Levitekai 13 - Ɗû na sɗik na wiini Alaw

Veglek na sini amur-si na wiini ɗif

¹ EPIƊ-ƊAI a miɗini wiini Musus gaini Aaron maini nɵa:

² Na ɓa sini ɗif a ɵinasi ɓilik amlai par tiɓ tiɓ, zaw na ɓa kubai kubrai a mula li sini, zaw sini a bla muɗukwi ɗef ɗef ɗef na asakal par a za aŋ ɓilik na sɗa maini ɓilik na wiini dugum nɵa ɗa, ɗif hanɗa e kiŋ sini pai zi ɓaka Aaron, zaw sini ktai arbaɗi aliɗi paakai zi ɓaka ɗa.

³ Pai zi ɓaka a tala veglek n'a na sini amur-sini hanɗa pɗem na ɓa war hlai na wala aŋ warni ayir na war hlai hanɗa a bunda muɗukwi, hlai ni gaini cû ɗef ɗef ɗeflai ɗa, veglek hanɗa a dugum. Asakalni tilini par, pai zi ɓaka hanɗa a muɗa edi miɗini ɓa ɗif hanɗa a hihir.

⁴ Na ɓa a hlai n'a tala huwur huwur, muɗukwi lai, na ɓa cû sini ɗef ɗef kai, na ɓa ayir na won hlai ni ɗa a bunda muɗukwi kaalai ɗa, pai zi ɓaa a tika ɗif hanɗa edi war baŋa kiini ta.

⁵ Mefeŋ n'ag'aŋ muguzak ɗa, pai a talaŋ katawai pra, na ɓa wala hanɗa aŋ war balamni ɵa, a riya wuzani sek kai, pai zi ɓaka a wayaŋ katawai azi n'ag'aŋ sulu edi war baŋa buri mefeŋ muguzak pra.

⁶ War mefeŋ n'ag'aŋ muguzak, pai zi ɓaka a talaŋ katawai pra, na ɓa wala hanɗa a vada edi vat, na ɓa veglek hanɗa a riya wuzani sek kai, pai zi ɓaka a sa labar edi miɗini ɓa, a na hilu, a kabrai kabrai kadai. Ɗif na wala a za sini a ma sapani edi yok, asakal par a bunda edi hilu.

⁷ Amma na ɓa asakal na pai zi ɓaka a talaŋ ya, a sa labar edi miɗini ya ɓa a na hilu, kabrai kabrai ɗa a riya wuzani ɗaai ɗa, ɗif hanɗa a waya sini pai zi ɓaka katawai kapai a talaŋ pra.

⁸ Pai zi ɓaka a waya pini tilini katawai pra, na ɓa kabrai kabrai a n'a riya wuzani sek ɗa, pai zi ɓaka a sa labar edi miɗini ɓa a na hihir. Hanɗa a dugum.

⁹ Na ɓa veglek ktai zi dugum a yima ɗif li ɗa e kiŋ sini pai zi ɓaka.

¹⁰ Pai zi ɓaka a talaŋ pɗem, na ɓa ɓilik a ɵaasi amlai sini par muɗukwi, na ɓa ayir na won hlai ni ɗa a bunda muɗukwi, na ɓa hlai ni ɗa a bunda a tala mekele lai,

¹¹ hanɗa a veglek zi dugum n'a fana sini yaw, pai zi ɓaka a sa labar edi miɗini ɓa a na hihir, a kaya sini aŋ tikaŋ edi war baŋa ta kapai a talaŋ kir kai, buri hihir na wiini a na edi arɗi ɗai gaglai.

¹² Amma na ɓa ɓilik n'a ɵa tiɓ tiɓ a niyasi amlai par sini sini paŋ, hlai ktai maa a hina kai, a dara a muɗa: amai midini par haa azumai ezini ta, hlai na pai zi ɓaka a talaŋ paŋ.

