Kolosekai 1 - Ɗû na sɗik na wiini Alaw

Ɵiɓini wuti

¹ Pawlus, apostel na wiini Yesu Kristu, pin diri na wiini Alaw, gaini tawal Timotewus,

² siɗi tawalakai na war Kolose, n'e ɗa sɗik, jre lai war Kristu. Alaw n'Apumu a siki yum gaini ɵeɗ.

Zini tese burini labar na pɗem

³ Mi si tese sin Alaw epini Epiɗ-ɗaimu Yesu Kristu, mi ɗa siiwi kureɗ buriki lai.

⁴ Tiyi mi ɵini labar miɗini yimi na wiiki, gaini diri na ki diriɗi ɗai na wiini Alaw.

⁵ Burini biyi-na-pin-ɵeɗ n'a na biyiki amai war fuŋ n'Alaw, biyi na pin ɵeɗ na tiki ki ɵini labar miɗini ya war seŋ na jre, a dara muɗa labar na pɗem.

⁶ Labar na pɗem hanɗa a coɗi ahaki ya, maini n'a na wa ali, a na wula amai lai warɗi duniya na gaini abaiɗi, a na ahaki ɗa nɵa lai, haa sini mefeŋ na ki ɵini, na ki hitri aŋ siɗi yumni Alaw jre jre lai.

⁷ Pin gadai na ki niviŋ tin Epafras maiki zi bege, zi diri gara, buriki, a ɵeŋ na wiini Kritu na jre,

⁸ a miɗiyi miɗini diri na Seze a waŋ warki ɗa.

Siiwa na burini tipi na war Kolose

⁹ Nɵa tiyi lai, sin mefeŋ na mi ɵini labar hanɗa par, midiyi a wula gaini siiwa na sin Alaw buriki ɗa kai, mi siiwi tini buri a viki gaini siɗini dirini war yel gaini siɗi na war seze paŋ lai,

¹⁰ kapai ki piyi payai n'a juva arni Epiɗ-ɗai, ki tili arni pɗamai war wazagai paŋ, ki wi ali war sɗa na pɗamai paŋ, ki wili amai war siɗi na wiini Alaw lai.

¹¹ Kapai ki nivi spak war wazagai paŋ pin gdaŋni n'abai, gaini hanɗa ki siɗi aŋ ziyi seŋ paŋ gaini hangal, ki siɗi aŋ libi tanai paŋ gaini hangal lai.

Ahi a ni n'a siŋka Api na ɗif a talaŋ kai edi ɗa

¹² Gaini firiyi, ki si tese sin Api, n'a bundumu aŋ ɗai n'e kiɗi aŋ nivi bulum gaiɗi na sɗik paŋ war gaglai.

¹³ A plumusi edi pin spakni gegeŋ par, a mulumusi warɗi pai na wiini Ahini zi diri gara.

¹⁴ War ni mu nuvumu pli-n'edi gaini hinini tuwur na wiimu lai.

Vi n'amai na wiini Alaw

¹⁵ Ni a Ni n'a siŋka Alaw na ɗif a talaŋ duk kai edi, a Ahi zi wi n'avut arbani wazagai n'a rga paŋ.

¹⁶ Buri wazagai paŋ a rga gaini Ni, wazagai na war fuŋ-n'Alaw, wazagai na midiɗi yai lai, wazagai n'armu a talaŋ gaini na mu tuluŋmu kai ɗa lai, Paramai zi pai, abai pai, gaini spak. A za wazagai paŋ a Ni, burini ni lai.

¹⁷ Ni ɗa, a na wuzani wazagai paŋ par, wazagai paŋ a na na ɗa gaini Ni lai.

¹⁸ Ni a humok na wiini si, a dara muɗa na wiini tipi. Ni a pi zi tiki, a Ahi zi wii n'avut arbaɗi zi mri, kapai war wazagai paŋ ɗa, a za aŋ n'avut.

¹⁹ Buri a tala arni Alaw pɗem aŋ hina wala n'a yika ɓa vi n'amai ta ɗa a sumna warni.

²⁰ Gaini Kristu a firiya a toya arbani gaini wazagai paŋ, wazagai na midiɗi yai, wazagai na war fuŋ-n'Alaw lai, a za ɵeɗ gaini Ni, gaini felni n'amai sini dagra.

²¹ Tiki na ɗipar ki ɗi ka morkokoi, gawni Alaw war hiini na wiiki, gaini sdaki na maafanai lai.

²² Tiyana Alaw a toya li gaiki war Ahini, war mrini na war neŋ-si, kapai a sɗa aŋ ɗiyiki wuzani arni sɗik, gaini tirki siki kai, seŋ na meefeŋ midiki kaalai.

²³ - Na ɓa ki ɗiyi li war yimi jre jre, gaini pi azumai gdaŋ, gaini ɗiyi gdaŋ lai war biyi na pin ɵeɗ, na labar na pɗem a saŋ, na ki ɵiniŋ, n'a ɓaka li sin wazagai zi rgi paŋ n'a na midiɗi yai, na ta Pawlus mu bunda tiyana aŋ ɵeŋni na ɗa, na ɓa ki hini ɗif aŋ wiliki edi warni par kai ɗa!

Hatam na wiini apostel

²⁴ Tiyana mu firiya war gir na mu na sɗaŋ ɗa buriki, gir n'a hina mini Kristu burini sini, a dara muɗa burini tipi ɗa, mu dara mu vaŋ amai war neŋ-sa.

²⁵ Ta mu bunda aŋ ɵeŋ na wiini tipi pin sɗa n'Alaw a saŋ sa buriki kapai mu ɓaka seŋni Alaw edi woɗi futini.

²⁶ Wala zi ŋoyai hanɗa a na ka gaini ŋûyi cok arɗi ɗai, haa a ɗipar, amma Alaw a siŋkaŋ li edi gaglai tiyana arɗi ɗai na wiini.

²⁷ Wiiɗi nagai hanɗa, Alaw a firiya a siŋkiɗi ɓa, arbaɗi pinziba na zamai ɗa lai wala zi ŋoyai hanɗa a na za a suwa pɗemni, hanɗa ɓa: na ɓa Kristu a na arbaki, a biyi-na-pin-ɵeɗ na wiiɗi abai.

²⁸ Hanɗa a Ni na tiyi mi ɗa ɓiki miɗini, na mi ɗa hitriɗi ɗai miɗini, mi gidiɗi ɗai paŋ gaini lai war yel, kapai ɗif paŋ a va amai war pɗem war Kristu.

²⁹ Buri hanɗa, mu na fuɗa was, aŋ hitima gaini gdaŋ na wiini Ni n'a na za sdani gaya.