Levitekai 16 - Ɗû na sɗik na wiini Alaw

Mefeŋ n'abai na wiini hinini tuwur

¹ Asakal mriɗi alini Aaron na sulu, n'e kisi ɓaka wuzani EPIƊ-ƊAI, EPIƊ-ƊAI a miɗini wiini Musus:

² Ku miɗini wiini tawalku Aaron ɗa ɓa: A niyasi amai war Hlai na sɗik mefeŋ paŋ kai, a niyasi amlai duɓani rido par, wuzani wala n'e dûgû mini zunduk gaini kai kapai won hlai na mu siŋkaɗi sa li arni ɗugul z'agiyiŋ amlai par miɗini wala n'e dûgû mini zunduk gaini ɗa a kiɗa aŋ mra kai.

³ Kapai a niya amlai war hlai na sɗik ɗa, wazagai n'a payaŋ tini ɗa a hanɗa: Gari ktai burini ɓaka na burini tuwur, adime ktai burini ɓaka zi yi lai.

⁴ A wuti rob zi leŋ na sɗik sini, a wa kolson zi leŋ pini, a naga wuzani gaini santir zi leŋ, a faɗa miɗini gaini kadamul zi leŋ lai burini ɓaka. Sapakai hanɗa a na sɗik, nɵa a ma sini edi gaini yem avut won hlai n'a dara a waŋ sini.

⁵ Aliɗi Izrayel e sini baŋgarakai sulu burini ɓaka na burini tuwur, adime ktai burini ɓaka zi yi lai.

⁶ Aaron a za ɓaka na burini tuwur na wiini dama ɗa, asakal par a za de na buri hinini tuwur burini sini dama, buriɗi pakataini lai.

⁷ A yima baŋgarakai na sulu a kaŋ wuzani EPIƊ-ƊAI mini gumu na e nivi gaini EPIƊ-ƊAI woni.

⁸ Aaron a za wala zi vili arbani baŋgarakai na sulu, kapai a siɗa na wiini EPIƊ-ƊAI gaini na wiini Azazel ɗa.

⁹ Aaron a yima beŋgere n'a vara aŋ wiini EPIƊ-ƊAI a za ɓaka na burini tuwur gaini.

¹⁰ Amma beŋgere n'a vara aŋ wiini Azazel ɗa e kiŋsi wuzani EPIƊ-ƊAI karni, e zi de na wiini hinini tuwur midini, asakal par e ɵiniŋni wiini Azazel edi basga.

¹¹ Aaron a za ɓaka gaini Gari burini hinini tuwur na wiini dama, a za de burini hinini tuwur burini sini dama, buriɗi pakataini lai. Asakal n'a ɵa wulani Gari zi ɓaka hanɗa li burini tuwurni ɗa,

¹² a tika wala n'e yi wala zi ɗûgûdi zi lûgûzi a vaŋ gaini morjo n'a mulaŋsi mini gûwiŋ zi ɓaka n'a na wuzani EPIƊ-ƊAI par. A mula wala zi ɗûgûdi zi lûgûzi na bari tiy zuguɗ zuguɗ sulu lai a kaŋ amlai duɓani rido par.

¹³ A mula wala zi ɗûgûdi zi lûgûzi miɗini afu wuzani EPIƊ-ƊAI, agiyiŋ na wiini wala zi ɗûgûdi a wala n'e dûgû mini zunduk n'ali-fuŋ na babɗamai paŋ warni azumai. Nɵa Aaron aga a mra kai.

¹⁴ A ma felni gari agwi a yamaŋ gaiɗi ahi tini amai sini galni wala n'e dûgû mini zunduk gaini na piɗi futi na dawai par. Asakal par a yamaŋ wuzani par azi muguzak lai.

¹⁵ A ɵa wulani beŋgere zi ɓaka na burini tuwur na wiiɗi ɗai ɗa, a ka felni amlai par duɓani rido ɗa, a za gaini fel hanɗa maini n'a za gaini felni gari ɗa nɵa, a yamaŋ amai sini wala n'e dûgû mini zunduk gaini wuzani par lai.

¹⁶ A za de na buri hihir na wiiɗi aliɗi Izrayel gaini hi n'amai midini gadai na wiiɗi, a dara a muɗa burini tuwurɗi paŋ, midini hlai na sɗik. A za de hanɗa pra miɗini gumu n'e nivi gaini EPIƊ-ƊAI woni buri a na arbaɗi ɗai na haharai.

¹⁷ Ɗif zamai aga a sumna amlai war Hlai na sɗik kai, won hlai na pai zi ɓaka a niya amlai war Hlai na sɗik aŋ za de na wiini hinini tuwur burini suŋfani dama, burini dalamni, buriɗi vokɗi Izrayel paŋ lai ɗa.

