Hoseya 7 - Ɗû na sɗik na wiini Alaw

¹ Won hlai na mu zûûliti li Izrayel ɗa, meefeŋ na wiini Efrayim gaini sda na maafanai na wiiɗi Samariya ɗa aga a siŋka edi. Buri ɓa e miɗi jre kai, mahalakai e niyi amlai war dalam, askarai ɗa, hlai n'anene gai tiki tiɗi ɗaw lai.

² E hiini warɗi ɓa, meefeŋ n'e ziŋ paŋ aŋ mada paŋ; Tiyana ɗa, sdaɗi a gûnûɗi azumai gun, a na wuzani ara mefeŋ paŋ.

Fiki n'amai siɗi paakai

³ E ɵini dawaŋ mini pai gaini meefeŋ n'e ziŋ ɗa, ɗaiɗi n'abakai zi ɵi wuze ɗa, gaini rhaiɗi lai.

⁴ Nagai paŋ e ɗi ɗai na maɵarakai, kal kal maini fur na ɗif n'a za peŋ a paŋ ɗa nɵa. Hlai n'a haɗa avdini li paŋ ɗa, a yiba afu amai kir kai, haa avdi a tika amai.

⁵ War mefeŋ na fet na wiini pai na wiiɗi a za li ɗa, n'abakai zi ɵi wuze ɗa e ci vin haa e bindi veglek. E tiki piɗi e riyi piɗi ɗai, pai ɗa, a za maiɗi ɵa lai.

⁶ Riɓti n'e riɓti ɗai ɗa a ya amlai warɗi maini fur nɵa; duvuk ɗa, hiy na warɗi a kala weseŋ kal, gorof par, hlai a sɗasi li edi ɗa, a ya maini afu n'abai nɵa.

⁷ Gai hlaiɗi paŋ, gai sûwi kaŋ maini fur nɵa, e fiɗiɗi abakaiɗi zi ɵi wuze ɗa edi, paakaiɗi paŋ e ɗi kir kai, ktai n'a zilbaŋa aŋ kai.

Izrayel tese warɗi sini Alaw kai

⁸ Efrayim te tala na ɗa maiɗi pinziba na zamai ɗa ɵa lai, Efrayim te bunda na ɗa maini gamla n'a da pɗem kai nɵa.

⁹ Ɗai n'edi par e ɗa vidi gdaŋɗi ɗa, amma te sɗa ɵa kai. Wel a na yimiti, amma te sɗa ɵa kai.

¹⁰ Kûlûni-si na wiiɗi Izrayel ɗa a wala n'a ka seŋ midiɗi; e diri e wiyisi sini EPIƊ-ƊAI Alaw na wiiɗi kai, gai hanɗa paŋ ɗa, e piyiŋ kai.

¹¹ Efrayim te bunda maini dere nɵa, te sɗa wala kai, yel midiɗi kaalai; e ɵini piɗi Egipte, e hili war Asiriya lai.

¹² Won hlai n'e ɗa hili ɗa, mu poko avaŋa midiɗi, mu yimiɗisi azumai maini wala zi ɗufli n'arbani hlai n'amai nɵa; mu hitriɗi, maini gadai n'e niviŋsi aha arbaɗi ɗaiɗi par nɵa.

¹³ Haw gara buriɗi! E yimi warɗi edi sa par gaigai, aga mu vidiɗi edi, buri e fiki amai sa, Ta mu na ka mu pliɗi edi, amma e miɗi eles mada viya.

¹⁴ Won hlai n'e tûwi sa ɗa, e tûwi ɗa gaiɗi agulɗi paŋ kai, Amma e nûûmi miɗini liy na wiiɗi, e diŋgi buri e piyi algama gaini vin, e yimi warɗi n'edi sa par sek sek.

¹⁵ Mu hitriɗi ɗa mu ta, mu siɗi gdaŋ ɗa mu ta lai, e bindi e fikisi ɗa amai sa aŋ ziŋa meefeŋ.

¹⁶ Aga e wiyisi, amma sa ta kai, e tili maini taŋ na gai fi ka nɵa, n'abakai zi ɵi wuze na wiiɗi aga e mri min kaɵkar, buriɗi elesiɗi na te muzuga miɗi pla pla gaini seŋ na meefeŋ n'e miɗiŋ sa ɗa, aha war Egipte ɗa, ɗai aga e ziɗi yewere lai.