Hoseya 1 - Ɗû na sɗik na wiini Alaw

¹ EPIƊ-ƊAI a miɗini seŋ wiini Hoseya n'ahini Beeri, war mefeŋ na wiini Oziyas, na wiini Yotam, na wiini Akaz, na wiini Ezekiyas e ɗi ka aŋ paakai na war Yuda, gaini mefeŋ na wiini Yerobowam n'ahini Yowas, pai na war Izrayel.

Alini Hoseya gaiɗi Gomer

² Pi zi tiki na wiini seŋ n'EPIƊ-ƊAI a miɗiŋɗi wiiɗi ɗaini war mini Hoseya: EPIƊ-ƊAI a miɗini wiini Hoseya: Hala, ku tikiti muni zi zawar, aga te wuku ali n'e wi war maɵara, buri ɓa ɗai na midini afti ɗa paŋ, e hini EPIƊ-ƊAI edi mak, e tiɓi pin alawai na zamai.

³ A hala a tikiti Gomer n'ahini Diblayim. Te tika fel, te wiini ahi ktai.

⁴ EPIƊ-ƊAI a miɗini wiini Hoseya: Ku sini yiki ɓa Yizreyel; buri ɓa agwiya ɗa, aga mu zilbini mini pinzibani Yehu, burini fel n'a maŋ edi war Yizreyel.

⁵ War mefeŋ ni ɗa aga mu vada spak zi pai na wiiɗi Izrayel ɗa edi, war huduk na Yizreyel.

⁶ Te tika fel pra, te wuti ahi na muni. EPIƊ-ƊAI a miɗini wiini Hoseya: Siɗi yiki ɓa Lo-Ruhama, “Na na ɗif a hiina haw buriɗi kai” buri ɓa aga mu hala wuza gaini hiinini haw, na buriɗi pinzibaɗi Izrayel ɗa kir kai. Sa ɵa blaŋ aŋ sini ni burini meefeŋni ɗa kai.

⁷ Amma aga mu hiina haw buriɗi pinzibani Yuda; aga mu pliɗi edi ɗa, gaini EPIƊ-ƊAI, Alaw na wiiɗi; aga mu pliɗi edi ɗa gaini ɓaraw kaalai, gaini kaɵkar kaalai, gaini hatam kaalai, gaini plasai kaalai, gaini saretai zi gaw kaalai.

⁸ Te cikiti Lo-Ruhama edi min fiyaw par, te tika fel katawai pra, te wa ahi zamai ktai.

⁹ A miɗini: sini yiki ɓa Lo-Ammi “Ɗaiŋa kai”; buri ɓa ki ɗi ɗaiŋa kai ta ɗe mu wala ktai buriki kaalai.