Hebrekai 10 - Ɗû na sɗik na wiini Alaw

¹ Buri ɓa gadai ɗa a sezeni wazagai n'a na gizi, a wala n'a ziŋga wazagai hanɗa kal kal kai, buri nɵa a kiɗa a kiɗi nagai n'e hilisi sini ɗa aŋ vi amai war pɗem kai, buri ɓa e zi ɗa a ɓaka ni ɵa yaw, buza buza paŋ.

² Na ɓa ɵa kai ɗa, sumu pini ɓaka ɵa tiɓ aŋ zi ɵa ɗi? Nagai n'e siiwi Alaw gaini hanɗa ɵa ɗa, a na ta ɗa e zi edi aŋ hilu ya azi ktai, hinini tuwur midiɗi kir kaalai.

³ Amma gaini zini ɓaka hanɗa, e ɵiɗi midiɗi ɗai burini tuwur buza buza paŋ.

⁴ Buri ɓa felni garakai gaini haakai ɗa a kiɗa a tika tuwur edi kai zaŋ.

⁵ Buri nɵa, won hlai na Kristu a halasi warɗi yai ɗa a muɗa maini nɵa: Tuku ku firiya ɓaka kai, like kaalai amma ku zizina si buriya.

⁶ Tuku ku paya ɓaka zi yi kaalai, ɓaka na burini tuwur kaalai.

⁷ Buri nɵa mu muɗa ɓa: Ɗû n'aŋ warni maktuɓ zi fiɗɗi a ɗo mada. M'an na. Alaw, mu halasi buri mu za diriku.

⁸ A tika pini a muɗa daai ɓa: Ɓaka gaini like gaini ɓaka zi yi, gaini ɓaka na burini tuwur ɗa, tuku ku firiyaŋ kai, ku yimaŋ kaalai, paŋktai a za ɗa pin gadai ɗa lai.

⁹ Asakal par a muɗa pra: mu halasi na ɗa aŋ za diriku, aŋ fuɗa hiini n'avut ɗa edi, aŋ bundaŋ gaini n'ag'aŋ sulu.

¹⁰ Tumu mu bundumu edi sɗik gaini ɓaka na wiini sini Yesu, n'a zaŋ azi ktai war diri hanɗa.

¹¹ Pai zi ɓaka paŋ a ɗiya war hlaini zi sda, mefeŋ mefeŋ paŋ buri a za sda na wiini, aŋ za ɓaka ni dama ɵa ɵa azi viya lai, a ɓaka n'a kiɗa aŋ vada tuwur edi kaalai.

¹² Amma ni ɗa asakal n'a za ɓaka burini tuwur azi ktai, a sumna azumai gamai, war hlai zi hormo na wiini Alaw.

¹³ A baiya na ɗa ɓa gawni e si war tini, kapai a ziɗi aŋ wala n'e niyi amai midini paramaiɗi pai gaini.

¹⁴ Gaini ɓaka n'a zaŋ azi ktai ɗa, a ziɗi edi gaini vi amai war pɗem haa kureɗ, nagai n'e zi edi aŋ sɗik.

¹⁵ Hanɗa a wala na Seze sɗik a na muɗaŋ edi sumu lai. Buri asakal n'a muɗa ɓa:

¹⁶ Bonu n'aga mu zaŋ gaiɗi asakalni mefeŋ hanɗa par a na maini nɵa: A muɗaŋ a Epiɗ-ɗai Aga mu tika gadai na wiya war agulɗi, aga mu ɗoŋ war hiiniɗi lai.

¹⁷ Aga mu hina mada a kɵa gaini tuwur na wiiɗi kir kai zaŋ, gaini meefeŋ na wiiɗi kaalai.

¹⁸ Nɵa ɗa, won hlai na ni burini tuwur a na ɗa, ɓaka na burini tuwur ɗa a za kir kai.

Turumusi gobi gaini Alaw, yimumu gdaŋ lai

¹⁹ Nɵa ɗa tawalakai, tumu mu suɗumu edi gaglai ɓa mu kuɗumu buri mu niyumu amlai war hlai na sɗik gaini ɗili mudumu kai, war fel na wiini Yesu.