¹³ Pai zi ɓaka a talaŋ pɗem buri sini paŋ a va gaini ɓilik hanɗa, a muɗa edi midini ɗif zi veglek hanɗa ɓa a na hilu,

¹⁴ amma mefeŋ n'e tili li ɓa amur-sini a na ɵoɗo edi ɗa a bunda hihir.

¹⁵ Pai zi ɓaka a tala amur-si n'a ɵoɗo edi, a muɗa edi miɗini ɓa a na hihir, buri ɓa neŋ-si na amur miɗini kai ɗa a na hihir, hanɗa a veglek zi dugum,

¹⁶ zaw na ɓa, sini na gaini ɵûɗi edi a bunda muɗukwi war balamni pla ɗa, ɗif hanɗa a hala sini pai zi ɓaka.

¹⁷ Pai zi ɓaka a talaŋ pɗem, na ɓa hlai n'a ɵoɗo edi a bunda muɗukwi pla ɗa, pai zi ɓaka a sa labar edi ɓa veglek hanɗa a bunda ɗif hihir kai. Nɵa ɗif hanɗa a hilu.

¹⁸ Na ɓa kurlai ktai te diya sini ɗif, asakal par te zuula ta,

¹⁹ amma na ɓa war balamɗi ɗa wala na muɗukwi ɗef a ɵaasi amlai par, zaw wala na huwur huwur, mekele keŋ, a ɵa war hlai ni ɗa, ɗif a hala sini pai zi ɓaka kapai a talaŋ,

²⁰ pai zi ɓaka a talaŋ pɗem, na ɓa hlai ni aŋ gaini cû ɗa, na ɓa ayir na woni a bunda muɗukwi, pai zi ɓaka a sa labar edi miɗini ɓa a na hihir. A tika war balamɗi kurlai ɗa, a veglek ktai zi dugum,

²¹ na ɓa pai zi ɓaka a talaŋ li, a navaŋ ɓa hlai ni aŋ gaini cû kai, na ɓa ayir na woni a bunda muɗukwi kai, na ɓa a riya edi wuzani kaalai, pai zi ɓaka a tikaŋ edi war baŋa kiini ta haa mefeŋ muguzak,

²² n'a riya li wuzani, pai zi ɓa a sa labar edi miɗini ɓa a na hihir, hanɗa a veglek ktai zi dugum;

²³ Amma na ɓa wala na mudukwi ɗef a hina war balamni ɵa, a riya wuzani sek kai ɗa, hanɗa a huɗuk na wiiɗi kurlai na te zuula, pai zi ɓaka a sa labar edi miɗini ɓa a na hilu.

²⁴ Na ɓa afu a ya ɗif li, na ɓa wala na muɗukwi ɗef, zaw na huwur huwur, n'a tala muɗukwi zaw mekele a tika li war huɗukni ɗa,

²⁵ pai zi ɓaka a talaŋ pɗem, na ɓa ayir na war huɗukni a bunda li muɗukwi, na ɓa hlai ni gaini cû co co, a tika pini na ɗa a veglek zi dugum, pai zi ɓaka a sa labar edi miɗini ɓa a na hihir,

²⁶ amma na ɓa pai zi ɓaka a talaŋ li, a nava ayir na muɗukwi warni kai, a na gaini cû kaalai, na ɓa a sini war balamni ɵa ta, pai zi ɓaka a tika ɗif edi war baŋa kiini haa mefeŋ muguzak.

²⁷ War mefeŋ n'ag'aŋ muguzak ɗa, pai zi ɓaka a talaŋ katawai pra, na ɓa fakat a na riya wuzani, pai zi ɓaka a sa labar edi miɗini ɓa a hihir, a veglek ktai zi dugum.

²⁸ Amma na ɓa hlai na muɗukwi ɗef a hina war balamni ɵa ta, a riya wuzani sek kai, na ɓa huwur huwurni a na ruruɓa, hanɗa a ɓilik n'a ɵasi amlai par kadai burini afu n'a yuvugaŋ, pai zi ɓaka a sa labar edi miɗini ɓa a hilu. Hanɗa a huɗukni afu n'a yaŋ.

