Hebrekai 1 - Ɗû na sɗik na wiini Alaw

Alaw a muɗa sumu war Ahini

¹ Aɗipar ɗa, Alaw a muɗa siɗi tiyakaimu war miɗi ɗai na min Alaw azi viya war yel kiini kiini viya.

² Amma tiyana, war mefeŋ na mu ɗumu warni na ɗa, a na muɗa sumu war Ahini n'a sini wazagai paŋ aŋ bulum, a ziti duniya paŋ gaini Ni lai.

³ Ahi hanɗa, a ŋiliɗi abai na wiini, a ni n'a siŋka Alaw mal edi lai. A giɗima wazagai paŋ gaini seŋni zi spak; Asakal n'a za ɓaka burini tuwur ya ɗa, a sumna war hlai zi hormo na wiini Alaw, amai war hlai n'amai,

⁴ a bunda abai, a sûwiɗi ɗai zi ɵeŋ na war fuŋ-n'Alaw a nava yiki zi kol n'a wa a suwa na wiiɗi nagai lai.

Ahi a sûwiɗi ɗai zi ɵeŋ na war fuŋ-n'Alaw

⁵ Alaw a miɗini ka wiini ɗif zi ɵeŋ na war fuŋ-n'Alaw ktai duk ɓa: Tuku k'Ahiya, ta mu wuku li girna ɗa, a muɗa ɵa duk ɗi? Zaw ɓa: Ta aga mu za aŋ Epini, ni aga a za aŋ Ahiya lai? A muɗa ka ɵa duk kai.

⁶ Katawai pra, won hlai n'a kasi Ahi zi wi n'avut warɗi yai ɗa a muɗa ɓa: Ɗai zi ɵeŋ na war fuŋ-n'Alaw paŋ ɗa aga e hûrgû azumai wuzani.

⁷ Buriɗi ɗai zi ɵeŋ na war fuŋ-n'Alaw a muɗa maini nɵa: A bindiɗi ɗaini zi ɵeŋ na war fuŋ-n'Alaw edi aŋ smer, ɗaini zi sda aŋ elesni afu n'a ya lai.

⁸ Amma burini Ahini a muɗa maini nɵa: Paramai zi pai na wiiku, Alaw, te na ɵa haa hlai n'a vada kai, n'a vada kai, Amaraŋai zi pai na ku ŋa gaiɗi ɗa, t'amaraŋai zi pai na wiini jre-ɗikat.

⁹ Tuku ku dara jre, ku bula edi sin meefeŋ, buri nɵa, Alaw, Alaw na wiiku a muku emel n'e tiki ɗai war sda gaini muduku ya, a emel zi firiyi n'abai, a za hanɗa siɗi marku na zamai kai. sai suku tuku.

¹⁰ A muɗa zamai pra ɓa: Ku toora eziɗi yai azumai war pi zi tiki par ɗa ku tuku Epiɗ-ɗai, hlai n'amai ɗa ku zaŋ ku tuku gaini tuku lai.

¹¹ Wazagai hanɗa paŋ aga a vada edi, amma tuku ku na suku ɵa; aga a tuura edi kafa maini sapa nɵa.

¹² Aga ku faɗaŋ amai maini kaput nɵa, aga ku bundaŋ maini sapa na ɗif a bundaŋ nɵa, amma tuku, a suku ɵa, buzaku a vada kaalai.

¹³ Arbaɗi ɗai zi ɵeŋ na war fuŋ n'Alaw ɗa, ktai n'a muɗa ka sini ba: Sumnasi azumai ɵima na dam haa mu bindiɗi gawku paŋ aŋ wala na ku ha amai midiɗi paramaiku miɗini a na ɗi?

¹⁴ Nagai paŋ e ɗi seze zi ɵeŋ kai ɗi? N'e ɵiniɗisi edi buri e zini piɗi nagai n'aga e nivi kûri ɗa kai ɗi?