Lukas 12 - Ɗû na sɗik na wiini Alaw

Nagai n'e yiki siɗi ɓa e ɗi wiini Yesu

¹ Won hlai ni ɗa, ɗai dubu dubu e firi haa e ɗiyi maa miɗini eziɗi marɗi. Yesu a tika pini aŋ muɗa siɗi ɗaini zi hitri: Abai paŋ ɗa ki zi hangal burini is na wiiɗi Farisekai, a dara a muɗa rhai na wiiɗi Farisekai.

² Wala zi ŋoyai n'aga a siŋka edi kai aŋ kai, wala n'a za war kuɗuhai n'aga a siɗa edi kai aŋ kaalai.

³ Buri nɵa, na ki miɗiŋ war gegeŋ paŋ aga a ɵina edi war gaglai. Na ki miɗiŋ war helek amlai warni dalam amlai ɗa, aga a wa edi amai midini daba zi mili.

⁴ Mu midiki tiki marmakaiya, ki hûniɗi nagai n'e fiɗi si edi, na asakal par e kiɗi e zi wala ktai sini kir kai ɗa kai.

⁵ Mu dara mu siŋkiki Ni n'aga ki hûniŋ ɗa, ki hûni Ni na spakni a na buri a fuɗa si edi lai, asakal par a ɵiŋkaŋ warɗi avai z'afu lai ɗa, nkam mu miɗiki, ki hûni ɗa a Ni ɗa.

⁶ Zezek ɵim a suma sulai sulu kai ɗi, amma ktai n'arbani n'Alaw miɗini a wula gaini aŋ kai.

⁷ Ayir na midiki maa aŋ gaini piɵi tini ta, nɵa ki hûni kai, buri tiki ki nifi a suwa zezek na viya.

⁸ Mu midiki: Asiya ɗi paŋ n'a sɗa sini ba a wiya arɗi ɗai ɗa, Ta n'Ahini ɗif aga mu sɗaŋ ba a na wiya wuzaɗi ɗai zi ɵeŋ na wiini Alaw lai.

⁹ Amma ni n'aga a ɓuɓura mini buriya arɗi ɗai, Ta lai aga mu ɓuɓura ma burini wuzaɗi ɗai zi ɵeŋ na war fuŋ-n'Alaw.

¹⁰ Asiya ɗi paŋ n'a muɗa seŋ na meefeŋ sini Ahini ɗif, Alaw aga a hinini meefeŋni ɗa, amma ni n'a tirka Seze-sɗik ɗa, Alaw aga a hinini meefeŋni kai.

¹¹ Won hlai n'aga e kiki wuzani sinagogne, wuzaɗi paakai gaiɗi n'abakai ɗa, ki giriŋi miɗini n'aga ki wiyiŋ gaini n'aga ki miɗiŋ ɗa kai aŋ pli siki edi ɗa kai,

¹² buri Seze-sɗik aga a hitriki warni hlai ni dama burini wala n'aga ki miɗiŋ.

Seŋ zi siŋka maini midini ɗif zi farai na tatala

¹³ Ɗif ktai arbani firi par a miɗini: Api zi hitri, miɗini wiini tawala buri a ɓurwa bulum ɗa gaya.

¹⁴ A wiyini seŋ a muɗa: Ɗif n'a tikaŋa arbaki aŋ ɗif zi ɗûklûti sariya, zaw aŋ ɗif zi ɓûrwi wazagaiki ɗa asiya ɗa?

¹⁵ Asakal par a miɗiɗi: Ki zi hangal, ki giɗimi siki burini suuna na pini wazagai, buri ɓa suŋfani ɗif a za mogo ɗa burini wazagaini na viya kai, koo ɓa faraini viya tekeɗeɗi.

¹⁶ A miɗiɗi seŋ zi siŋka maini ktai maini nɵa: Ɗif zi farai ktai vowaini a za gaini futini gara,

¹⁷ a hiina gaini warni a muɗa: Kapai mu za maɵa buri hlai na mu mula seyemŋa woni aŋ kai?

¹⁸ A muɗa: Yawwa, aga mu ho vrekaiŋa na walakai ɗa azumai, mu rga zamai n'abakai a suwa kapai mu ɵapa algama na wiya gaini wazagaiŋa paŋ woni lai.

¹⁹ Aga mu muɗa sini suŋfaɗi-agula ɓa: Suŋfaɗi-agula, wazagaiku viya, a tapa li amai, a kiɗa buri buza viya, faana wiiku waŋ, ku suma gaini simi, ku ca lai, ku ɵa dawaŋ muku lai.

