Kolosekai 4 - Ɗû na sɗik na wiini Alaw

¹ Tiki Epin-gezakai, ki zi siɗi ɗaiki zi sɗa ɗa a wala na jre, na woɗi futini ɗikat, buri ki siɗi ɓa, tiki lai, epin-gezaki a na amai war fuŋ-n'Alaw.

Gadai

² Ki siiki kureɗ war siiwa, ki simni karki warni lai warni zini tese.

³ Ki siiwi buriyi lai, kapai Alaw a mala min hlai edi buriyi aŋ ɓiki seŋ, kapai wala zi ŋoyai na wiini Kristu, na m'aŋ warni jaɓ burini ɗa, a sɗa aŋ muɗa edi.

⁴ Kapai mu sɗa aŋ muɗaŋ edi gaglai maini na mu muɗaŋ ɗa nɵa.

⁵ Ki piyi gaini hangal arbaɗi nagai n'eɗisi edi ɗa, ki bi hlai edi kadai kai.

⁶ A juva ɓa a niyasi edi war miki par ɗa a seŋ na pɗamai, cetet gaini hum, kapai ki siɗi aŋ wiyini seŋ wiini asiya asiya ɗi paŋ maini n'a na ɗa ɵa.

Miɗi na wiini Pawlus gaini wuti n'asakal

⁷ N'aŋ sa paŋ ɗa, Tikikus aga a miɗiŋki, ni a tawala zi diri gara, a ɵeŋ na jre, a maya zi bege na war Epiɗ-ɗai.

⁸ Mu ɵinaŋɗi siki na ɗa buri hanɗa, kapai ki siɗi na siyi par, a siki arai zi pi lai.

⁹ Mu ɵinaŋɗi na ɗa gaini Onesimus, tawala zi diri gara, a ɗif n'ahaki par, nagai aga e miɗiki midini wala n'a na za won na ɗa.

¹⁰ Aristarkus, maya n'aŋ war daŋgaya n'a ɵiɓiki wuti, Markus n'arwaini epini Barnabas a na ɵiɓiki wuti lai, ni na tiki ki nivi labar miɗini ɗa, na ɓa a halaɗi li siki, aga ki yimiŋ siki gaini futini,

¹¹ Yesus n'e yikiŋ ɓa Yustus a na ɵiɓiki wuti lai, arbaɗi zi ɵi gurgle ɗa, hanɗa e ɗi nagai n'e tipi gaya war sɗa na wiiɗi pai-n'Alaw ɗa, mu nava arai zi pi siɗi par lai.

¹² Epafras n'ahaki par ɗa a na ɵiɓiki wuti, a ɗif zi sɗa na wiini Yesu Kristu, a na fuɗa was buriki kureɗ war siiwoni, ɓa kapai won hlai na ki vi li amai war pɗem, ki siɗi dirini Alaw li edi gaglai lai ɗa, ki siɗi aŋ ɗiyi gdaŋ.

¹³ Mu kiɗa mu muɗa zaida hanɗa midini, a za sda viya buriki, buriɗi nagai na war Lawdikiya lai, gaiɗi nagai na war Hierapolis ɗa lai.

¹⁴ Lukas, doktor marmaya zi diri gara gaini Demas lai e ɵiɓiki wuti.

¹⁵ Ki ɵiɓiɗi wuti wiiɗi tawalakai na war Lawdikiya gaini Nimfas gaini tipi n'a na aha war dalamni lai.

¹⁶ Won hlai na ki ŋiti li letre hanɗa edi arbaki ta ɗa, ki sitiɗi wiini tipi na war Lawdikiya ɗa e ŋiti edi arbaɗi ta lai. Na wiiɗi tipi na war Lawdikiya ɗa tiki aga ki ŋiti edi arbaki lai.

¹⁷ Ki miɗini wiini Arkipus ɓa, a tika hangalni sin ɵeŋ n'a navaŋ war Epiɗ-ɗai, kapai a vaŋ amai war futini.

¹⁸ Mu na ɵiɓiki wuti, ta Pawlus gaini ta dama, hini midiki a kɵa burini zabŋa, yum a sumna gaiki.