Hebrekai 2 - Ɗû na sɗik na wiini Alaw

Kûri n'abai hanɗa

¹ Buri nɵa aga mu zumu hangal abai a suwa gaini seŋ na mu ɵinuŋmu ɗa, ɵa kai ɗa aga mu wulumu edi.

² Na ɓa seŋ n'a muɗa miɗi ɗai zi ɵeŋ na war fuŋ-n'Alaw par ɗa a za aŋ jre ɗa, na ɓa hi n'amai midini gadai gaini ɵinini gat kai paŋ ɗa a nava vrak na pini ya lai ɗa,

³ tumu ɗa seŋ aga a nuvumu kai ɗa maɵa maɵa ɗa? Na ɓa mu tukumu hangalmu sini kûri n'abai na maini hanɗa ɵa kai, n'a tika pini aŋ muɗaŋsi edi sumu ɗa a Epiɗ-ɗai, na nagai n'e ɵiniŋ ɗa e siŋkuŋmu edi ɓa hanɗa a jre lai ɗa.

⁴ Alaw a sa spak wiini zaidaɗi n'e ziŋ war wazagai zi siŋki, zi hiila, gaini pinzibani hiila na kiini kiini, gaini ɓraw n'edi na wiini like na wiini seze sɗik pin dirini lai ɗa.

Yesu a mra buriɗi ɗai gaini hlaiɗi paŋ

⁵ Amma yai na wuzamu sek na mu ɗuma muɗumu gaiɗi na ɗa, a sitiɗi war tiɗi ɗai zi ɵeŋ na war fuŋ n'Alaw ɓa kapai e ŋi midiɗi kai.

⁶ Amma ɗif ktai a muɗa seŋ hlai ktai maini nɵa: Ɗif tiɓ ɗa asiya ktai ɗa na kapai mada a kɵa gaini ɗa?, Ɗif murɗek ɗa asiya ɗa, na kapai arku pini ɵa ca ɗa?

⁷ Ku zaŋ ɗa azumai par piɗi ɗai zi ɵeŋ na war fuŋ-n'Alaw ɗa agwi. Ku sitini abai gaini kol lai

⁸ Ku mula wazagai paŋ azumai pin ezini. Won hlai n'a mula wazagai paŋ azumai pini ɗa, wala ktai n'a hina, n'a na azumai pini kai, aŋ kai. Amma tiyana ɗa wazagai paŋ a na azumai pini, mu suɗuŋmu edi gaglai ɵa kai.

⁹ Amma tiyana ɗa mu tulumu Yesu, ni n'a za ɗa agwi agwi siɗi ɗai zi ɵeŋ na war fuŋ-n'Alaw ɗa, warɗi abai gaini kol burini mri n'a mra ɗa, nɵa pin yum na wiini Alaw a tetema mri ɗa buriɗi ɗai paŋ.

¹⁰ Buri na ɓa, Ni na wazagai paŋ a wiini, wazagai paŋ a za gaini ni lai, a dara a ka ɗai viya siɗi abai. A pɗem ɓa a va paŋ amai war gir, Ni n'a payasi futi zi kûri na wiiɗi.

¹¹ Buri ni n'a za ɗai edi aŋ sɗik gaiɗi nagai n'e zi edi sɗik ya lai epiɗi ktai, buri hanɗa siyer arni kai, buri a yikiɗi aŋ tawalakaini.

¹² Won hlai n'a muɗa ɓa: Mu dara mu muɗa edi muduku siɗi tawalakaya, aga mu kuluku gaini yama arbani vokɗi diŋgi.

¹³ A muɗa pra ɓa: Ta ɗa aga mu pɵa ɗa miɗini. Katawai pra, M'an na, ta gaiɗi ali n'Alaw a siɗiŋa ɗa.

¹⁴ Buri nɵa, ali hanɗa paŋ ɗa, wala n'a tipiɗi a na: e ɗa war neŋ-si gaini fel, Ni lai a tika si na wiiɗi nagai, kapai gaini mrini a tuura ni na spak a na fu war tini ɗa edi, a dara muɗa mat.

¹⁵ Kapai a piliɗisi edi nagai paŋ n'e simni war bege haa sin mriɗi ta wuzani hunai na wuzani mri.

¹⁶ A na ɵa, a zina ɗa piɗi ɗai zi ɵeŋ na war fuŋ-n'Alaw kai, amma a zina pini pinzibani Abraham.

¹⁷ Buri nɵa, a bunda sini maiɗi tawalakaini nɵa war wazagai paŋ, kapai a bunda aŋ pai zi ɓaka n'abai na gaini hiini haw warni, na jre lai, war sɗa na wiini Alaw, kapai a za ɓaka burini tuwur na wiiɗi ɗai.

¹⁸ Buri na ɓa Ni dama a sɗa gir won hlai n'a nava titimi, nɵa lai, a kiɗa buri a zina piɗi nagai n'e ɗa war titimi lai.