeŋ ni Sabbat

¹ War mefeŋ ni Sabbat, a halasi aŋ suma ahani ktai arbaɗi abaiɗi Farisekai, nagai e tiki hangalɗi sini ta.

^2-3 Ɗif na azini gaini hitili a na fu mini zaw, Yesu a zilbiɗi ɗai n'e siɗi gadai gara gaiɗi Farisekai lai a muɗa: Gadai na wimu ɗa a sa futi ɓa ku zuula ɗif war Sabbat, zawku zuula kai ɗi?

⁴ E bi miɗi liyik, asakal par a yima ɗif zi veglek, a zuulaŋ a tikini pini lai.

⁵ Asakal par a miɗini: Arbaki ɗa, ɗif na ahini zaw, ahini garini zaw, a kɵa li war kalaŋ war mefeŋ na wiini Sabbat ɗa, aga a yimaŋsi amai tizaw kai a na ɗi?

⁶ E kiɗi e wiyini seŋ midini hanɗa kai.

Piyi aŋ simni edi asakal

⁷ Yesu a muɗa seŋ zi siŋka maini siɗi ɗai n'e yikisi miɗi fet, buri a tiliɗi ɗa, e piyi ɗa a hlai n'amai avut, a miɗiɗi:

⁸ Won hlai na ɗif a yukuku li miɗi fet na wiini tiki ɗa, ku hala ku sumna amai avut kai, buri ɓa, ɵa kai ɗa, ɗif na hormani a suwuku a za ɗi.

⁹ Nɵa ɗif n'a yikikisi ɗa, a halasi a muɗuku ɓa; hinini balamku wiini ɗif ɗi ɗa, nɵa wiyi na e wiyikusi asakal ɗa aga ku tika siyer.

¹⁰ Amma won hlai na e yikuku li miɗi fet ɗa, ku hala ku sumnasi edi asakal par kapai ni n'a yikukusi a halasi li ɗa, aga a muɗuku ɓa: Mariya halasi amai avut sek. Nɵa aga ku nava kol wuzani arɗi nagai n'e ɗa e simi gaiku paŋ.

¹¹ Buri nɵa asiya ɗi paŋ n'a kola sini amai aga a hosa azumai, asiya ɗi paŋ n'a hosa sini azumai ɗa aga a kola amai lai.

Ku yikiɗi miɗi fet ɗa, e ɗi na murgakai ɗa

¹² A miɗini wiini ni n'a yikaŋsi ɗa ɓa: Won hlai na ku da simi n'abai li mini fet ɗa, koo ɓa girvudi, koo ɓa koskoi, ku yikiɗisi mini fet ɗa e ɗi marmakaiku gaiɗi tawalakaiku gaiɗi zagalakaiku gaiɗi ɗai na ɵimaku zi farai ɗa kai, ɵa kai ɗa nagai lai aga e yukuku mini fet kapai ku nava vrakku lai.

¹³ Amma won hlai na ku da simi li miɗi fet ɗa, ku yikiɗiɗi ɗa, e ɗi na murgakai, na gaɓaramai, na höyökai gaiɗi na malvanai lai.

¹⁴ Ɵeɗ muduku buri wala n'e vurguŋku gaini aŋ kai, nɵa aga ku nava vrakku war ɵiyi n'amai na wiiɗi na jre ɗikat.

Seŋ zi siŋka maini midiɗi fet n'amai

¹⁵ Asakal n'a ɵina seŋ hanɗa ya, ktai arbaɗi nagai n'e ɗi fu aŋ simi gaini a miɗini: Ɵeɗ miɗini ni n'aga a suma warɗi pai na wiini Alaw.

¹⁶ A wiyini seŋ a muɗa: Ɗif ktai a da simi n'abai miɗi fet, a yikasi ɗai viya lai,

¹⁷ war sarti na wiini simi ɗa, a ɵina ɗifni zi sɗa aŋ muɗa wiiɗi ɗai n'e yikiɗisi ɗa ɓa: Hilisi paŋ, a zizina li.

