Lukas 1 - Ɗû na sɗik na wiini Alaw

Lokwita sin Teyofilus

¹ Buri ɓa viya e tiki piɗi aŋ ɗû midini wazagai n'a za arbamu,

² maini na nagai na war pi zi tiki par, n'e tiliŋ gaini arɗi, n'e bindi aŋ ɵeŋ na wiini seŋ ɗa lai, e siŋyisi ɗa nɵa.

³ A tala ara pɗem lai, asakal mu na yima labar na gaini futini midini wazagai paŋ, haa sini pini n'a tikasi par, mu ɗo hanɗa suku gaini giri pini marni marni, suku tuku Teyofilus ɗif n'abai.

⁴ Kapai ku sɗa jreni hitri na ku navaŋ ɗa.

Miɗi n'edi miɗini wi na wiini Yohana zi baptisme

⁵ War sarti na Herod a na ka aŋ pai war Yudiya ɗa, pai zi ɓaka ktai yikini Sakariyas, ni a na war vok na wiini pai zi ɓaka Abiya, munini, te na war pinzibani Aaron par, yikiɗi ɓa: Elizabet.

⁶ Nagai sulu paŋ e ɗa jre wuzani arni Alaw, e piyi pini seŋ zi gadai gaini gadai zi ɗiyi na wiini Epiɗ-ɗai war futini gara.

⁷ Amma e wi ali kai, buri ɓa Elizabet ɗa te na fu muɗaŋ. Nagai sulu paŋ buzaɗi a za abai ta ta lai.

⁸ Mefeŋ ktai, won hlai n'a na za sdani wuzani Alaw, pini gûnini vok na wiini ɗa,

⁹ buri pini deɗi paakai zi ɓaka ɗa, e viri ɗif ktai kapai a niya amlai warni hlai na sɗik na wiini Epiɗ-ɗai, mefeŋ ni ɗa, e viri a Sakariyas, kapai a niya amlai aŋ za ɓaka na gaini wazagai zi ɗûgûdi zi lûgûzi ɗa.

¹⁰ Firiɗi ɗai paŋ e ɗi fu anene aŋ siiwi war ler na wiini ɓaka na gaini wazagai zi ɗûgûdi zi lûgûzi ɗa.

¹¹ Ɗif zi ɵeŋ na war fuŋ-n'Alaw na win Epiɗ-ɗai a siŋka sini arni, a ɗiya ɵimani gûwiŋ zi yi ɓaka war gal na wus ɗa par zaw.

¹² Won hlai na Sakariyas a talaŋ, a turla, hunai te yimaŋ gara.

¹³ Amma ɗif zi ɵeŋ na war fuŋ-n'Alaw a miɗini: Ku huna kai Sakariyas, buri siiwaku a ɵina li, Elizabet na muniku aga te wuku ahi na wus, aga ku sini yikini ɓa: Yohana.

¹⁴ Aga ku va gaini firiyi, gaini firiyi n'abai, viya, aga e firiyi burini wiini ɗa lai.

¹⁵ Buri aga a za aŋ ɗif n'abai wuzani arni Epiɗ-ɗai, aga a ca vin kaalai, sul n'a ciina kaalai, aga a va gaini seze sɗik amlai warni gutɗi emini par.

¹⁶ Aga a wiyiɗi aliɗi Izrayel viya sini Epiɗ-ɗai, Alaw na wiiɗi.

¹⁷ Aga a halasi avut wuzani Alaw gaini seze gaini spak na wiini Eliyas, kapai a wayasi hiiniɗi tamai siɗi aliɗi, a wiyiɗisi nagai n'e ɵini gat kai ɗa sini yel na wiiɗi na jre-ɗikat, kapai e ziɗi aŋ ɗai na gaini zizini burini Epiɗ-ɗai.

