Levitekai 26 - Ɗû na sɗik na wiini Alaw

¹ Ki rgi alawai zamai zamai na jrekai kai ɗa kai; ki ɗiyi Alaw zi rgi zaw ahi-fuŋ z'alaw amai wuzaki kai, ki mili ali-fuŋ na sini gaini ɗihi midini aftiki kapai ki hûrgû azumai wuzani kaalai, buri EPIƊ-ƊAI Alaw na wiiki mu ta.

² Ki hini midiki a wula gaini Sabbat ɗa kai, ki sini hormo wiini hlaiŋa na sɗik, EPIƊ-ƊAI Alaw na wiiki mu ta.

Ɓiki

³ Na ɓa ki ɗa zi pini gadaiŋa zi ɗû, na ɓa ki yimi gadaiŋa li, na ɓa ki ɗa zi pini lai ɗa.

⁴ Aga mu siki faŋ war sartini, afti aga a wa seyemni, luwuŋ na war vowai aga a wa ali lai.

⁵ Aga ki giɵi seyem ahiki haa sini ali luwuŋ zi vin ɗa ta. Ki rûwi ali luwuŋ zi vin ɗa haa sini bilini seyemki ta lai. Wala zi simi aga a za siki viya. Ki simni ɵeɗ midini aftiki lai.

⁶ Aga mu kasi ɵeɗ midini aftiki, wala ktai n'aga a hûwyiki war duvuk aŋ kai, aga mu birga Wazagai na tuwarai na war basga edi midini aftiki par, hatam aga a za midini aftiki kir kai.

⁷ Gawki aga e rûvi wuzaki, aga ki fiɗiɗi edi gaini kaɵkar.

⁸ Ɗai n'Izrayel ɵim ɗa e birgi ɗai miya ɗaw, ɗai n'Izrayel miya ɗaw e birgi ɗai dubu doogo, ki fiɗiɗi edi gaini kaɵkarki lai.

⁹ Aga mu za pɗem siki, mu bindiki ki sisiɗi viya, ki bindi viya, mu gɗima bonuŋa na mu zaŋ gaiki lai.

¹⁰ Aga ki simi seyem na wel ɗa haa ki milisi pini n'a hina edi, ki mili na hehe war balamni.

¹¹ Aga mu za hlaiŋa zi simni arbaki, aga mu bunda ara edi siki par kai.

¹² Kureɗ aga mu paya arbaki, aga mu za aŋ Alaw na wiiki, tiki ki zi aŋ ɗaiŋa lai.

¹³ Ta m'EPIƊ-ƊAI Alaw na wiiki na mu plikisi edi warɗi Egipte par, kapai ki simni aŋ bagakaiɗi kir kai, mu haɗa jug zi bege na wulaki edi Mu ta kapai ki hili arki amai kai, midiki gaini pi azumai kir kai.

Tusa

¹⁴ Na ɓa ki ɵini ma kai, ki zi pini gadaiŋa kaalai ɗa,

¹⁵ Na ɓa ki bili edi sini gadaiŋa zi ɗû, ki miisi gadaiŋa zi ɗiyi, ki zi pini gadaiŋa kai, bonu na mu zaŋ gaiki, ki ɗûklûŋ daf lai ɗa,

¹⁶ Aga mu za siki maini nɵa: Aga mu kasi gir n'abakai zi mili hunai pini ɗif midiki: Veglek n'a bunda ɗif huruf sek sek lai. Aga ki bili seyem war vowaiki, amma e simiŋ ɗa e ɗi gawki.

¹⁷ Aga mu bunda ara edi siki par, gawki aga rɗi amai midiki, nagai n'e diriki kai ɗa aga e ŋi midiki, koo ɓa ɗif piki par kai maa, aga ki rûvi.

¹⁸ Na ɓa ki ɵini ma kai ɗai ɗa, aga mu ziki gir burini tuwurki azi muguzak a suwa hanɗa pra.

¹⁹ Aga mu vada gdaŋki na ki kûli siki gaini na ɗa edi, hlai n'amai ɗa aga mu bundaŋ gdaŋ maini kawai nɵa, aftiki mu bundaŋ gdaŋ maini kiya nɵa lai.

²⁰ Aga ki kiyi siki edi kadai meere afti aga a wa seyemni kai, luwaŋai na midini afti aga a wa ali kir kaalai.

²¹ Na ɓa ki pisi ara, ki ɵini ma kai ɗa, aga mu ziki gir a suwa hanɗa azi muguzak, na kata miɗini tuwurki na ki ziŋ ɗa.

²² Aga mu ɵinasi wazagai na buza par midiki, aga a fiɗiɗi aliki, aga a vada farani faraiki, aga a ɵiriki tiki edi, haa futi na ki hili warni a hina kadai su su.

²³ Na ɓa gir hanɗa paŋ a gidiki kai, siki aŋ pi gaya ɵa ɗa,

²⁴ Ta lai aga mu pa siki, aga mu ziki gir burini tuwurki azi muguzak a suwa hanɗa pra.

²⁵ Aga mu kasi gaw midiki, buri ki hini bonu na mu zaŋ gaiki edi mak, nɵa aga ki ŋûyi aha war fuŋ n'abakai zi ɵaga, amma aga mu ɵinaɗi vlak arbaki, aga mu siki war tiɗi gawki lai.

²⁶ Won hlai na mu ɗala simi na miki li ɗa, falakai doogo ɗi aga e tipi mini fur ktai aŋ zi peŋ, peŋ n'aga e kiŋkisi ɗa, agwi kadai, ki simiŋ ɗa ki vi gaini kai.

