Hoseya 6 - Ɗû na sɗik na wiini Alaw

¹ Nɵa aga ki miɗi: Hulumu, wuyumu sini EPIƊ-ƊAI, a zumu wuruk ɗa a ni, amma aga a zuulumu a ɵoɗo sumu edi ɗa a ni, amma aga ama min wurukmu.

² Mefeŋ nɵa sulu ɗa aga a sumu suŋfa, mefeŋ n'ag'aŋ hu ɗa, aga a ɵiyumu amai, aga mu sumnumu karmu wuzani arni.

³ Sɗumu ɓa EPIƊ-ƊAI a Alaw fakat. Piyumu aŋ suɗuŋmu jre jre Gizini a wala na sispaini aŋ kai, maini gizini hlai na rum rum ɗa nɵa. Aga a halasi maini faŋ nɵa, maini faŋ n'a ɵa asakal n'a yima afti ɗa nɵa.

⁴ Aga mu za buriku ɗa a maɗa, Efrayim? mu za buriku ɗa a maɗa, Yuda? Diri na ki diriŋa ɗa a na maini ɗugul zi faŋ na gorof par nɵa, maini maɗai na wa duvuk, gorof par tar a giyha nɵa.

⁵ Buri nɵa, mu ɵiɓiɗi gaiɗi ɗai na min Alaw, mu fiɗiɗi gaini seŋ na ma par lai, sariyaiku te za ɗa girvudi kaŋ.

⁶ Mu firya ɗa a ɓaka ɗa kai, amma mu firya ɗa a diri. Mu firya siɗi na ɗai e siɗi Alaw, a suwa ɓaka zi yi ɗa lai.

Ɗai na Izrayel e zi wazagai na maafanai n'a sa firyi wiini Alaw kai

⁷ Maini n'a za war Adam nɵa, e hini bonu na mu zaŋ gaiɗi edi ta. E zi wazagai na maafanai na mu firyaŋ kai ɗa.

⁸ Galaad a fuŋ n'abai na wiiɗi ɗai na maafanai, kureɗ e piyi aŋ mi fel edi.

⁹ Vok na wiiɗi paakai zi ɓaka ɗa, a na maini vok na wiiɗi askarai n'e ɗa riɓti ɗif nɵa; e fiɗi ɗai warɗi futi na Sikem sek ɗa, a wala zi siyer n'abai.

¹⁰ Midini afti na wiiɗi Izrayel ɗa, mu tala wazagai na haharai viya, pinzibani Efrayim ɗa, a za zawar na wiini na woni, ɗai na Izrayel e bindi siɗi haharai na ɗa woni lai.

¹¹ Yuda, tuku lai, hiɗiku a na gobi, won hlai na mu wiyiɗi ɗaiŋa li war aziɗi n'avut ɗa.