Levitekai 22 - Ɗû na sɗik na wiini Alaw

Simini ɓaka n'a sa sini Alaw

¹ EPIƊ-ƊAI a miɗini wiini Musus:

² Miɗini wiini Aaron gaiɗi alini miɗini ɓaka n'aliɗi Izrayel aga e siŋ sa na nagai aga e yimiŋ tiɗi par kai, kapai e kisi miisi sini yikiŋa na sɗik kai ɗa, EPIƊ-ƊAI mu ta.

³ Ku miɗiɗi ɓa: Haa sini pinzibaɗi na wuzaɗi sek, ɗif n'aŋ war pinzibani pai zi ɓaka, n'a na hihir n'a torosi sini ɓaka na sɗik n'aliɗi Izrayel e kiŋasi wiya ɗa, ɗif hanɗa e hiniŋ aŋ za sda na wiya kir kai, EPIƊ-ƊAI mu ta.

⁴ Arbaɗi pinzibani Aaron ɗa, ɗif n'aŋ gaini veglek sini amur-sini zaw, na wala a kaa pini par aga a za sini edi hilu haw kapai a suma ɓaka na sɗik ɗa, ni na sini a tika li sini wala na kopoŋ a bundaŋ hihir paŋ, zaw ni n'a ha sini edi,

⁵ ɗif na sini a tika sini wala n'a muguza midini afti, n'a bunda ɗif hihir paŋ, zaw na sini a tika sini ɗif n'a bunda ɗif hihir paŋ, koo ɓa a hihir na wata ɗi,

⁶ Pai zi ɓaka paŋ sini a tika li sini wala na maini hanɗa ɵa ɗa a hihir haa kosko ɗaw, a kiɗa a suma ɓaka na sɗik sai won hlai n'a ma sini li edi gaini yem haw,

⁷ futi te nawa li tar ɗa a hilu a kiɗa a suma ɓaka na sɗik buri ɓa a simi na wiini,

⁸ Aga a luma neŋni wala n'a mra kiini kai, zaw na wala na buza a fuɗaŋ, ɵa kai ɗa aga a bundaŋ hihir, EPIƊ-ƊAI mu ta.

⁹ Paakai zi ɓaka aga e zi pini wala na mu gidiɗi miɗini ɗa, kapai e kisi tuwur midiɗi burini seŋni simi kai, na ɓa kisi miisi li sini simi hanɗa aga e mri, mu ziɗi edi sɗik mu ta EPIƊ-ƊAI.

¹⁰ Ɗif n'aŋ war sda zi pai zi ɓaka kai ɗa, aga a suma simi na sɗik ɗa kai, koo ɓa ɗif na pai zi ɓaka a yikaŋsi gaini yiki, koo na ɓa a za sda ahani aŋ vrak e sini simi na sɗik kai;

¹¹ Amma na ɓa pai zi ɓaka a wura li bege ɗa, begeni ɗa a kiɗa a suma simi na sɗik ɗa, bege n'a wa aha nɵa lai, nagai e kiɗi e simi simi na wiini ɗa.

¹² Ahini pai zi ɓaka na te tika ɗif na kadai li ɗa, te kiɗa te suma wala n'a tikasi edi war ɓaka na sɗik par kai.

¹³ Amma na ɓa ahini pai zi ɓaka te hina li war greŋ, zaw te badasi pini mofaɗi par, na ɓa aliɗi e ɗi kai, na ɓa te wayasi li ahani epiɗi maini na te na ka war ɓulmiɗi nɵa, te kiɗa te suma simi na wiini epiɗi ɗa; Hanɗa e ɗi nagai n'e kiɗi e simi ɓaka na sɗik ɗa, ɗif na a pai zi ɓaka kai ɗa a sumaŋ kai.

¹⁴ Na ɓa war siɗi kai ɗif a suma simi na sɗik li, aga a vurga wala n'a sumaŋ ɗa wiini pai zi ɓaka, a tika gal n'ag'aŋ ɵim na wiini wala n'a vurgaŋ ɗa miɗini pra.

