Levitekai 9 - Ɗû na sɗik na wiini Alaw

Ɓaka na Aaron gaiɗi alini a ziŋ avut

¹ Mefeŋ n'ag'aŋ mitwis ɗa, Musus a yika Aaron gaiɗi alini gaiɗi n'abakai n'arbaɗi ɗai na Izrayel ɗa lai.

² A miɗini wiini Aaron: Paya ahi ɵe zi ɓaka na burini tuwur ktai, adime ktai zi ɓaka zi yi lai, gaini suluni tirki sini kai, ku kaŋ wuzani EPIƊ-ƊAI.

³ Asakal par ku miɗiɗi wiiɗi aliɗi Izrayel maini nɵa: Piyi hek ktai na burini ɓaka na burini tuwur, ahi ɵe ktai, ahini adime ktai lai na buza ktai ktai, gaini suluni na tirki sini kai kapai e zi ɓaka zi yi gaini.

⁴ Gari ktai gaini adime ktai lai aŋ ɓaka zi ɵeɗ n'a sa sini EPIƊ-ƊAI gain ɓaka na gaini alini seyem n'e hiɗiŋ gaini emel, buri EPIƊ-ƊAI aga a siŋka sini arki girna.

⁵ E kisi wala na Musus a miɗiɗi gaini edi mini gumu n'e nivi gaini EPIƊ-ƊAI woni. Asakal par ɗai e tipisi e ɗiyi wuzani EPIƊ-ƊAI.

⁶ Musus a muɗa: EPIƊ-ƊAI a midiki buri ki zi maini nɵa, zi hanɗa kapai abai na wiini te siŋka arki.

⁷ Musus a miɗini wiini Aaron ku ɗiya wuzani gûwiŋ zi ɓaka, ku za ɓaka na burini tuwur gaini ɓaka zi yi na wiiku, asakal par za ɓaka na wiiɗi ɗai paŋ, kapai ku za de na wiini hinini tuwur na buriɗi ɗa maini n'EPIƊ-ƊAI a muɗaŋ ɗa nɵa.

⁸ Aaron a torosi sini gûwiŋ zi ɓaka, a ɵa wulani ahi ɵe zi ɓaka na burini hinini tuwur na wiini ni dama ɗa;

⁹ Alini Aaron e kinisi felni ɗa, a jiibiti ahi tini arni, a girdaŋ sini miyok na koŋni gûwiŋ zi ɓaka, a ma pini n'a hina ɗa azumai ezini gûwiŋ zi ɓaka ɗa.

¹⁰ A ya wazagai z'emel, ɓlaɓlamai na sulu, eɵeɵetni ahi ɵe lai maini n'EPIƊ-ƊAI a miɗiŋni wiini Musus ɗa nɵa.

¹¹ Neŋni gaini amurni a yaŋ edi duɓani kaŋ par.

¹² A fuɗa adime na wiini ɓaka zi yi su, alini e kinisi felni ɗa, a yamaŋ amai sini gûwiŋ zi ɓaka war galni na puɗu paŋ.

¹³ E kinisi adime zi ɓaka hanɗa gaini rɗi edi bak bak, gaini humokni lai. Ni a yaŋ miɗini gûwiŋ zi ɓaka.

¹⁴ A ma wazagai na warni gaini ɓaɓarani lai edi, a yaŋ arbani ɓaka zi yi hanɗa lai miɗini gûwiŋ zi ɓaka.

¹⁵ A ka ɓaka na wiiɗi ɗai wuzani EPIƊ-ƊAI, a yima hek zi ɓaka na burini tuwur na wiiɗi ɗai, a ɵa wulani, a za ɓaka gaini maini n'a zaŋ gaini ahi ɵe ɗa nɵa.

¹⁶ A ka ɓaka zi yi na wiini ahi ɵe gaini na wiini ahini adime wuzani EPIƊ-ƊAI, a zaŋ maini pini deni nɵa.

¹⁷ Asakal par a ka ɓaka na gaini alini seyem wuzani EPIƊ-ƊAI, a mula tiy juguɗ a yaŋ miɗini gûwiŋ zi ɓaka gaini ɓaka zi yi na gorof par.

¹⁸ A fuɗa gari gaini adime na ɗai e kiŋsi burini ɓaka zi ɵeɗ, alini e kinisi felni wazagai n'e fiɗiŋ ɗa, a yamaŋ amai sini gûwiŋ zi ɓaka war gal na puɗu paŋ.

¹⁹ Wazagai z'emel na sini gari gaini adime, a dara a muɗa: gɗer, emel na sini wazagai na war, ɓlaɓlamai, gaini eɵeɵet lai,

²⁰ e miliŋ miɗini didik na sulu, a yaŋ miɗini gûwiŋ zi ɓaka.

²¹ Aaron a za ɓaka na gaini didik, gaiɗi ɓuli na wus ɗa lai pini de na wiini si na sini EPIƊ-ƊAI, maini na Musus a miɗiŋni nɵa.

²² Won hlai n'Aaron a vada li gaini zini ɓaka na burini tuwur, gaini ɓaka zi yi gaini ɓaka zi ɵeɗ lai ɗa, a yima tini amai midiɗi ɗai a ɓikiɗi, asakal par a niyasi azumai.

²³ Musus gaini Aaron e niyi amlai war gumu n'e nivi gaini EPIƊ-ƊAI woni, asakal par, e niyisi anene aŋ ɓikiɗi ɗai, nɵa abai na wiini EPIƊ-ƊAI te siŋka arɗi ɗai paŋ.

²⁴ Afu a niyasi wuzani EPIƊ-ƊAI par, a ya ɓaka zi yi gaini wazagai z'emel na miɗini gûwiŋ zi ɓaka ɗa, ɗai paŋ e tili hanɗa, e ɗûûli gaini firiyi, e pûkû siɗi azumai, arɗi gaini pi azumai midini afti.