¹⁸ Sakariyas a miɗini wiini ɗif zi ɵeŋ na war fuŋ-n'Alaw: Aga mu sɗa hanɗa sini a ma ɗa? Buri mu za wel li, muniya ɗe buzaɗi a za abai ta lai.

¹⁹ Ɗif zi ɵeŋ na war fuŋ-n'Alaw a wiyini seŋ a muɗa: Mu Gabriyel, ni n'a na wuzani Alaw, a ɵinaŋasi buri mu muɗa gaiku, buri mu suku labar na pɗem hanɗa lai.

²⁰ Tala, muku aga a ɓurtuma, aga ku sɗa aŋ muɗa seŋ kai, haa sini mefeŋ na wazagai hanɗa aga a za li, buri ku yima seŋŋa n'aga a va amai war halaini kai.

²¹ Amma ɗai e ɗi fu aŋ biyi Sakariyas, e bindi hiyak buri a yafasi amlai warni hlai na sɗik viya gara.

²² Won hlai n'a niyasi anene ɗa, a kiɗa aŋ miɗiɗi seŋ kai, nagai a yima midiɗi lai, wala a siŋka sini arni amlai warni hlai na sɗik ta, a bunda a hûwdi ɗi ɗa a tini, a hina ɓurtum ɵa.

²³ Wala a za nɵa won hlai na mefenni sdani a fadali, a hala a ha war dalamni.

²⁴ Asakal mefeŋ hanɗa par agwi, Elizabet na munini te tika fel, te ŋoya siɗi haa tile ɵim, te hiina warɗi ɓa:

²⁵ Hanɗa a wala n'EPIƊ-ƊAI a za buriya, war mefeŋ n'a rga warni aŋ tika siyer na mada edi arbaɗi ɗai par.

Miɗi n'edi burini wii na wiini Yesu

²⁶ War tile n'ag'aŋ ɵaara, Alaw a ɵinasi ɗif zi ɵeŋ na war fuŋ-n'Alaw Gabriyel, war fuŋ n'abai ktai na Galileya yikini Nazaret,

²⁷ siɗi ɓulmi ktai na ɗif ktai yikini Yosef a giɓiti, ni a na war pinzibani David, ɓulmi yikiɗi Mariya.

²⁸ Ɗif zi ɵeŋ na war fuŋ-n'Alaw a niya aha siɗi, a muɗa: Firiya abai gara, tuku n'EPIƊ-ƊAI a za yum suku abai gara ɗa, Epiɗ-ɗai a na gaiku.

²⁹ Te turla burini seŋ hanɗa, te zilba siɗi ɓa: Wuti hanɗa a wuti na maɵa maɵa ɗa?

³⁰ Ɗif zi ɵeŋ na war fuŋ-n'Alaw a miɗiɗi: Ku huna kai, Mariya, buri ku nava yum li arni Alaw,

³¹ tala, aga ku tika fel, aga ku wa ahi, aga ku sini yikini ɓa: Yesu

³² Aga a za aŋ ɗif n'abai, aga e yikiŋ aŋ Ahini Alaw n'Amai n'Amai. Epiɗ-ɗai Alaw aga a sitini paramay zi pai na wiini David na tiyni.

³³ Ni aga a sumna aŋ pai miɗini pinzibani Yakob ɵa haa kureɗ, paini aga te vada kaalai.

³⁴ Amma Mariya te miɗini wiini ɗif zi ɵeŋ na war fuŋ-n'Alaw: A sɗa aŋ za ɵa maɵa maɵa ɗa, mu faana gaini wus duk kai koo?

³⁵ Ɗif zi ɵeŋ na war fuŋ-n'Alaw a wiyiɗi seŋ a miɗiɗi: Seze-siɗik aga a halasi muduku, spakni Alaw n'Amai n'Amai aga a yima muduku maini seze nɵa. Buri nɵa Ahi n'aga a wa ɗa, aga a yika ɓa: Ahini Alaw.