²⁹ Na ɓa wus zaw muni aŋ gaini bigruw miɗini zaw sini dudrusni,

³⁰ pai zi ɓaka a tala veglek hanɗa pɗem, na ɓa a navaŋ ɓa aŋ gaini cû coco, na ɓa ayir na warni a coro mekele arbani haraw haraw lai ɗa pai zi ɓaka a sa labar edi miɗini ɓa a hihir. Hanɗa a bigruw a dara a muɗa: veglek zi dugum na sini humok zaw na sini dudrus.

³¹ Amma na ɓa pai zi ɓaka a tala bigruw hanɗa li, a navaŋ ɓa aŋ gaini cû kai, ayir na murɗek warni kai kaw ɗa, pai zi ɓaka a tika ɗif edi kiini war baŋa t a haa mefeŋ muguzak;

³² war mefeŋ n'ag'aŋ muguzak ɗa, pai zi ɓaka a talaŋ katawai pra, na ɓa bigruw a riya wuzani sek kai, na ɓa ayir na mekele aŋ kai, bigruw a co sini kaalai,

³³ ɗif hanɗa a faɗa ayir na miɗini edi kafa, sai a hina a hlai zi bigruw ɗa tar, asakal par pai zi ɓaka a tikaŋ edi war baŋa kiini ta haa mefeŋ zamai muguzak pra.

³⁴ War mefeŋ n'ag'aŋ muguzak ɗa pai zi ɓaka a tala bigruw na sini, na ɓa a riya wuzani sek kai, a co amlai kaalai ɗa, pai zi ɓaka a sa labar edi miɗini ɓa a hilu, asakal par a ma sapani edi a bunda hilu.

³⁵ Na ɓa bigruw a riya li wuzani asakal na pai zi ɓaka a muɗa edi miɗini ɓa a hilu par,

³⁶ pai zi ɓaka a talaŋ katawai pra, pini bigruw n'a na riya wuzani sek ɗa, pai zi ɓaka a taɓa pini ayir na mekele kir kai, ɗif ɗa a hihir.

³⁷ Amma na ɓa bigruw a hina war balamni ɵa ta, ayir na murɗek a diya li woni lai, a siŋka ɓa bigruw ɗa a zuula ta, ɗif a hilu, nɵa pai zi ɓaka a sa labar edi miɗini ɓa a hilu.

³⁸ Na ɓa wala a za muɗukwi ɗef ɗef sini wus zaw siɗi muni,

³⁹ pai zi ɓaka a talaŋ pɗem, na ɓa muɗukwiini a na gara kai, veglek hanɗa a na gir gara kai, ɗif a hilu.

⁴⁰ Na ɓa ayir na midini ɗif a luma edi, miɗini a hina mava nai, ɗif a hilu.

⁴¹ Na ɓa ayirni ɗif a lumasi wuzani par, ɓa ayir a hina edi pini jakni sek, ɗif a hilu.

⁴² Na ɓa amai midini arba, zaw amai midini arni, war hlai zi mava nai, wala a diyasi woni a tala muɗukwi gara kai, a tika pini amai midini arba, amai midini arni na ɗa a veglek zi dugum,

⁴³ Pai zi ɓaka a talaŋ pɗem, na ɓa wala n'a diyasi amlai par ɗef war hlai na mava nai, a tala mekele, ɓa a na amai midini arba zaw, amai midini arni ɗi, na ɓa a tala maini veglek ktai zi dugum nɵa,

⁴⁴ a ɗif zi gudum, a hihir; pai zi ɓaka a sa labar edi miɗini ɓa a na hihir, buri veglek n'a yimaŋsi amai midini par.