²⁰ Te futi n'a ɓisiti burimu, aŋ futi na hahai, na karɗi lai, arbani sapa na gaini giŋi amai, a dara muɗa war neŋ-sini.

²¹ Nɵa, mu ɗumu gaini pai zi ɓaka n'abai n'e tikiŋ miɗini dalamni Alaw.

²² Nɵa turumusi sini gaiɗi agul na jre, gaini yimi na ktai, agulmu gaini mi edi hilu, hiini na meefeŋ warɗi kai, sumu gaini mi edi gaini yem na hilu.

²³ Biyi-na-pin-ɵeɗ na wiimu ɗa, aga mu suŋkuŋmu edi wuzani arɗi ɗai papɗak, wuzamu sek sek, mu plumu mumu kai, buri ni n'a za ɵinini-ha ɗa a ɗif n'a za eles kai.

²⁴ Aga mu tukumu hangalmu siɗi marmu, kapai mu hugumu marmu aŋ zi diri siɗi marmu, aŋ za sda na pɗamai lai.

²⁵ Mu hinumu tipi na wiimu edi maiɗi na marmu na zamai e ɗa ziŋ ɗa ɵa kai, amma mu zunumu piɗi marmu arbaɗi marmu, ki zi hanɗa won hlai na ki tili mefeŋ a na halasi gobi ɗa.

²⁶ Na ɓa mu zumu tuwur pin dirimu, asakal na mu suɗumu jre ya ɗa, ɓaka na burini tuwur a hina kir kai.

²⁷ A hina ɗa a bayai zi mili hunai n'abai na wiiɗi sariya, gaini afu n'aga a yiɗi nagai n'e ɵini gat kai.

²⁸ Na ɓa ɗif a ha li amai midini gadai na wiini Musus ɗa, pin zaidaɗi ɗai sulu zaw hu a nava fiɗi n'edi gaini hiinini haw kai.

²⁹ Ki hiini ɓa vrak na meefeŋ, n'aga a sa sini ni n'aga a kirpa Ahini Alaw azumai pin ezini, n'aga a yima fel na wiini bonu n'a za ɗai edi sɗik gaini aŋ wala kadai, n'aga a tirka seze zi yum lai ɗa, aga a za ɗa abai a suwa kai ɗi?

³⁰ Buri mu suɗumu ni n'a muɗa ɓa: Mu ziti sariya mu ta, mu sa vrak na meefeŋ ɗa mu ta lai. A muɗa pra: Epiɗ-ɗai aga a ziti sariya wiiɗi ɗaini.

³¹ A gir gara na ɓa ɗif a kɵa war bobur tini Alaw na karni.

³² Ki hini midiki a kɵa gaini mefeŋ n'avut, n'arki a mala edi woni ɗa, na tiki ki hitimi hatam n'abai na gir gara lai.

³³ War gal zamai ɗa, e yimiki maini wala n'e ɵi dawaŋ gaini nɵa, e tirkiki, e ziki gir, war gal zamai ɗa, tiki ki tipi ktai gaiɗi nagai n'e ɗa ziɗi gir mai hanɗa ɵa ɗa.

³⁴ Tiki ɗa, gir na ɗai e ɗa siɗiŋ war daŋgai ɗa, a fiɗiki siki, ki hiniɗi ɗai e mili wazagaiki gaini firiyi, buri ki siɗi ya ɓa, derki na pɗem n'a suwa a na, n'a sɗa aŋ vada kai.

³⁵ Buri nɵa ki hini yimi na wiiki edi kai, buri aŋ gaini vrak n'abai pini.

³⁶ Buri nza tiki aga ki siiki war hangal, buri won hlai na ki zi dirini Alaw ya, aga ki nivi wala n'a za ha midini.

³⁷ Buri ɗû na sɗik a muɗa maini nɵa: mefeŋ a hina agwi, -agwi kadai- ni n'aga a halasi ɗa, aga a halasi: aga a safasi kai.

³⁸ Ɗif na jre ɗa aga a sumna karni pin yimi, amma na ɓa a waya li asakal ɗa, suŋfaɗi agula aga a firiya burini kai.

³⁹ Tumu mu ɗumu arbaɗi nagai n'e wiyi asakal aŋ bi edi ɗa kai, amma arbaɗi nagai zi yimi aŋ kora suŋfamu.