²⁰ Amma Alaw a miɗini: Tuku ɗif na tatala, duvuk ɗa haa, suŋfaku aga a tika edi, wazagai na ku tapaŋ amai ɗa aga ku hinaŋ wiini asiya ɗa?

²¹ Ni n'a tapa godai amai burini sini dama, amma a zi farai burini Alaw kai ɗa aga a za sini maini nɵa.

Hiini zi giriŋi

²² Asakal par a miɗiɗi wiiɗi ɗaini zi hitri: Mu midiki nɵa buri ɓa aga ki giriŋi burini suŋfaki kai, burini wala n'aga ki simiŋ ɗa kai, burini siki ɗa kai, burini sapa n'aga ki wiŋ siki ɗa kaalai.

²³ Buri ɓa suŋfa a suwa simi, si a suwa sapa ɗa lai.

²⁴ Tili sini zeleke, a suuɗa kai, a haɗa kaalai, magaziŋni n'a mula wazagaini warni aŋ kai, vreni aŋ kaalai, amma Alaw a sini simi, nɵa tiki ɗa ki sûwi wala zi ɗufli, ki siiwiŋ azi viya.

²⁵ Arbaki ɗa, n'a kiɗa a riya mogoni suŋfani edi agwi gaini giriŋini ɗa asiya ɗa?

²⁶ Na ɓa wala n'agwi hanɗa ki kiɗi miɗini kai ɗa, ki giriŋi burini wazagai na zamai ɗa buri mada?

²⁷ Tili sini miye n'edi buza, a wula ɗa a za sda kaalai, a duɓura aduzi kaalai; Salmun warɗi abaini tekeɗeɗi a wa sapa sini maini ktai arbaɗi nɵa kai.

²⁸ Na ɓa girna Alaw a gana evek n'a na edi warni basga maini hanɗa ɵa, paŋ ktai dawai aga a ɵiŋka arni afu ɗa, aga a za hanɗa siki tiki a suwa hanɗa kai ɗi? Tiki na gaini yimi n'agwi!

²⁹ Tiki ɗa, ki piyi wala n'aga ki simiŋ ɗa kai, n'aga ki ciŋ ɗa kaalai, ki hiwiyi siki kai

³⁰ buri wazagai hanɗa paŋ, ɗai n'e siɗi Alaw kai na warɗi yai hanɗa e piyiŋ wuzaɗi sek sek, amma tiki Epiki a sɗa ɓa jaaki aŋ sini wazagai hanɗa lai.

³¹ Ki piyiti te pai n'Alaw ɗa, wazagai hanɗa paŋ ɗa aga a sa siki aŋ beste.

³² Ki hûni kai fara n'agwi, buri a tala arni Epiki pɗem aŋ sitiki pai.

Godai n'amai warni fuŋ-n'Alaw

³³ Ki wûri wazagaiki edi, ki si faraini edi aŋ like wiiɗi na murgakai, ki zizini guɓa n'a tuura kai, ki tiki godai n'a vada edi kaalai, amai warni fuŋ-n'Alaw mihill a kiɗa woni kai, bumi a lumaŋ kaalai.

³⁴ Hlai na godaiku t'aŋ woni ɗa agulku t'aŋ woni lai.

Seŋ zi siŋka maini midiɗi ɗai zi sɗa n'e simni karɗi

³⁵ Ki simni gaini zizini, wuzaki gaini rgi, lampaki gaini afu warni ta ta lai.

³⁶ Tiki lai, ki simni maiɗi ɗai n'e ɗa biyi Epin-gezaɗi n'aŋsi miɗi fet na wiini tiki ɗa nɵa, kapai hlai n'a cosi, a ɵiɓa li mini hlai ɗa, e miliŋni edi tar.

³⁷ Ɵeɗ midiɗi ɗai zi sɗa n'Epin-gezaɗi a niviɗisi karɗi won hlai n'a wayasi. Jre, mu miɗiki Epin-gezaɗi aga a wa sapani zi sɗa sini, a miliɗi azumai aŋ simi, ni dama aga a kiɗisi simii ɗa lai.

³⁸ Koo ɓa a wayasi duvuk n'arba, koo ɓa gorof n'abai sek, na ɓa a niviɗisi li maini hanɗa ɵa ɗa, ɵeɗ midiɗi.

³⁹ Ki ɵini pɗem, na ɓa epini dalam a sɗa fu ler na ɗif zi mihill a halasi woni ɗa, aga a sumna karni, a hinaŋ a co dalamni kai.

⁴⁰ Tiki nɵa lai, ki simni gaini zizini, buri Ahini ɗif aga a wayasi warni ler na ki hiiniŋ kai.