³⁶ Tala, Elizabet na zigiliku, na lai war wuliɗi te tika fel ɗaw, na na e ɗi ka e yikiti ɓa te na muɗaŋ ɗa, tiyana te na war tile n'ag'aŋ ɵaara.

³⁷ Buri wala n'a za gaini Alaw kai, aŋ kai.

³⁸ Mariya te muɗa: Ta, mu bagai na wiini Epiɗ-ɗai, a za wiini sa maini na ku muɗaŋ ɗa ɵa. Ɗif zi ɵeŋ na war fuŋ-n'Alaw a hiniti a hala.

Mariya te hala aŋ ɗûgûliti Elizabet

³⁹ War mefeŋ hanɗa, Mariya te faka te hala witaw midini hlai zi huwuŋ, war fuŋ n'abai ktai na Yuda.

⁴⁰ Te niya aha warni dalamni Sakariyas, te ɵiɓiɗi wuti wiiɗi Elizabet.

⁴¹ Won hlai na Elizabet te ɵina wutiɗi Mariya ɗa, ahiɗi a gegeɵa warɗi, Elizabet te va gaini Seze sɗik,

⁴² te ɗuula te muɗa: Alaw a ɓukuku a sûwiɗi falakai na zamai ɗa paŋ, ɓiki na wiini a sumna miɗini ahini n'aŋ warku ɗa lai.

⁴³ Emini Epiɗ-ɗaiŋa te halasi aŋ ɗugulaŋa ɗa, a za ɵa maɵa maɵa ɗa?

⁴⁴ Buri hlai na wutiku a cosi ɵima tar ɗa, ahi a gegeɵa amlai wara gaini firiyi n'abai.

⁴⁵ Ɵeɗ midiɗi na, na te yima buri wazagai n'EPIƊ-ƊAI a muɗaŋ paŋ ɗa aga a va amai.

Yama zi kol na Mariya te zinaŋ

⁴⁶ Tiyana, Mariya te muɗa: Suŋfaɗi-agula a kola Epiɗ-ɗai;

⁴⁷ Sezeŋa a firiya gara, war Alaw, Ɗif-zi-kûri na wiya.

⁴⁸ Buri a mulasi arni sa ta na bagaini na mu kiɗa wala ktai kai, wuzamu sek ɗa, pinzibaɗi ɗai paŋ aga e miɗi ɓa: Ɵeɗ aŋ mada,

⁴⁹ Alaw zi spak paŋ a za wazagai n'abakai buriya, yikini a na sɗik.

⁵⁰ Yum na wiini a na haa hlai n'a vada kai midiɗi nagai n'e sini hormo.

⁵¹ A za sda gaini spak gara A ɵiriɗi nagai na hiini zi kûlûni-si aŋ warɗi ɗa edi.

⁵² A miliɗi paakai zi spak ɗa azumai midini paramaiɗi zi spak par, a bindiɗi na nafaɗi kai ɗa, aŋ n'abakai,

⁵³ Nagai na wiyamai te ziɗi, a viɗi gaini wazagai na pɗamai, zi farai ɗa a hiniɗi e hili gaini tiɗi piɗi ca.

⁵⁴ A zina pini pinzibaɗi Izrayel na ɵeŋni, miɗini a wula gaini yumni kai.

⁵⁵ Maini n'a miɗiŋɗi wiiɗi tamaimu nɵa, sini Abraham gaini pinzibani ɵa haa hlai n'a vada kai.

⁵⁶ Mariya te sumna gaiɗi Elizabet haa gobi tile hu, asakal hanɗa te waya aha war dalamɗi.

Wi na wiini Yohana zi baptisme

⁵⁷ Amma sarti na wiini pûkû na wiiɗi Elizabet a cosi, te wa ahi na wus,

⁵⁸ Zagalakaiɗi gaiɗi nagai na ɵimaɗi, won hlai n'e ɵini ɓa, Epiɗ-ɗai a za yum n'abai siɗi ta ɗa e firiyi gaiɗi lai.

