Hebrekai 3 - Ɗû na sɗik na wiini Alaw

Yesu a suwa Musus

¹ Nɵa ɗa, tawalakai na sɗik, na ki nivi yiki n'amai par, ki mili arki sini Yesu, ni na tumu mu suɗuŋmu edi gaglai, ɓa a Apostel, a Pai zi ɓaka n'abai lai.

² A na fu jre arni Alaw n'a varaŋ ɗa, maini na Musus a na ka war dalamni nɵa.

³ Buri nɵa a kiɗa buri a nava kol a suwa na wiini Musus, buri ɓa ɗif n'a rgiti dilimi ɗa, kol na wiini a sûwiti dilimi n'a rgiti ɗa.

⁴ Buri dalam paŋ ɗa a rgaŋ ɗa a ɗif, amma Ni n'a rga wazagai paŋ ɗa a Alaw.

⁵ Musus a na fu aŋ ɗif na jre war dalam na wiini Alaw, maini ɗif zi sɗa nɵa, aŋ za zaida midini wazagai n'aga a muɗasi edi asakal.

⁶ Amma Kristu a na miɗini dalamni ɗa maini Ahi nɵa, dalamni hanɗa mu ɗumu tumu, na ɓa mu hinumu yimumu gaini biyi-na-pin-ɵeɗ na wiimu, na mu ɗumu mu kulumu sumu gaini ɗa edi kai ɗa.

Niyi na war si n'amla

⁷ Buri nɵa, maini na Seze-sɗik a na muɗa ɗa nɵa: Girna ɗa, na ɓa ki ɵini li wulani Alaw ɗa,

⁸ ki bindi agulki gdaŋ, maini n'a za war fiki n'amai ɗa nɵa kai. War mefeŋ na ki titimiŋa edi war basga na kaɗataŋ

⁹ na tamaiki e titimiŋa aŋ tili na wara ɗa. paŋktai e tili sdaŋa gaini arɗi lai,

¹⁰ haa buza doogo doogo puɗu. Buri nɵa mu za hiy sin pinziba hanɗa, mu muɗa lai ɓa, yivai paŋ hiiniɗi a wula na ɗa edi sek sek e siɗi wala na mu firiyaŋ siɗi par ɗa kai,

¹¹ nɵa war hiyŋa mu ha wala ma maini nɵa: aga e niyi war si n'amla na wiya duk kai zaŋ.

¹² Ki zi hangal, tawalakai, a juva ɓa agul na maafuni, zi yimi kai aga te za warni ktai arbaki kai, kapai ki hini Alaw na karni edi kai.

¹³ Amma aga ki si arai zi pi arbaɗi marki mefeŋ mefeŋ paŋ, hlai na ɗif a na yika “girna” mini hai ɗa, kapai ktai arbaki a sɗa aŋ tirɗa edi pin diri zi rhai na wiini tuwur kai.

¹⁴ Buri ɓa tumu aga mu nuvumu bri na wiimu gaini Kristu, na ɓa mu ɗiyumu li gdaŋ war yimi na mu tukumusi pumu gaini, haa sin dibi.

¹⁵ Won hlai na ɗû a muɗa maini nɵa: Girna, ɓa ki ɵini wulani Alaw li ɗa, ki bindi agulki gdaŋ, maini n'a za war mefeŋ na wiini fiki n'amai ɗa nɵa kai.

¹⁶ Nagai n'e ɵini, mini Alaw, amma e ɓilkini agulni ɗa, e ɗi ɗai ma ɗa? E ɗi nagai n'e niyisi edi war Egipte par gaini Musus ɗa kai ɗi?

¹⁷ A za hiy haa buza doogo doogo puɗu ɗa siɗi ɗai ma ɗa? Siɗi nagai n'e zi tuwur, n'e mrisi edi war basga na kaɗataŋ ɗa kai ɗi?

¹⁸ A ha wala mini ɓ'aga e niyi war si n'amla na wiini kai ɗa wiiɗi ɗai ma ɗa? Wiiɗi nagai n'e diri e ɵini gat kai ɗa kai ɗi?

¹⁹ Nɵa mu suɗumu gaglai ɓa e kiɗi e niyi war si n'amla kai ɗa burini yimi kai na wiiɗi.