Ɗif zi sɗa na jre kai

⁴¹ Peter a miɗini: Epiɗ-ɗai, seŋ zi siŋka maini hanɗa, ku muɗaŋ na ɗa buriyi tiyi taaha, zaw buriɗi ɗai paŋ ɗi?

⁴² Epiɗ-ɗai a muɗa: Ɗif zi giɗimi wazagai, zi yel n'epin-gezani a pɵa miɗini, n'a kiɗa a tikaŋ aŋ abai midiɗi ɗaini zi sɗa kapai a siɗi simiɗi war hlaini ɗa asiya ɗa?

⁴³ Ɵeɗ midini ɗif zi sɗa na epin-gezani won hlai n'a wayasi ɗa a navaŋsi aŋ za maini nɵa.

⁴⁴ Jre, mu miɗiki Aga a tikaŋ amai midini wazagaini paŋ.

⁴⁵ Amma na ɓa ɗif zi sɗa hanɗa, a muɗa warɗi agulni ɓa: Epin-geza a zi wiyisi tiyina kai, a tika pini a ɵiɓiɗi ɗai zi sɗa na maɵagai gaiɗi na falakai lai, a tika pini a suma, a ca a siina lai ɗa,

⁴⁶ Epin-gezani ɗif zi sɗa hanɗa aga a wayasi warni mefeŋ n'a hiinaŋ kai, war ler n'a sɗaŋ kaalai. Aga a zini gir abai, a sini buri na wiini gaiɗi nagai n'e ɵini mini Alaw kai ɗa.

⁴⁷ Ɗif zi sɗa na sɗa dirini epin-gezani ya, amma a zizina wala ktai kai, a za wala n'a kaata pini diri hanɗa kaalai ɗa, epin-gezani aga a ɵeɓaŋ viya.

⁴⁸ Amma ni n'a sɗa dirini kai, a za wala n'a kiɗa a nava ɵiɓi pini ɗa, ni epin-gezani aga a ɵiɓaŋ viya kai. Ni n'a sa tini viya ɗa, aga a zilba tini viya lai, ni na sɗa a sa li tini viya ɗa, aga a zilba tini a suwa pra.

Ɓraw a za arbaɗi ɗai burini Yesu

⁴⁹ Mu kasi midiɗi yai ɗa a afu, mu firiya ɓa a yima amai tiyana,

⁵⁰ baptisme ktai aŋ mada n'aga mu navaŋ, aŋ mada guma gara. A juva ɓa a za wiini ta.

⁵¹ Ki hiini ɓa, mu halasi ɗa aŋ kasi ɵeɗ midiɗi yai ɗi? Zaw kai, mu miɗiki, mu kasi ɗa a ɓraw.

⁵² Tiyana par, pakatai na ɗai warɗi ɵim ɗa, aga te ɓurwa, ɗai hu war gal ktai, sulu war gal ktai lai.

⁵³ Api aga a faka amai sini ahi, ahini sini api lai, ami siɗi ahiɗi na muni lai, ahi na muni siɗi ami, suwul siɗi munini ahi, munini ahi siɗi suwulɗi.

⁵⁴ A miɗiɗi wiiɗi ɗai pra maini nɵa: Hlai na ki tili li ɗugul a rga amai piɗi futi na koskoi par ɗa, tizaw ki miɗi ɓa: Faŋ aga a ɵa, a za ɵa lai,

⁵⁵ hlai na ki tili li smer a vuvuwasi war gal n'amai par ɗa, ki miɗi ɓa: Hlai ɗa aga a za afu, a za ɵa lai.

⁵⁶ Tiki zi rhai, ki siɗi aŋ miɗi edi midini wazagai na ki ɗa tiliŋ midiɗi yai gaini n'arbani hlai n'amai, amma ki siɗi aŋ miɗi edi midini hlai na girna kai ɗa buri mada?

Tûyi na gaini gawku

⁵⁷ Tiki gaini midiki dama lai ki sɗi aŋ hiini kai buri wala n'a na woɗi futini kai ɗa buri mada?

⁵⁸ Won hlai na ku na hala gaini gawku sini Komanda ɗa, ku paya aŋ toya gaini warɗi futi par, kapai a kuku wuzani ɗif n'a ɗûklûti sariya ɗa kai, kapai ɗif n'a ɗûklûti sariya ɗa a suku tini ɗif zi giɗimiti daŋgai ɗa kai, kapai zi giɗimiti daŋgai a ɵuku warɗi daŋgai kaalai.

⁵⁹ Mu muɗuku: Aga ku niya edi warɗi par kai, haa ku vurga tumuŋ n'aŋ muduku paŋ, wala ktai maa a hina kai.