Hebrekai 12 - Ɗû na sɗik na wiini Alaw

Arai gaini hiɗiki sin Yesu

¹ Nɵa tumu lai, maini na mu tulumu zaidakai viya e gunumu azumai, nɵa hinumu jak na guma, gaini tuwur n'a ɵuwumu gop paŋ edi, luwumu luwi n'aŋ tumu ɗa gaini siiki haa sin dibini,

² Armu gaini hiɗiki sin Yesu, ni n'a tika pini yimi na wiimu, n'a kaŋ haa sin vini n'amai ɗa lai, ni na war balamni firiyi a yima gir na wiini dagra sini, hiina burini siyer ɗa kai, tiyana a sumna war hlai zi hormo na wiini Alaw.

³ Buri nɵa, ki mili arki sini ni na ɗai na tuwarai e fiki amai sini mai hanɗa ɵa ɗa, kapai ki kiyi, ki bindi ki ɵi hama siki kai.

⁴ Tiki ki hitimi hatam na gaini tuwur na haa sin fel ɗa kai hai.

⁵ Midiki a wula gaini arai zi pi n'a sa siki maiɗi ali nɵa ɓa: Ahiya, ku yima gadai na wiini Epiɗ-ɗai aŋ wala kadai kai na ɓa a na guduku ɗa, ku ba arai zi pi na wiiku edi kai.

⁶ Buri ni n'EPIƊ-ƊAI a daraŋ ɗa a gadaŋ, ahini n'a firiyaŋ paŋ ɗa, a ɵiɓaŋ.

⁷ Aga ki yimi hanɗa siki, buri ɓa a gidiki na ɗa a gadai, Alaw a za siki na ɗa maiɗi alini ɵa, ahi n'epini a gdaŋ kai ɗa a ahi na maɵa maɵa ɗa?

⁸ Na ŋa gadai n'a za siɗi ɗai paŋ na ɗa za siki tiki kai ɗa, tiki ki ɗi ali na pɗamai kir kai, amma na gamawai.

⁹ Na ɓa tamaimu na war neŋ-si ɗa e gudumu, tumu mu suɗumu hormo lai ɗa, tumu aga mu gudumu pin epini seze, na tumu mu ɗumu karmu burini ɗa a suwa hanɗa kai ɗi?

¹⁰ Nagai ɗa e gudumu buri hlai n'agwi kadai, pin wala n'a tala arɗi pɗem, amma Alaw ɗa a gudumu buri pɗem na wiimu mal, kapai mu nuvumu bri na wiimu war sɗik na wiini.

¹¹ Gadai paŋ pin afuni par tala armu aŋ wala zi firiyi kai, amma a wala zi kwimi, asakal par gaini hanɗa paŋ ɗa a sa ali na wiini ɵeɗ, a dara muɗa na wiini jre-ɗikat.

¹² Buri nɵa, ki yimi graŋki na gaini liiwi ɗa amai, gaini kurnaiki n'a yima gaw gaw ɗa lai.

¹³ Ki zizini futi n'agogoi na ɗikat edi wuzani eziki, kapai na na daŋelaŋ ɗa a hunɗa a suwa kir kai, amma a zuula gai zûûli.

Gadai buri hina yumni Epiɗ-ɗai edi kai

¹⁴ Ki piyi aŋ simni ɵeɗ gaiɗi ɗai paŋ, ki zi siki edi aŋ sɗik lai, gaini zi n'edi aŋ sɗik hanɗa kai ɗa, ɗif a sɗa aŋ tala Epiɗ-ɗai kai.

¹⁵ Ki zi hangal, kapai ɗif a hina yum na wiini Alaw edi kai, kapai luwuŋ na ɗewek a diya arbaki, kapai a tuura ɗai edi gaini masnawni kai.

¹⁶ Ki zi hangal, kapai ɗif zi maɵara a za arbaki kai, ɗif a miisa wala na sɗik kaalai, maini Esaw na burini simi na mini a wuriti abaini zi wii edi nɵa kai.

¹⁷ Tiki ki siɗi ɓa, won hlai n'a firiya a nava ɓiki aŋ bulum ɗa e ɗiyi sini kai, a paiya futi buri a hama, a payaŋ gaini tuwi amma a navaŋ kai.

¹⁸ Won hlai na ki hilisi sini Alaw ɗa, ki hilisi na ɗa siɗi huwuŋ na ɗif a siɗa aŋ tetemiti gaini tini kai ɗa kai: afu n'abai aŋ kai, hlai zi digi aŋ kai, gegeŋ aŋ kai, barawai aŋ kai,

¹⁹ ki ɵini wulani faana a wa kai, gaini suurani seŋ n'a wa gdaŋ kaalai, aliɗi Izrayel n'e ɵini hanɗa e firiyi, buri e miɗiɗisi seŋ kir kai.

²⁰ Buri miɗi na ɓa: “Asiya ɗi paŋ n'a tetemiti li huwuŋ hanɗa, koo ɓa a wala n'ezini puɗu tekeɗeɗi, - fiɗiŋ edi gaini kiryit” ɗa, e firiyi e ɵini hanɗa kai.

²¹ Wala n'a za ɗa wala zi mili hunai pini ɗif, haa Musus lai a muɗa ɓa: Hunai n'abai a yimaŋa gara, mu jiriya lai.

²² Amma tiki ki hilisi na ɗa siɗi huwuŋ Siyon, sini fuŋ-n abai na wiini Alaw na karni, Yeruzalem n'amai par, sin vokɗi ɗai zi ɵeŋ na war fuŋ n'Alaw dubu-dubu viya n'e ɗa war fet.

²³ Ki hilisi na ɗa sini vokɗi ali zi wii n'avut, na yikiɗi aŋ gai ɗû war fuŋ n'Alaw, sin Alaw n'aga a ziti sariya wiiɗi ɗai paŋ, na wiini sezeɗi ɗai na jre ɗa lai, n'e gi sin vi n'amai war pɗem.

²⁴ Sin Yesu, na ɗif n'abai zi tipi arba na wiini bonu na hehe, sin fel zi mi edi n'a muɗa ɗa a suwa na wiini Abel ɗa pra.

²⁵ Ki zi hangal, ki bili edi sin ni n'a na midiki tiyana ɗa kai. Na ɓa nagai n'e bili edi sini ni n'a na ka a gidiɗi midiɗi yai ɗa e kiɗi aŋ mili edi kai, tumu na e gudumusi amai war fuŋ n'Alaw par ɗa, na ɓa mu ɵinumu kai ɗa, aga mu mulumu edi maɵa maɵa ɗa?

²⁶ Aɗipar ɗa, wulani ɗa a migiziti yai, amma tiyana ɗa, a za ɵinini ha maini nɵa: Azi ktai pra, ta dama aga mu muguza hlai, mu migiziti te yai kiiɗi kai, hlai n'amai ɗa lai.

²⁷ Miɗi na ɓa “azi ktai pra” ɗa, a siŋka edi gaglai ɓa wazagai zi rgi n'a kiɗa a muguza paŋ ɗa, arni aga a tika edi kiini, kapai a hina ɗa a wazagai n'a kiɗa a muguza kai ɗa.

²⁸ Buri nɵa, na ɓa pai n'aga mu nuvutumu ɗa te pai na te muguza kai ɗa, nɵa siŋkumu zini tese na wiimu sin Alaw, nɵa mu zumu ɵeŋni maini na ni a firiyaŋ nɵa, war yimi na pin Alaw, war hormo lai.

²⁹ Buri Alaw na wiimu ɗa a afu zi yi wazagai lai.