⁵⁹ Mefeŋ n'ag'aŋ mitwis ɗa, e hilisi buri e ɵini gûrgûle wiini arwagwi. E firiyi ɓa e sini yiki ɓa: Sakariyas maini epini ɵa.

⁶⁰ Amma emini te waya seŋ te muɗa: Zaw kai, yikini ɓa: Yohana.

⁶¹ E miɗiɗi: War pinzibaki ɗa, ɗif na yikini nɵa aŋ kai koo?

⁶² E hûwdi epini kapai e siɗi maɵa ɗa aga a yikaŋ.

⁶³ Sakariyas a paya wala ktai n'e ɗû miɗini, a ɗo miɗini maini nɵa: Yikini ɓa: Yohana ɗai paŋ e bindi hiyak.

⁶⁴ Won hlai ni tizaw, mini a mala amai, alesini te baada lai, a tika pini aŋ muɗa seŋ, a kola Alaw lai.

⁶⁵ Ɗai na ɵimaɗi paŋ hunai a yimiɗi, midini hlai zi huwuŋ na Yuda ɗa lai ɗai e sispi ɗa midini wazagai n'a za hanɗa.

⁶⁶ Nagai paŋ n'e ɵini hanɗa e tiki piɗi e hûni, e zilbi siɗi ɓa: Arwagwi hanɗa aga a za ɗa aŋ ma ɗa? Buri tini Epiɗ-ɗai te na fu miɗini.

Yama zi kol na Sakariyas a zinaŋ

⁶⁷ Sakariyas n'epini a va gaini Seze-sɗik, a tika pini aŋ muɗa seŋ na wuze maini nɵa:

⁶⁸ Kol sini Epiɗ-ɗai Alaw na wiiɗi Izrayel, buri a lûwiɗi ɗuwal wiiɗi ɗaini, buri a piliɗisi edi, a bindiɗi aŋ kempekai.

⁶⁹ A hinasi spak zi kûrɗiyi edi ktai war pinzibani pai David na ɵeŋ na wiini par,

⁷⁰ maini n'a muɗaŋ war miɗi ɗai na mini Alaw na sɗik na ɗipar nɵa.

⁷¹ A kûrɗi n'aga a kurɗumu edi war tiɗi gawmu par, war tiɗi nagai na e dirimu kai ɗa lai.

⁷² A siŋka yumni edi siɗi tamaimu maini hanɗa ɵa, miɗini a kɵa gaini bonuni na sɗik.

⁷³ Pini wala n'a haŋ mini wiini Abraham na tiymu,

⁷⁴ asakal n'a pulumusi edi tiɗi gawmu par ya, aŋ zumu ɵeŋni gaini hunai kai.

⁷⁵ war sɗik gaini jre-ɗikat, wuzani arni warni mefeŋ ni paŋ.

⁷⁶ Amma tuku ahiya, arwagwi, aga e yikuku aŋ ɗif na mini Alaw, na wiini Alaw n'Amai n'Amai, buri aga ku hala wuzani arni Epiɗ-ɗai, aŋ zizina futini n'agogoi.

⁷⁷ Buri a hitriɗi ɗaini aŋ siɗi pli n'edi pini tuwurɗi n'Alaw a hiniɗɗi;

⁷⁸ burini yum n'abai na wiini Alaw na wiini. Pini yum hanɗa, a hina gaglai aŋ ŋalasi mudumu amai par maiɗi futi na te diyasi amai ɗa nɵa.

⁷⁹ A za gaglai midiɗi nagai n'e simni war gegeŋ, pini sezeni mri, aŋ tika azumai warɗi futi na wiini ɵeɗ.

⁸⁰ Amma, arwagwi a wula amai sek sek, a bunda gadaŋ lai. A sumna edi war basga na kaɗataŋ haa sini mefeŋ n'a siŋka sini edi wuzaɗi Izrayel.