Kolosekai 3 - Ɗû na sɗik na wiini Alaw

¹ Nɵa ɗa, na ɓa ki ɵiyi amai ya gaini Kristu ɗa, ki piyi ɗa a wazagai n'amai, won hlai na Kristu aŋ gaini simni war hlai zi hormo na wiini Alaw.

² Ki hiini ɗa midini wazagai n'amai, midini wazagai na warɗi yai ɗa kai,

³ buri ɓa tiki ki mri ca, suŋfaki aŋ gaini ŋoyai gaini Kristu war Alaw.

⁴ Won hlai na Kristu, suŋfa na wiiki, a siŋka sini li edi gaglai, war hlai hanɗa tiki lai aga ki firiyi gaini warɗi abai.

Paiyai na wel gaini na hehe

⁵ Nɵa ɗa ki fiɗi wazagaiɗi yai ɗa edi, hanɗa a: maɵara, hihir, sile, hiini na meefeŋ, gorom, hanɗa a hûrgû n'azumai wuzani alawai na kadai.

⁶ Pin hanɗa, hiy na wiini Alaw a halasi midiɗi nagai n'e ɵini kai ɗa.

⁷ Hanɗa a wazagai na tiki ki ɗisi ka warni a ɗipar, won hlai na ki ɗisi ka ki piyi maini hanɗa nɵa ɗa,

⁸ Amma tiyana ɗa tiki lai ki hini wazagai n'a na ɗa paŋ edi: hiy, suwar, zini meefeŋ, genai, seŋ na ɗewek, n'a niyasi edi war miki par.

⁹ Ki zi eles wiiɗi marki arbaɗi marki kai, buri tiki ki kûɵi ɗif na wel edi siki par gaini sdani lai,

¹⁰ ki wi siki a ɗif na hehe, n'a bunda hehe pin siɗi aŋ kata gani ni n'a rgaŋ.

¹¹ War ni ɗa, Grek aŋ kai, Yudiya aŋ kaalai, zi ɵi gurgle aŋ kai, na zi ɵi gurgle kai aŋ kaalai, ɗai n'edi par e ɗi kai, na mukurakai e ɗi kaalai, bege aŋ kai, kempe aŋ kaalai, amma Kristu a na paŋ war paŋ.

¹² Nɵa ɗa, tiki n'Alaw a viriki edi, na sɗik, zi diri gara, ki wi agul zi yum warki, ki wi diri siki gaini hûsi gaini hangal gain ziyini-seŋ na gaini hangal lai.

¹³ Ki libi seŋɗi marki arbaɗi marki, na ɓa ɗif seŋni a na gaini maini ɗa, e si ni arbaɗi marɗi, maini n'EPIƊ-ƊAI a siki ni nɵa, tiki lai ki zi nɵa lai.

¹⁴ A suwa paŋ ki wi diri siki, hanɗa a wala n'a tipiki siɗi marki war vi n'amai na pɗem.

¹⁵ A juva ɓa, ɵeɗ na wiini Kristu na ki yikisi sini war si na ktai hanɗa a ŋa war agulki, ki simni gaini zini tese warki kûreɗ-kûreɗ.

¹⁶ A juva ɓa seŋni Kristu a sumna arbaki gaiɗi abaini, ki hitri marki, ki gidi marki lai arbaɗi marki war yel, gaini yama gaini yama zi tese gaini yama zi seze lai, ki zini yama zi zini tese warɗi agulki sin Alaw.

¹⁷ Wala na ki ziŋ paŋ ɗa, koo war seŋ zi miɗi, koo war sɗa ɗi ɗa, ki zi paŋ war yikini Epiɗ-ɗai Yesu, ki zini tese wiini Alaw Api war ni lai.

Maɵagai gaiɗi falakai, aliyagoi gaiɗi tamai

¹⁸ Tiki falakai, ki gidi piɗi maɵagaiki maini n'a na pɗem arni Epiɗ-ɗai nɵa.

¹⁹ Tiki maɵagai, ki diriɗi falakaiki, ki divi siɗi kai.

²⁰ Tiki aliyagoi, ki ɵini piɗi tamaiki war wazagai paŋ, buri hanɗa a wala na pɗem arni Epiɗ-ɗai.

²¹ Tiki tamai na maɵagai, ki ɓilkiɗi agulɗi aliki kai, kapai hangalɗi a tuura kai.

²² Tiki ɗai zi sda, ki ɵini piɗi epin-gezakaiki na war neŋ-si war wazagai paŋ, hanɗa buriɗi arai kiini kai, maiɗi nagai n'e piyi aŋ jûvi arɗi ɗai nɵa kai, amma gaini hûsi warɗi agul, war hunai na pin Epiɗ-ɗai.

²³ Na ki ziŋ paŋ ɗa, ki ziŋ gaiɗi agulki paŋ, maini na ɓa ki ziŋ na ɗa wiini ɗif kai amma wiini Epiɗ-ɗai.

²⁴ Buri tiki ki siɗi ɓa aga ki nivi bulum aŋ vrak tin Epiɗ-ɗai par. Zi aŋ ɗai zi sɗa na wiini epin-gezaki na daaba, a dara muɗa Kristu.

²⁵ Buri ni n'a za wala na woɗi futini ɗikat kai ɗa, aga a nava ɗa a wala na ɗikat kai n'a zaŋ ɗa. Buri Alaw a za ɓraw ni arɗi ɗai kai.