Hoseya 14 - Ɗû na sɗik na wiini Alaw

¹ Sai Samariya te zizina seŋɗi ɗa, buri ɓa te faka amai sini Alaw na wiiɗi. Aga e mri mini hatam, aga e fiɗiɗi aliɗi ɗa edi, falakaiɗi n'e ziyi ɗa, aga e ɓisi warɗi edi lai.

Izrayel te wayasi li sini EPIƊ-ƊAI ɗa aga te zuula

² Izrayel, wayasi sini EPIƊ-ƊAI Alaw na wiiyi, buri ɓa ku kɵa burini meefeŋ na wiiku.

³ Wiyisi sini EPIƊ-ƊAI, kinisi ɗa a seŋ na maini hanɗa ɵa, siyi ni burini meefeŋyi, yima sdayi na pɗamai ɗa tiyi par lai, War balamni ɓaka na mi ziŋ gaini garakai ɗa, aga mi suku ɗa a seŋ na miyi par ɗa.

⁴ Ɗai na Asiriya ɗa e kiɗi e kûrɗiyi kai, aga mi niyi duɓani plasai aŋ hitimi kir kai, aga mi yiki wazagai na mi ziziniŋ gaini tiyi ɓa: “Alaw na wiyi” kir kai, buri ɓa ku hiina haw buriɗi ɗai na huyokai ku tuku.

⁵ Aga mu zuula meefeŋ na wiiku ɗa, aga mu diriɗi gaini diri na caŋ gara, buri ɓa hiyŋa na siɗi ɗa a vada vat.

⁶ Buriɗi Izrayel ɗa, aga mu bunda maini maaɗai n'a wa nɵa, aga a za fler maini miye nɵa, aga a ruva sirdai maini luwuŋ na Liban ɗa nɵa.

⁷ Graŋni aga a wa edi, aga a juva maini luwuŋ olive nɵa, aga a sa lugos na pɗem maini huwuŋ na Liban ɗa nɵa.

⁸ Aga e wiyisi, nagai n'e simni pin sezeni ɗa, aga e wiyi e hirmi algama pra, aga e sifiyi maini luwuŋ, yikiɗi aga a wa gara maini vin na Liban par nɵa.

⁹ Efrayim, wala n'a tipiyi katawai gaini alawai zi rgi ɗa a maɗa? Aga mu wiyuku seŋ mu ta, mu mula ara puku mu ta lai. Mu na maini luwuŋ Sipre n'a goɗa nɵa, ku haɗa seyem na ɗa buriya ta.

¹⁰ Ɗif na yel ɗa, aga a ɵina wazagai hanɗa, ɗif zi siɗi ɗa aga a ɵina ezini ɗa, buri futi na wiini EPIƊ-ƊAI a na ɗikat: Ɗai na jrekai e hili warni, nagai n'e ɵini gat kai ɗa, e kiɗi e hili cir kai.