²⁷ Gaini hanɗa paŋ na ɓa ki ɵini kai ɗaai, ki pi gaya tiɓ ɵa ɗa,

²⁸ Ta aga mu pa gaiki lai, gaini hiy n'abai, ta gaini ta mal aga mu ziki gir, a suwa hanɗa azi muguzak burini tuwurki.

²⁹ Tiki aga ki limi neŋɗi aliki na maɵagai gaiɗi na falakai.

³⁰ Aga mu hlai zi ɓaka na wiiki edi gaini gûwiŋ zi ɗûgûdi wala zi lûgûzi, aga mu tapa kopoŋki miɗini kolkoɗaini alawaiki na jrekai kai na mu haɗaŋ azumai ɗa, aga mu tika hiiniŋa edi midiki par.

³¹ Aga mu bunda fuŋki n'abakai paŋ edi aŋ greŋ, aga mu tuura hlaiki na sɗik edi, lugos na pɗem n'a ɵiɗiti agulni EPIƊ-ƊAI azumai na wiini ɓakaki ɗa, mu firiyaŋ kir kai.

³² Aga mu tuura aftiki edi Mu ta mal, gawki n'aga e hilisi e simni midini ɗa, aga e bindi hiyak.

³³ Amma tiki ɗa aga mu ɵiriki edi arbaɗi pinziba na zamai aga mu hitimiki, aftiki aga a hina edi aŋ basga kadai, fuŋki n'abakai aga a hina aŋ deeɓer na gaini pi midini marni tiɓ tiɓ.

³⁴ Nɵa buza n'aga ki ziŋsi edi tiɗi gawki ɗa, afti n'a hina edi ɗa sini aga a tika, si n'amla hanɗa a hina ezini mefeŋ zi si n'amla n'a za kai ɗa.

³⁵ Nɵa afti aga a nava si n'amla, kapai si n'amla n'a ba edi won hlai na ki simni warni par ɗa a va amai.

³⁶ Nagai n'aga e hini karɗi midini afti na wiiɗi gawɗi aga mu bindiɗi muhunakai, wuzani ɵimani luwuŋ na smer a ɵaŋsi azumai tekeɗeɗi, e rûvi wiiɗi tiɓ. E rûvi maini n'e rûvi wuzani gawɗi n'aŋ gaini wazagai zi hatam tini nɵa, aga e yiki azumai maini na ɗif a na tikasi futi piɗi ɵa.

³⁷ Aga e yiki azumai midiɗi marɗi maiɗi ɗai n'e rûvi wuzaɗi gawɗi n'e ɗa gaini wazagai zi hatam nɵa. Paŋktai ɗif piɗi par kaalai. Aga e kiɗi aŋ ɗiyi miɗi gawɗi war kai.

³⁸ Aga e mri edi pinziba na zamai, aftiɗi gawki aga a simiki.

³⁹ Nagai n'e hini piɗi karɗi aga e bindi hurofai sek sek buri tuwur na wiiɗi tiyakaiɗi n'e ziŋ ɗa lai.

Alaw miɗini aga a kɵa gaini bonuni n'a zaŋ gaiɗi aliɗi Izrayel

⁴⁰ Amma meefeŋ na wiiɗi n'e ziŋ gaini na wiiɗi tiyakaiɗi ɗa, aga e miɗiŋ edi gaini miɗi ɓa: Tiyi mi zi meefeŋ abai gara sini Alaw, mi pi sini tiɓ.

⁴¹ Aga e siɗi ɓa Ta mu pa siɗi tiɓ lai haa mu kiɗi edi midini afti na wiiɗi gawɗi, nɵa aga e niyisi azumai wuza, e siɗi lai ɓa e ɗi fu war jre kai. Aga e yimi gir n'e niviŋ buri meefeŋɗi siɗi lai.

⁴² Mada aga a kɵa gaini bonuŋa na mu zaŋ gaini Yakob gaini Isaak gaini Abraham ɗa lai. Mada aga a kɵa gaini ɵinini ha na mu ziŋɗi burini afti n'aga mu siŋɗi.

⁴³ Hlai n'aftiɗi a hina li edi kadai, e ɗa miɗini kir kai, n'a nava si n'amla li, hlai n'e yimi gir n'e niviŋ burini meefeŋɗi siɗi li, buri ɓa ezi pini gadaiŋa zi ɗû gaini gadaiŋa zi ɗiyi kai li ɗa,

⁴⁴ koo ɓa e ɗa edi midini afti na wiiɗi gawɗi tekeɗeɗi, mu bunda ɗa ara edi siɗi par kai, mu bula ɗa a gaw siɗi kaalai. Aga mu vidiɗi edi kai, bonuŋa na mu zaŋ gaiɗi ɗa mu ɗuklaŋ kai. Buri ɓa Epiɗ-ɗai Alaw na wiiɗi Mu ta.

⁴⁵ Mada aga a kɵa gaini bonu na mu zaŋ gaiɗi tiyakaiɗi na mu pliɗisi edi midini afti n'Egipte par sini ziba zamai, viya e tiliɗi. Mu zaŋ ɵa ɓa kapai Ta EPIƊ-ƊAI mu sumna aŋ Alaw na wiiɗi.

⁴⁶ Hanɗa a gadai zi ɗû gaini zi ɗiyi lai n'EPIƊ-ƊAI a ɗiyaŋ arbani gaiɗi aliɗi Izrayel. A siŋɗi war mini Musus amai midini huwuŋ Sinaï.