Hebrekai 13 - Ɗû na sɗik na wiini Alaw

Sda n'arni Alaw pɗem

¹ Hili wuzaki gaini diri zi tawal n'arbaɗi marki.

² Morkokoi n'e hilisi ahaki ɗa, ki yimiɗi siki pɗem, ki wûli midiki gaini hanɗa kai. Buri zamai, won hlai n'e zi hanɗa, e yimiɗi ɗai zi ɵeŋ na war fuŋ-n'Alaw siɗi war siɗi kai.

³ Ki hini midiki a kɵa buriɗi nagai n'e ɗa war daŋgai, maini na tiki ki ɗa warɗi daŋgai gaiɗi nɵa, nagai n'e ɗa siɗi gir ɗa, nɵa lai, buri ɓa tiki ki ɗaw Ar si lai.

⁴ A juva ɓa tiki ɗa, ɗif paŋ a sini hormo, hlai zi feŋ na wiini wus gaiɗi muni ɗa, wala na hihir aga a za warni kai. Alaw aga a ɗûklûti sariya midiɗi nagai n'e piyi payai na hihir, gaiɗi n'e zi maɵara lai.

⁵ Ki hini dirini farai a nagga sin hiiniki kai, ki firiyi gaini wala n'aŋ tiki ɗa, Buri Alaw gaini midini dama a muɗa ɓa: Aga mu mula ta edi suku duk kai, aga mu hinuku duk kai zaŋ.

⁶ Buri nɵa, mu kuɗumu aŋ muɗumu gaini hangalmu ɓa: Epiɗ-ɗai a ni n'a zina pa, mu huna zamai ɗa a ma ɗa? Ɗif murɗek a kiɗa za sa ɗa a ma ɗa?

⁷ Ki hini midiki a kɵa gaiɗi nagai n'e ɵi wuzaki, nagai n'e ɓiki seŋ n'Alaw siki, tili dibini suŋfaɗi, tili sini yimi na wiiɗi lai.

⁸ Yesu Kristu a na ɗa ɵa, a bunda kai, a ɗibi, girna, haa hlai n'a vada kai.

⁹ Ki hini ɗif a tirɗiki edi gaini hitrai zamai zamai na maafanai ɗa kai, buri ɓa agul te nava gdaŋ pin yum, gaini wala zi simi kai, buri gadai na wiini simi ɗa a za wala ktai na pɗem siɗi nagai n'e ɗa zi gaini gadaini.

¹⁰ Tumu ɗa gûwiŋ zi ɓaka na wiimu a na, nagai n'e zi sɗa amlai warni gumu ɗa, e kiɗi e nivi simi na wiiɗi war na wiimu par kai.

¹¹ Wazagai n'e fiɗiŋ li aŋ ɓaka ɗa, pai n'abai zi ɓaka a ka felni amlai war Hlai na sɗik, kapai a za ɓaka burini tuwur gaini, amma wazagai hanɗa mal ɗa e yiŋ edi, anene duɓani fuŋ n'abai ɗa par.

¹² Nɵa Yesu lai, kapai a bindiɗi ɗai edi sɗik gaini fel na wiini ɗa, a sɗa gir anene duɓani fuŋ n'abai ɗa par.

¹³ Buri nɵa, hulumo anene sini, edi duɓani fuŋ ɗa par, tupumu gaini aŋ luba siyerni.

¹⁴ Buri ɓa fuŋ n'abai n'a vada edi kai na wiimu aŋ war hlai hanɗa kai, amma mu piyumu na ɗa a fuŋ n'abai n'a na halasi.

¹⁵ Buri nɵa, war Yesu zumu ɓaka zi kol sini Alaw kûreɗ-kûreɗ, a dara muɗa: wala n'a niyasi war mi par a na sa kol sin Alaw wuzani arɗi ɗai doogo.

¹⁶ Amma zini pɗem, gaini zinai n'arbaɗi marki ɗa, ki hini midiki a wula gaini kai, buri Alaw a firiya ɗa a ɓaka na mai hanɗa ɵa ɗa

¹⁷ Ki ɵini piɗi nagai n'e ɵi wuzaki, ki gidi piɗi lai, buri nagai e ɗa tiki hangalɗi siki, buri e siɗi ɓa Alaw aga a zilbiɗi miɗini. Hiniɗi e zi hanɗa gaini marava kai, buri hanɗa a za wala na pɗem siki kai.

¹⁸ Ki siiwi buriyi, buri mi yimi fakat ɓa mi ɗa gaini hiini na pɗem, mi diri mi piyi payai na pɗem wuzani arɗi ɗai paŋ lai.

¹⁹ Mu siiwiki abai paŋ ɓa ki zi hanɗa kapai mu wayaɗi siki witaw a suwa.

Siiwa

²⁰ A juva ɓa Alaw n'a sa ɵeɗ, ni n'a ɵiyasi ɗif zi giɗimi n'abai Epiɗ-ɗaimu Yesu Kristu, amai war mri par, war fel na wiini bonu n'a vada kai,

²¹ a bindiki aŋ kiɗi burini wazagai na pɗamai paŋ, kapai ki zi dirini, a juva ɓa a za wazagai n'a tala arni pɗamai gaimu war Yesu Kristu. Ni na kol a wiini haa hlai n'a vada kai. Amen.

Ɵiɓini wuti n'asakal

²² Tawalakai, mu siiwiki, ki yimi arai zi pi hanɗa siki, buri mu ɗoɗi siki gulai kadai.

²³ Timotewus na tawalmu ɗa e ɵiŋsi ya, na ɓa a cosi li witaw ɗa aga mi hiliɗi piɗi maryi aŋ ɗûglûki.

²⁴ Ki ɵiɓiɗi wuti wiiɗi nagai n'e ɵi wuzaki ɗa, gaiɗi zi yimi paŋ lai. Nagai na war Italia e ɵiɓiki wuti.

²⁵ Yum a sumna gaiki paŋ.