Haggai 1 - Ɗû na sɗik na wiini Alaw

HLAI A VA LI BURI RGINI TEMPEL

¹ War buza n'ag'aŋ sulu na Dariyus aŋ warɗi pai, warni mefeŋ n'avut na wiini tile n'ag'aŋ ɵaara, seŋ na wiini EPIƊ-ƊAI a muɗa edi war mini Haggai ɗif na mini Alaw par sini Zorobabel n'ahini Seyatiyel Lawan na war Yuda, gaini Yosva n'ahini Yehosadak, pai n'abai zi ɓaka.

² EPIƊ-ƊAI zi spak paŋ a na muɗa maini nɵa: Ɗai hanɗa e ɗa miɗi ɓa: Hlai buri rgini dalam na wiini EPIƊ-ƊAI a cosi kai hai.

³ Amma EPIƊ-ƊAI a muɗa edi mini ɗif na mini Alaw Haggai, a muɗa maini nɵa:

⁴ A cosi na ɗa a hlai na wiiki na ki simni war dalam na pɗamai ɗa, na wiini EPIƊ-ƊAI a hina edi aŋ greŋ ɗa kir kai ɗi?

⁵ Tiyana, Ta EPIƊ-ƊAI zi spak paŋ, mu miɗiki ɓa: Ki hiini pɗem miɗini seŋki ɗa.

⁶ Tiki ki sûûɗi viya, amma ki hiɗi ɗa agwi, ki simi, amma ki vi kai, ki ci amma ki ciini kai, ki wi sapa zi smer siki, amma smer a ziki ɗaai, vrak na wiiɗi zi sda a niya war guɓa na pini baŋa su su.

⁷ Nɵa EPIƊ-ƊAI zi spak paŋ a na muɗa: Ki hiini pɗem miɗini seŋki ɗa.

⁸ Hili amai siɗi huwuŋ, piyisi luwuŋ, rgiŋa tempel na wiya, kapai firyiŋa a va amai, mu kolaŋ lai, a miɗi na sini EPIƊ-ƊAI zi spak paŋ par.

⁹ Tiki ki hiini ɓa, aga ki hiɗi viya, amma ki nivi ɗa agwi, amma ki kiŋsi aha li ɗa, mu buburaŋ edi tiki. Buri maɗa? A miɗi na sini EPIƊ-ƊAI zi spak paŋ par. Burini dilimiŋa na t'aŋ gaini tûûri, amma tiki ɗa, ɗif paŋ a tika hangalni aŋ ziziniti na wiini wiini,

¹⁰ Pini hanɗa, amai par midiki, hlai n'amai a cakasi faŋ ɗa cak, Afti ɗa aga a cakasi seyem ɗa cak lai.

¹¹ Mu yikasi koɓro midini afti, midini huwaŋai, miɗini vowaini algama, vowaini luwuŋ zi vin, miɗini vowaini luwuŋ olive, miɗini seyem n'arni afti par paŋ, midiɗi ɗai, miɗini farai gaini wazagai na ki ziŋ ɗa paŋ.

¹² Zorobabel n'ahini Seyatiyel, gaini Yosva n'ahini Yehosadak pai zi ɓaka n'abai gaiɗi nagai n'e hinisi edi paŋ e ziɓiri wule na wiini EPIƊ-ƊAI Alaw na wiiɗi gaini seŋ na wiini ɗif na mini Alaw Haggai, pini ɵeŋ n'EPIƊ-ƊAI Alaw na wiini a siŋni, nɵa ɗai e miliŋi gaini hunai.

¹³ Haggai, ɵeŋ na wiini EPIƊ-ƊAI a muɗa siɗi maini n'a navaŋsi sini EPIƊ-ƊAI par nɵa. Mu na gaiki, a miɗi na sini EPIƊ-ƊAI par.

¹⁴ EPIƊ-ƊAI a mala hinini Zorobabel n'ahini Seyatiyel, Lawan na war Yuda ɗa edi gaini hinini Yosva n'ahini Yehosadak pai zi ɓaka n'abai gaini hiiniɗi ɗai n'e hini, n'e wiyisi edi par e hilisi e niyi war sdani rgini dalam na wiini EPIƊ-ƊAI zi spak paŋ Alaw na wiiɗi.

¹⁵ A za war mefeŋ caaɓa pi puɗu, na wiini tile n'ag'aŋ ɵaara, war buza n'ag'aŋ sulu na Dariyus aŋ warɗi pai.