¹⁸ Asakal a niyasi anene a hala sini gûwiŋ zi ɓaka n'a na wuzani EPIƊ-ƊAI, a za de na burini hinini tuwur midini, a ma pini felni na wiini gari agwi gaini beŋgere agwi lai, a girdaŋ sini amiyok n'a na war koŋni gûwiŋ zi ɓaka.

¹⁹ Gaiɗi ahi tini, a yaama fel sini gûwiŋ zi ɓaka azi muguzak, buri ɓa tuwur na wiiɗi aliɗi Izrayel a bundaŋ hihir pla. Amma gaini hanɗa Aaron a zaŋ edi hilu, gûwiŋ hanɗa a waya a bunda edi sɗik.

²⁰ Won hlai n'a vada li gaini de na burini hinini tuwur na midini hlai na sɗik gaini na miɗini gumu n'e nivi gaini EPIƊ-ƊAI woni ɗa, gaini na midini gûwiŋ zi ɓaka lai, a yimasi bengere na karni ɗa,

²¹ a mula tini na sulu paŋ miɗini, a pɵa tuwur na wiiɗi aliɗi Izrayel ɗa paŋ, gaini hi n'amai midini gadai na wiiɗi paŋ, meefeŋɗi paŋ lai, a tapa hanɗa paŋ miɗini beŋgere. Asakal par a saŋ tini ɗif na sini aŋ gaini zizini buri a kaŋ edi war basga ɗa.

²² Beŋgere hanɗa a luba meefeŋ na wiiɗi aliɗi Izrayel ɗa paŋ, a kaŋ war hlai na ɗif a za fuŋ warni kai. Won hlai n'Aaron a ɵina beŋgere hanɗa edi war basga li ɗa,

²³ a waya amlai war gumu n'e nivi gaini EPIƊ-ƊAI woni, a wa sapa zi leŋ sini n'a waŋ sini buri a niya amlai war hlai na sɗik gaini ɗa edi, a hinaŋ woni.

²⁴ A ma sini edi gaini yem war hlai na sɗik, a waya a wa sapani n'avut ɗa sini, a niyasi anene war gumu n'e nivi gaini EPIƊ-ƊAI ɗa woni par, a za ɓaka zi yi na wiini gaini na wiiɗi ɗai paŋ. A za de na buri hinini tuwur na burini sini dama gaini na wiiɗi ɗai paŋ;

²⁵ Emel na war wazagai zi ɓaka n'a fuɗaŋ buri tuwur ɗa a yaŋ amai midini gûwiŋ zi ɓaka.

²⁶ Ɗif n'a ka beŋgere edi war basga wiini Azazel ɗa a ma sapani edi, a ma sini edi gaini yem lai, asakal hanɗa a wayasi aha war kaŋ.

²⁷ Gari gaini beŋgere n'e zi ɓaka burini tuwur gaini, n'e ki felni amlai war hlai na sɗik buri e zi de na wiini hinini tuwur gaini, e kiŋ edi duɓani kaŋ par, e yi amurni gaini neŋni gaini aru na warni lai.

²⁸ Ɗif n'a yasi wazagai hanɗa edi aga a ma sapani edi, a ma sini edi gaini yem lai, asakal hanɗa a wayasi aha war kaŋ.

²⁹ Gadai n'a na ɗa a gadai n'aga ki zi pini kûreɗ-kûreɗ, war tile n'ag'aŋ muguzak, mefeŋ n'gaŋ doogo ɗa, ki tiki sai, ki zi sda warni kai koo ɓa a ɗif na Izrayel, koo ɓa a ɗif na morkoi n'a na arbaki.

³⁰ Buri ɓa e zi de na burini hinini tuwur na midiki ki kapai bindi edi hilu war mefeŋ ni ɗa.

³¹ Mefeŋ hanɗa aga a bunda buriki aŋ Sabbat, aŋ mefeŋ zi si n'amla na ki tiki sai woni, aŋ gadai n'a bunda kai.

³² A za de na burini hinini tuwur ɗa a pai zi ɓaka n'e mi emel n'e tiki ɗai war sda gaini midini ya, n'e tikiŋ war balamni epini aŋ pai zi ɓaka n'abai ɗa, aga a wa sapa zi leŋ, sapa na sɗik sini.

³³ A za de na burini hinini tuwur na midini hlai na sɗik na miɗini gumu n'e nivi gaini EPIƊ-ƊAI woni gaini na midini gûwiŋ zi ɓaka lai. Asakal par a za de hanɗa midiɗi paakai zi ɓaka gaini vokɗi ɗai n'e diŋgisi ɗa paŋ.

³⁴ Gadai hanɗa a gadai n'aga ki zi pini kûreɗ-kûreɗ, war buza dam aga ki ziŋ azi ktai kapai tuwur na wiiɗi aliɗi Izrayel paŋ a nava girdi n'edi. Ɗai e zi maini n'EPIƊ-ƊAI a miɗiŋni wiini Musus nɵa.