⁴⁵ Ɗif na veglek zi dugum a yimaŋ li ɗa a wa sini a kece kece, a hina midini gaini tûkûsi, a rga wala midini kasambaki na mini, aga a ɗuula ɓa: Hi-hir, hihir.

⁴⁶ Na ɓa veglek hanɗa aŋ sini ɵa, a hihir, buri nɵa e pini gumuni edi war baŋa kiini tiɓ, a sumna gaiɗi ɗai na war kaŋ ɗa kai.

Buki n'a ɵa sini sapa

⁴⁷ Won hlai na buki a ɵa li sini sapa z'ayirni adumai, zaw sini sapa zi leŋ,

⁴⁸ sini sapa zi leŋ zaw z'ayirni adumai, sini amur zaw sini wazagai z'amur,

⁴⁹ na ɓa buki hanɗa a bunda li boguro maini ɵimani sugoi na hirnaŋ ɵa, zaw mekele fel fel sini amur zaw sapa, sini sapa zi leŋ zaw z'ayirni adumai, na ɓa buki hanɗa a bunda li bogro maini ɵimani luwuŋ ɵa, sini sapa zi leŋ zaw z'ayirni adumai, sini wala z'amur paŋ, hanɗa a dugum, sai pai zi ɓaka a talaŋ.

⁵⁰ Pai zi ɓaka a tala buki hanɗa pɗem, wala na buki a ɵa sini ɗa, a ɵini mini amlai war hlai ktai ka haa mefeŋ muguzak;

⁵¹ war mefeŋ n'ag'aŋ muguzak, a waya a tala buki pra, na ɓa buki a riya li edi sini sapa, zaw sini wala n'a ɵa sini ɗa, hanɗa a veglek zi dugum n'a diŋga, wala n'a ɵa buki a ɵa sini ɗa a hihir.

⁵² Pai zi ɓaka a ya sapa ɗa edi, sapa z'ayirni adumai, zaw zi leŋ, zaw z'amur paŋ na buki a ɵa sini ɗa, buri a veglek zi dugum n'a diŋga, wala paŋ na buki hanɗa a ɵa li sini ɗa, sai a ya edi.

⁵³ Na ɓa, won hlai na pai zi ɓaka a talaŋ katawai, a navaŋ ɓa buki a na riya edi wuzani sini wala n'a ɵa sini kai ɗa,

⁵⁴ pai zi ɓaka a sa futi buri e miŋ edi, asakal par a ɵa mini amlai war hlai ktai ka haa mefeŋ muguzak pra.

⁵⁵ Asakal hanɗa par, pai zi ɓaka a talaŋ pra, na ɓa hlai na buki a ɵa warni ɗa a bunda kai ɗa, koo ɓa a riya edi wuzani kai tekeɗeɗi, wala na buki a ɵa sini ɗa a hihir, a ya edi. Na ɓa buki a lumaŋsi warni par zaw duɓani par.

⁵⁶ Amma na ɓa, pai zi ɓaka a talaŋ, a navaŋ ɓa, asakalni mini par buki a bunda kus kus, a ɗukla hlai zi buki ɗa edi daf,

⁵⁷ amma na ɓa buki zamai a ɵa sini wala hanɗa war mefeŋ zamai pra ɗa, a veglek zi dugum n'a na riya wuzani, wala na buki aŋ sini ɗa a ya edi.

⁵⁸ Sapa z'ayirni adumai, zi leŋ, zaw z'amur n'a ma edi burini buki n'aŋ sini, koo ɓa buki hanɗa a tika edi tekeɗeɗi, aga a ma azi n'ag'aŋ sulu pra.

⁵⁹ Hanɗa a gadai na burini buki n'a ɵa sini sapa z'ayirni adumai, zaw zi leŋ, zaw sini sapa, zaw sini wazagai z'amur paŋ. Gaini gadai hanɗa, mu kuɗumu aŋ muɗumu miɗini wala ɓa a hihir zaw a hilu.