¹⁵ Paakai zi ɓaka aga e kisi miisi sini ɓaka na sɗik n'aliɗi Izrayel e siŋ sini EPIƊ-ƊAI kai,

¹⁶ na ɓa paakai zi ɓaka e simi ɓaka hanɗa li war hihir na wiiɗi ɗa aga e kisi meefeŋ midiɗi aliɗi Izrayel n'a zizina sai gaini ɓaka na burini zizinini seŋ buri mu zaŋ edi sɗik mu ta EPIƊ-ƊAI.

Gadai na burini wazagai n'e fiɗiŋ aŋ ɓaka

¹⁷ EPIƊ-ƊAI a miɗini wiini Musus:

¹⁸ Miɗini wiini Aaron gaiɗi alini gaiɗi ɗai na Izrayel paŋ ɓa: Na ɓa ɗif na Izrayel, zaw ɗif zi jak n'a na arbaki aŋ fuŋ, na ɓa a dara a zaŋa ɓaka zi yi na burini ɵinini-ha n'a zaŋ, zaw pini dirini n'a va amai tizaw ɗi ɗa,

¹⁹ na ɓa a firiya ɓa mu yima ɓakani tini par ɗa, a payasi wala na wus na tirki sini kai arbani farani ɵaakaini par, zaw adumai ni par, zaw haakaini par na tirki sini kai.

²⁰ Aga e ziŋa ɓaka gaini wala na tirki sini ta ɗa kai, aga mu yimaŋ tiɗi kai.

²¹ Na ɓa ɗif a za ɓaka zi ɵeɗ wiini EPIƊ-ƊAI, burini ɵinini-ha n'a zaŋ, zaw pini dirini n'a va amai tizaw gaini Gari zaw adime, zaw hek, na ɓa a firiya mu yimaŋ tini par ɗa, wala ni ɗa a wala na tirki sini kai.

²² Ki ziŋa ɓaka gaini wala na melveŋ kai, n'ezini gaini hiɗi kai, zaw gaini ɗûkûli edi kai, na sini gaini ɵiɓi kai na veglek sini amur-sini kai. Ki ziŋa ɓaka gaini wala na maini hanɗa ɵa midini gûwiŋ zi ɓaka aŋ ɓaka n'e yiŋ edi gaini afu kai.

²³ Na ɓa ɵeŋ, zaw adime, zaw hek n'ezini kal kal kai, zaw n'a wula amai kai, ku kiɗa ku za ɓaka na diriku a va amai midini tizaw gaini, amma aŋ ɓaka na ku zaŋa ɵinini-ha miɗini mu yimaŋ kai.

²⁴ Ki ziŋa ɓaka gaini wala na mohomni gaini gɵi kai, gaini siri, gaini mili edi, zaw gaini ɗûkûli edi daf daf ɗa kai, ki zi hanɗa midini aftiki kai.

²⁵ Aga ki yimisi wazagai na maini hanɗa ɵa tini ɗif zi jak par kapai ki ziŋa ɓaka gaini wiya ta Alaw na wiiki kai. Na ɓa sini ktai aŋ gai ɗûkûli edi daf, zaw a rga gaini futini kai ɗa aga ki yimiŋ kai.

²⁶ EPIƊ-ƊAI a miɗini wiini Musus:

²⁷ Ahi ɵeŋ, zaw ahini adime a wa li ɗa a za mefeŋ muguzak, sini mefeŋ na mitwis par na ɓa e ziŋa ɓaka n'e yiŋ edi gaini afu gaini aga mu yimaŋ tiɗi.

²⁸ Amma war yuvaini ktai ki fiɗiti ɵai, zaw adumi, hiiki ɗi gaini ahiɗi kai.

²⁹ Won hlai na ki zi ɓaka zi zini tese wiini EPIƊ-ƊAI aga ki ziŋ pini gadai n'aŋ gaini ɗiyi ɗa kapai mu yimaŋ tiki par.

³⁰ Ki limi wala ni ɗa war yuvaini dama, ki hini pini amai buri dawai kai, EPIƊ-ƊAI mu ta.

³¹ Aga ki yimi gadaiŋa, ki zi pini lai, EPIƊ-ƊAI mu ta.

³² Aga ki kisi miisi sini yikiŋa na sɗik kai kapai aliɗi Izrayel e siɗi ɓa mu na Sɗik. Mu ziki edi sɗik mu ta EPIƊ-ƊAI.

³³ Mu milikisi edi warɗi Egipte par kapai mu za aŋ Alaw na wiiki, EPIƊ-ƊAI mu ta.