Hebrekai 6 - Ɗû na sɗik na wiini Alaw

Deni giri a wiini pai zi ɓaka na wiini Melkiseɗek

¹ Nɵa ɗa, hinumu ka hitri n'agogoi na miɗini Kristu n'a za war pin zi tiki edi ta haw, hulumu wuzamu gaini hitri na wiiɗi n'abakai. Ezini zi tûûri n'azumai ɗa aga a bunda kai, a ni ɵa: Bindi na gamai, hinini n'edi na wiini sɗa na muɗaŋai, yimi na war Alaw,

² hitri na miɗini baptisme gaini tikini ti, ɵiyi n'amai na wiiɗi ɗai zi mri gaiɗi sariya n'asakal.

³ Na ɓa Alaw a dara ɗa, hanɗa a wala n'aga mu zuŋmu ɗa.

⁴ Buriɗi nagai n'e tili gaglai duk ya, n'e titimi like na war fuŋ-n'Alaw par ya, n'e nivi war Seze-sɗik ya,

⁵ n'e titimi seŋ n'Alaw na pɗem ya, e titimi spakni hlai n'aga gizi lai,

⁶ Paŋktai, e kɵi azumai pra ɗa, nagai e kiɗi e gi si bindi na gamai kir kai. Buri ɓa nagai e tuki Ahini Alaw amai sin dagra, azi n'ag'aŋ sulu, e tikini siyer arɗi ɗai doogo lai.

⁷ Na ɓa faŋ a ɵa li viya, afti a ca li yem pɗem, asakal par a sa seyem li gai futini wiiɗi nagai n'e hirmiŋ lai ɗa, Alaw a ɓaka afti hanɗa.

⁸ Amma na ɓa a diya warni a hedek, gaini duvuɗvuɗ ɗa, a afti na pɗem kir kai, a hina burini a tusa, dibini a yi n'edi.

⁹ Tawalakai zi diri gara, koo ɓa mi miɗi ɵa tekeɗeɗi, mi siɗi edi gaglai ɓa wala na pɗem a na biyiki, a dara muɗa Kûri.

¹⁰ Buri Alaw a na jre-ɗikat-kai kai, kapai miɗini a wula gaini sdaki na ki ziŋ, gaini diriki na ki ziŋ siɗi ɗaini Kristu, burini yikini, na haa tiyana ki ɗa ziŋ ɵa ɗaai.

¹¹ Tiyi mi diri ɓa asiya asiya n'arbaki aga a hala wuzani gaini kurfuk na wiini haa sini dibini, kapai biyi na pin ɵeɗ na wiiki a sɗa aŋ va amai,

¹² kapai ki zi siki liŋliŋ kai, amma ki tiki eziɗi nagai na pin yimi gaini ziyini seŋ na gaini hangal na wiiɗi lai, e nivi bulum n'Alaw a ɵina ha miɗini ɗa.

¹³ Buri ɓa, maini n'Alaw, won hlai n'a za ha wiini Abraham ɗa, ɗif zamai n'a suwaŋ, n'a kiɗa a ha wala mini gaini aŋ kir kai ɗa, a ha wala mini gaini sini dama,

¹⁴ A muɗa: Fakat, fakat, aga mu ɓukuku abai, aga mu sisiɗa pinzibaku lai.

¹⁵ Nɵa, won hlai n'Abraham a tika hangalni ta ɗa, a baya haa a nava wala n'e miɗini miɗini ɗa lai.

¹⁶ Ɗai murɗakai e hi miɗi gaini wala n'abai a sûwiɗi, wala n'e hiŋ miɗi aŋ siŋka ɓa seŋɗi a jre ɗa, a vada sispai paŋ edi lai.

¹⁷ Maini nɵa, won hlai n'Alaw a firiya a siŋkiɗi wiiɗi nagai n'aga e nivi wala na Ni a za ha midini ya aŋ bulum ɓ'aga a pla mini kai ɗa, a ha wala mini.

¹⁸ Kapai war wazagai na sulu n'a kiɗa aŋ bunda wulani kai hanɗa, na warni n'Alaw a kiɗa a za eles kaalai ɗa, mu suɗumu aŋ nuvumu arai zi pi n'abai, tumu na hlai zi ŋoyai na wiimu a na war yimimu na pin biyi-na-pin-ɵeɗ n'a muɗi edi sumu ɗa.

¹⁹ Biyi-na-pin-ɵeɗ hanɗa, a na burimu maini kawai na guma n'e ɵiŋ li agoɗom ɗa, a ɗala hiliini hulum ɗa nɵa, a na ha amlai duɓani sapa n'a ɓurwa arbani tempel ɗa par, gaini ɗiyi gdaŋ ka,

²⁰ war hlai na Yesu a niya amlai warni burimu, wuzamu woni. A bunda aŋ pai zi ɓaka n'abai ha hlai n'a vada kai n'a vada kai, pin giri na wiini Melkiseɗek.