¹⁸ Amma nagai paŋ maini ɗif ktai ɵa, e tiki piɗi e miɗi ɓa: Aga e kiɗiɗi kai. N'avut a miɗini: Mu wura vowai kaai, tiyana mu hala na ɗa aŋ talaŋ, za barka yima seŋŋa ɗa.

¹⁹ Na zamai a muɗa: Mu wura garakai jaɓ jaɓ ɵim, mu hala fu aŋ tetemaŋ, za barka yima seŋŋa ɗa.

²⁰ Na zamai a muɗa: Mu tikiti muniya na ɗa gobi na, mu kiɗa mu halaɗi kai.

²¹ Ɗifni zi sɗa won hlai n'a wayasi ɗa, a miɗini seŋ hanɗa paŋ wiini epin-gezani, nɵa epin-gezani a za hiy, a miɗini wiini ɗifni zi sda: Witaw, hala warni futi n'abakai na war fuŋ n'abai ɗa gaini n'agogoi lai, ku yikiɗisi na murgakai, na geɓeremai, na malvanai, na höyökai lai won na.

²² Ɗifni zi sɗa a muɗa: Epin-geza, na ku muɗa gaini ɗa, mu zaŋ ya, hlai a va kai ɗaai.

²³ Epin-gezani a miɗini: Hala edi kawye, edi ezini ɵagakai lai ku siika miɗi ɗai buri e hilisi kapai dalamŋa a va gaiɗi ɗai.

²⁴ Buri mu miɗiki Nagai na mu yikiɗisi avut ɗa paŋ ɗa, ktai n'arbaɗi n'aga a tika simiŋa mini aŋ kai.

Hina paŋ edi aŋ tika futi pini Yesu

²⁵ Firiɗi ɗai viya e tipi pini woɗi futi, a bunda arni duɓani a miɗiɗi:

²⁶ Na ɓa ɗif a dara a halasi sa, amma a bula gaw sini epini, zaw emini, siɗi munini, zaw siɗi alini, siɗi tawalakaini na maɵagai gaiɗi na falakai, zaw sini suŋfani dama kai ɗa, a kiɗa aŋ za aŋ ɗif zi hitri na wiya kai.

²⁷ Asiya ɗi paŋ n'a luba dagrani aŋ halasi pa kai ɗa, a kiɗa a za aŋ ɗif zi hitri na wiya kai.

²⁸ Buri ɓa, arbaki ɗa, ɗif n'a dara a rga poriyo n'a sumna azumai aŋ tala gdaŋni haw kai ɗa asiya ɗa? Na ɓa a kiɗa a vadaŋ, zaw a vadaŋ kai ɗi ɗa?

²⁹ Kapai won hlai n'a tora eziɗi dilimi li azumai, na ɓa gdaŋni a kiɗa a vada sɗa kai ɗa, nagai n'e tiliŋ paŋ e zini yewere, e miɗi kai ɓa:

³⁰ Ɗif hanɗa a tika pini aŋ rga, amma sɗa ɗa a ɵa edi gaini kai ɗa kai.

³¹ Pai na ɗai pini dubu doogo, n'a dara a hala aŋ hitima gaini pai na ɗai pini dubu caaɓa, n'a sumna azumai aŋ talagdaŋni wuzani hlai kai ɗa, a pai na wata ɗa?

³² Na ɓa, a tala gdaŋni a kiɗa kai ɗa, a ɵina ɗai sini maini won hlai n'aŋsi gaigai par hai aŋ paya ɵeɗ gaini.

³³ Nɵa lai, asiya asiya ɗi paŋ n'arbaki, n'a bula edi sini wazagaini n'a na ɗa kai ɗa, a kiɗa a za aŋ ɗif zi hitri na wiya kai.

Humu na lemni aŋ kir kai

³⁴ Humu ɗa a wala na pɗem, amma na ɓa a ba lemni edi li ɗa, aga a bunda pɗem zamai ɗa gaini a mada?

³⁵ A kiɗa a zina pini afti kir kai, a zina pini zilgit kaalai, e pûkûŋ ɗa edi. Ni na ɵimani zi ɵeŋ a na, a pɗem ɓa a ɵina.