Hebrekai 7 - Ɗû na sɗik na wiini Alaw

Pai n'abai zi ɓaka pin giri na wiini Melkiseɗek

¹ Melkiseɗek hanɗa, a na fu a pai na Salem, pai zi ɓaka na wiini Alaw n'amai n'amai, a hala aŋ nava gaini Abraham, won hlai n'Abraham a wayasi edi par min hatam, n'a rɗasi amai midiɗi paakai ɗa, nɵa Melkiseɗek a ɓakaŋ.

² Abraham a sini doogoni wazagaini paŋ. Na ɓa mu muɗumu na ɗa miɗini yikini ɗa, Melkiseɗek a waya edi ɓa Pai na wiini Jre-ɗikat, pra a pai na Salem a dara muɗa: pai na wiini ɵeɗ.

³ Ni ɗa epini aŋ kai, emini t'aŋ kai, tiyakaini e ɗi kaalai, pi zi tiki na wiini mefeŋ ni aŋ kai, dibini aŋ kaalai. A bunda kal kal maini Ahini Alaw nɵa, a pai zi ɓaka ɵa ha kureɗ.

⁴ Tiliti abai na wiini ɗif hanɗa haw, ni n'Abraham, n'apumu n'amai, a sini doogoni wazagai na vurmaŋsi ɗa.

⁵ Pinzibani Levi n'e zi aŋ paakai zi ɓaka ɗa, pin gadai ɗa, gadai a sa siɗi buri e yimi doogoni wazagai tiɗi ɗai par, a dara muɗa tiɗi tawalakaiɗi par, paŋktai nagai e ɗi pinzibani Abraham lai.

⁶ Amma ni ɗa aŋ war giri na wiini pinzibaɗi kai, yima doogoni wazagai tini Abraham, a ɓaka ni na ɵini ha ɗa a muɗa miɗini ɗa lai.

⁷ Hanɗa a wala n'a na edi armu gaglai, n'agwi ɗa a nava ɓiki tini n'abai ɗa par ɵa.

⁸ War gal ktai, ɗai n'e yimi doogoni wazagai ɗa e ɗi ɗai murɗakai, n'e kiɗi e nivi mri, amma war gal hanɗa sek ɗa a ɗif n'e miɗi miɗini ɓa a na karni.

⁹ Nɵa ɗa, Levi na doogoni wazagai a sa sini na ɗa, ni a sasi doogoni wazagaini gaini Abraham.

¹⁰ Buri ɓa a na fu amlai sini epini par hai, hlai na Melkiseɗek a hala a nava gaini Abraham na ɗa.

¹¹ Pin gadai na wiiɗi aliɗi Izrayel ɗa, e viri aŋ paakai zi ɓaka ɗa e ɗi pinzibani Levi, amma sdaɗi zi paakai zi ɓaka ɗa a va amai war pɗem kai. Ɵa kai ɗa e viri pai zi ɓaka zamai pin giri na wiini Melkiseɗek, pin na wiini Aaron ɗa kai ɗa buri ma ɗa. Pɗemni tiɓ ɗa a ma ɗa?

¹² Nɵa ɗa na ɓa sdani pai zi ɓaka a bunda li ɗa, a dewele ɓa gadai ɗa a bunda lai.

¹³ Buri ni na seŋ hanɗa a muɗa burini na ɗa, a na war pinzibani na zamai par, na ɗif na woni par ktai maa a za ka sɗa miɗini gûwiŋ zi ɓaka kai.

¹⁴ A na edi gaglai ɓa Epiɗ-ɗai na wiimu a wa war pinziba Yuda, a pinziba na Musus maa a muɗa seŋ ktai miɗini burini sdaɗi paakai zi ɓaka kai zaŋ.

¹⁵ Hanɗa a bunda edi gaglai a suwa pra, won hlai na pai zi ɓaka zamai a cosi, na maini Melkiseɗek nɵa ɗa.

¹⁶ A bunda aŋ pai zi ɓaka ɗa pin gadai zi ɗû gaini seŋ zi gadai na wiiɗi ɗai kai, amma pin spak na wiini suŋfa n'a ɓilka edi kai ɗa.

¹⁷ Buri ɓa zaida a muɗa edi midini maini nɵa: Tuku ku pai zi ɓaka ɵa haa kureɗ, pin giri na wiini Melkiseɗek.

¹⁸ Nɵa ɗa gadai n'avut ɗa a fuɗa edi su, buri ɓa a huruf, a za wala na pɗem kai.

¹⁹ Buri ɓa gadai ɗa a va wala ktai amai war pɗem kai zaŋ, a gizi tiyana ɗa a biyi-na-pin-ɵeɗ na pɗem a suwa, na gaini hanɗa mu kuɗumu mu turumu gobi gaini Alaw.

²⁰ Hanɗa a za gaini wala zi hi miy, na zamai ɗa e bindi aŋ paakai zi ɓaka ɗa gaini wala zi hi miy kai;

²¹ amma ni a bunda aŋ pai zi ɓaka pin wala zi hi miy, pin miɗi na wiini n'a miɗini ɓa: Epiɗ-ɗai a ha wala mini ya, aga a pla mini kai zaŋ, tuku ku pai zi ɓaka ɵa haa kûreɗ.

²² War hanɗa, Yesu a bunda burimu aŋ wala n'a siŋkumu edi jre jre ɓa bonu na pɗem a suwa a na.

²³ Pra, paakai zi ɓaka ɗa e vigisi viya, buri ɓa mri a hiniɗi aŋ simni karɗi kai.

²⁴ Amma ni, buri ɓa a hina fu ɵa gamai ɗa, sɗa zi pai zi ɓaka na wiini ɗa a zi vidi edi kai.

²⁵ Buri nɵa, a kiɗa a kûriɗi nagain'e hilisi sini Alaw sin ni par ɗaw ɗa gaini seŋ kai, buri ɓa ni aŋ karni kureɗ buri a siiwa buriɗi.

²⁶ Burimu tumu ɗa, hanɗa a pai n'abai zi ɓaka na mu ɗa piyuŋmu ɗa, na sɗik na gaini seŋ midini kai, na hilu, na bonuni gaiɗi na tuwarai kai, n'a na haa amai midini hlai n'amai ɗa par.

²⁷ Jaani a na maiɗi paakai n'abakai zi ɓaka, buri a za ɓaka mefeŋ mefeŋ paŋ burini tuwur na wiini avut, asakal par burini na wiiɗi ɗai lai nɵa kai. - A za hanɗa a zi ktai, aga a waya pini pra kaalai, won hlai n'a za ɓaka gaini sini dama ɗa.

²⁸ Gadai a miliɗi aŋ paakai zi ɓaka ɗa e ɗi ɗai na huruf a kiɗa a yimiɗi, amma seŋ na wiini wala zi hi miy n'a halasi asakalni gadai hanɗa par ɗa, a tika Ahi aŋ pai zi ɓaka, n'a bunda gaini vi n'amai war pɗem haa hlai n'a vada kai.