Hebrekai 11 - Ɗû na sɗik na wiini Alaw

Yimi na wiiɗi nagai na marai

¹ Yimi ɗa a wala na jre, jre, n'aŋ war wala na mu ɗumu aŋ biyuŋmu, a yimi na fakat na miɗini wala n'arni ɗif sini kai.

² Nagai na marai e nivi zaida na pɗem midiɗi pin yimi hanɗa.

³ Gaini yimi ɗa, mu suɗumu ɓa duniya te rga gaini seŋ na min Alaw par, nɵa wazagai na mu tuluŋmu na ɗa a za gaini wazagai n'armu sini ca ɗa kai.

⁴ Gaini yimi ɗa, Abel a za ɓaka n'abai wiini Alaw a suwa na wiini Kayin ɗa, pin yimi hanɗa, zaida a muɗa edi miɗini ɓa a ɗif na jre, Alaw gaini midini dama a za zaida miɗini ɓaka na wiini ɗa, gaini yimi hanɗa, Abel gaini mri su tekeɗeɗi a muɗa seŋ.

⁵ Gaini yimi, Enok a yima amai, a kiɗa a nava mri kai, ɗif a navaŋ kir kai, buri ɓa Alaw a yimaŋ amai. Wuzani tikini n'amai ɗa, zaida a za midini ɓa a na arni Alaw pɗem.

⁶ Gaini yimi kai ɗa, ɗif a sɗa aŋ bunda arni Alaw pɗem kai zaŋ, buri asiya ɗi paŋ n'a torasi sini Alaw ɗa aga a yima ɓa Alaw a na, a sa vrak wiiɗi nagai n'e piyiŋ ɗa lai.

⁷ Gaini yimi ɗa Nowa, hlai n'Alaw a miɗini miɗini wala n'arni ɗif sini kai, pin hunai n'abai na pin Alaw n'a na warni ɗa, a zizina arkeŋ buri a kûriɗi ɗai n'ahani, gaini yimi hanɗa a kûti sariya midiɗi ɗai na warɗi yai, a bunda aŋ zi mili bulum na wiini jre-ɗikat n'a kata pin yimi.

⁸ Gaini yimi ɗa Abraham a ɵina pin wule n'a muɗa sini, buri a hala midini afti n'a dara a siŋni aŋ bulum: A hala sek na ɗa a sɗa hlai n'a hala warni kai.

⁹ Gaini yimi, a hala a sumna midini afti na ɵinini ha a za miɗini, maini midini afti na zamai nɵa. A sumna pin gumu gaini Isaak, gaini Yakob, nagai n'e mili bulum na wiini ɵinini ha gaini.

¹⁰ Buri a na fu aŋ baiya fuŋ n'abai n'ezini a tora azumai gaini futini, na ɗif n'a za plaŋni, n'argaŋ lai a Alaw.

¹¹ Gaini yimi ɗa lai, Sara na te na muɗaŋ, na buzaɗi a za abai ta lai ɗa, te kiɗa te wa pinziba, buri te yima ɓa ni n'a za ɵinini ha ɗa a jre.

¹² Buri nɵa sini ɗif ktai par-n'a ŋa ta aŋ mri-pinziba a za viya, maini meeɵek n'arbani hlai n'amai, maini kaikai n'agoɗom wulani yem-ra n'abai nɵa, n'a sɗa aŋ pɵa kai.

¹³ Gaini yimi ɗa nagai n'e mri paŋ, n'e nivi wala na ɵinini ha a muɗa miɗini kai, amma e tiliŋsi edi gaigai par, e ɵiɓini wuti lai, nagai e siɗi edi gaglai ɓa nagai e ɗi morkokoi, e ɗi zi jak midiɗi yai.

¹⁴ Buri nagai n'e miɗi maini hanɗa ɵa ɗa, e diri e siŋki edi gaglai ɓa e ɗa piyi aftiɗi zi wii.

¹⁵ Na ɓa midiɗi a kɵa fu gaini pɗemni afti n'e hilisi warni par ɗa, a na ta ɗa, e wiyi li warni wai.

¹⁶ Amma e piyi na ɗa a afti na pɗem a suwa, a dara muɗa na war fuŋ n'Alaw. Buri hanɗa Alaw siyer arni buri e yikiŋ aŋ Alaw na wiiɗi kai, buri a ziziniɗi fuŋ n'abai ɗa ya.

¹⁷ Gaini yimi, Abraham won hlai n'Alaw a tetemaŋ, a za ɓaka gaini Isaak n'Ahini, a ahini na ketekeɗik, na paŋktai, Alaw a zini ɵinini ha ɗa ya lai,

¹⁸ na miɗi a muɗa sini lai ɓa: Aga ku nava pinziba ɗa gaini Isaak.

¹⁹ A yima ɗa ɓa Alaw spakni a na, buri a ɵiyiɗi zi mri amai war mri par, Alaw a waya a sini ahini katawai na ɗa buri hanɗa, hanɗa a wala zi siŋki.

²⁰ Gaini yimi, Isaak a ɓaka Yakob gaini Ezaw, burini n'aga a za dawai sek ɗa.

²¹ Gaini yimi, Yakob wuzani mrini a ɓikiɗi alini Yosef ɗa ktai ktai paŋ. A hurga azumai, a goɓa midiɗi amaraŋai.

²² Gaini yimi, Yosef a mra sek ɗa a muɗa ka miɗini niyi n'edi na wiiɗi aliɗi Izrayel, a gidiɗi ka miɗini keɵkeni lai.

²³ Gaini yimi, won hlai na Musus a wa li ɗa, tamaini e ŋuyiŋ haa tile hu, e tiliŋ a wa juf gara, e hûni miɗina wiini pai kaalai.

²⁴ Gaini yimi won hlai na Musus a za li abai ɗa, a firiya ɓa e yikiŋ ɓa ahiɗi ahini Faraw kir kai.

²⁵ A firiya ɓa a tapa war gir gaiɗi ɗai na wiini Alaw a suwa simni na war firiyi na war tuwur buri hlai n'agwi.

²⁶ Miisi n'e miisiŋ burini Mesiyas ɗa, a tala arni aŋ der na pɗem, a suwa der na war Egipte ɗa paŋ, buri a mula arni wuzani sek gaigai sini vrak n'aga a navaŋ.

²⁷ Gaini yimi ɗa, a yima sini edi war Egipte par, a huna burini hiy na wiini Faraw ɗa kai, buri ɓa a ɗiya gdaŋ maini ɗif n'arni sini Alaw n'arni ɗif a talaŋ kai ɗa ɵa.

²⁸ Gaini yimi ɗa ziti fet na wiiɗi Paska, a yema fel amai mini hlai lai, kapai ɗif zi ɵeŋ na wiini mri ɗa a titimiɗi ali n'e wi avut na wiiɗi Izrayel.

²⁹ Gaini yimi ɗa, aliɗi Izrayel e vigi warni yem-ra n'abai na mekele, maini n'amai midini afti na huleŋ nɵa, won hlai na ɗai n'Egipte n'e firiyi e zi mai hanɗa ɵa, e bi agoɗom.

³⁰ Gaini yimi ɗa ɵagai na Yeriko te hurba azumai, asakal na ɗai e gûniti azumai haa mefeŋ muguzak.

³¹ Gaini yimi Rahab muni na zawar ɗa te ba edi gaiɗi nagai n'e yimi kai ɗa kai, buri ɓa te yimiɗi ɗai n'e hilisi aŋ tili afti gaini ɵeɗ.

³² Mu muɗa zamai ɗa a ma ɗa? Hlai a kiɗa kai aŋ muɗa edi miɗini sdaɗi ɗai hanɗa ktai ktai paŋ ɗa. Midini Gedeyon, Barak, Samsom, Yefte, David, gaini Samuwel gaiɗi ɗai na min Alaw lai ɗa.

³³ Nagai na gaini yimiɗi ɗa e rɗi amai midiɗi paakai viya, e zi jre, e nivi wala na ɵnini ha a za miɗini, e dûgû mini gurnai,

³⁴ e fiɗi spakni afu azumai, e kûrɗi min kaɵkar par, e nivi gdaŋ suwa askalni veglekɗi par, n'e siŋki edi aŋ maɵagai edi min gaw, n'e birgiɗi vokɗi askarai zi gaw n'edi par lai.

³⁵ Falakai zamai ɗa e niviɗi ɗaiɗi n'e mri ɗa, buri ɓa e ɵiyisi amai, amma na zamai ɗa e siɗi gir e firiyi pli n'edi kai, kapai e nivi ɵiyi n'amai na pɗem a suwa.

³⁶ Nagai na zamai ɗa, ɗai e ziɗi anya, e ɵiɓiɗi gaini daɓala, zamai ɗa e nigiɗi gaini jaɓ, e miliɗi warni daŋgai lai.

³⁷ E fiɗiɗi edi gaini kiryit, e ɗûklûɗi gaini si, e fiɗiɗi edi gaini kaɵkar, e hini yaw aŋ giliŋi, e wi siɗi ɗa a amurni adumai, gaini amurni haakai, walaɗi kai, e ziɗi gir arɗi, e siɗi gir lai.

³⁸ E tili mai na ɓa yai te wiiɗi kai, e hini yaw aŋ giliŋi edi war basga na kaɗataŋ, amai midini huwaŋai, warni waŋ na sini huwaŋai, warni waŋ n'arni afti lai.

³⁹ Nagai hanɗa paŋ pin yimi na wiiɗi ɗa, zaida na pɗem a muɗa edi midiɗi, amma e nivi wala na ɵinini ha a muɗa miɗini ɗa kai.

⁴⁰ Buri ɓa Alaw a na fu gaini wala na pɗem a suwa burimu, kapai nagai e gi sin vi n'amai gaimu tumu aŋ bonu.